ដំណឹងល្អសម្រាប់សិស្សទី១២! លោកស្រី សុភា បុត្រឈរ ផ្ដល់អាហារូបករណ៍ដល់និស្សិតក្រីក្ររៀនពូកែ ៥០ នាក់

ដំណឹងល្អសម្រាប់សិស្ស-និស្សិតដែលត្រៀមបញ្ចប់ថ្នាក់ទី១២ នាពេលដ៏ខ្លីខាងមុខនេះ ត្បិតអីលោកស្រី សុភា បុត្រឈរ បានសម្រេចផ្ដល់ជូនអាហារូបករណ៍ដល់អ្នកដែលរៀនពូកែ ប៉ុន្តែជីវភាពលំបាកចំនួន ៥០ នាក់។

តាមរយៈការជូនដំណឹងនៅលើផេកបណ្ណាល័យ គោប្រាក់ បានឱ្យដឹងថា សម្រាប់សិស្សនិស្សិតដែលត្រៀមប្រឡងបញ្ចប់ថ្នាក់ទី១២ ជាសិស្សដែលរៀនពូកែ ប៉ុន្តែមានជីវភាពលំបាកពុំអាចបន្តការសិក្សាបាន ពេលនេះលោកជំទាវ សុភា បុត្រឈរ បានសម្រេចផ្ដល់ជូននូវអាហារូបករណ៍ចំនួន ៥០ នាក់។ សម្រាប់អាហារូបករណ៍នេះដែរនឹងត្រូវផ្ដល់ជូនសម្រាប់៖

ទី១. សិស្សពូកែរបស់បណ្ណាល័យ គោប្រាក់

ទី២. សិស្សក្រីក្រក្នុងខេត្តសៀមរាប

ទី៣. សិស្សពូកែ និងក្រីក្រខ្លាំងតាមបណ្ដាខេត្តនានា

សម្រាប់ការដាក់ពាក្យ សិស្សនិស្សិតអាចមកយកពាក្យផ្ទាល់បាននៅបណ្ណាល័យគោប្រាក់ខេត្តសៀមរាប (ដែលមានទីតាំងនៅខាងក្រោយមន្ទីរពេទ្យ គន្ធបុប្ផា)។ ចាប់ទទួលពាក្យចាប់ពីថ្ងៃជូនដំណឹងនេះតទៅគឺថ្ងៃទី ២៩ ខែកក្កដា ឆ្នាំ២០២៦ រហូតដល់ថ្ងៃទី ១០ សីហា ឆ្នាំ ២០២៦ រៀងរាល់ម៉ោងធ្វើការ (១០ព្រឹក ដល់ម៉ោង ៥ល្ងាច) ។

គួរបញ្ជាក់ដែរថា មិនមែនគ្រប់ការដាក់ពាក្យស្នើត្រូវបានជាប់ទាំងអស់នោះទេ ព្រោះចំនួនត្រូវបានកំណត់។ មួយវិញទៀត ការជ្រើសរើសគឺធ្វើឡើងដោយលោកស្រី សុភា បុត្រឈរ ផ្ទាល់។ ការផ្ដល់ជូនអាហារូបករណ៍យ៉ាងច្រើននេះ បានជួយដល់អ្នកដែលខ្វះខាតអាចបន្តការសិក្សាយ៉ាងពេញលេញ និងបន្តក្ដីសង្ឃឹមនាថ្ងៃអនាគត។

ទង្វើលោកស្រី សុភា បុត្រឈរ ឬឧកញ៉ា ណូ សុភា ចំពោះវិស័យអប់រំ ពិតជាគួរឲ្យស្ញប់ស្ញែងខ្លាំងណាស់ ដោយកាលពីពេលថ្មីៗស្រ្តីខ្មែរដែលមានស្វាមីជាសេដ្ឋីអាល្លឺម៉ង់រូបនេះទើបជួយជាថវិកាយ៉ាងសន្ធឹកដល់លោកគ្រូអ្នកគ្រ ធ្លាប់បង្រៀនខ្លួននៅស្រុកកំណើតខេត្តកំពង់ធំ ព្រមទាំងបានជួយកសាងសាលារៀននៅខេត្តក្រចេះថែមទៀតផង៕

រូបភាព ៖ Sophea Böttcher

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។