មនុស្សជាច្រើនមានទម្លាប់មួយពេលធ្វើម្ហូប គឺកាត់ក្រូចឆ្មារប្រើតែបន្តិចបន្តួច រួចទុកវាចោលក្នុងទូទឹកកករាប់សប្ដាហ៍ រហូតដល់វាស្ងួតប្រើការលែងកើត។ មកផ្លាស់ប្ដូរទម្លាប់នេះ ហើយប្រើវាឱ្យមានប្រយោជន៍ល្អជាង ព្រោះក្រៅពីប្រើប្រាស់សម្រាប់គ្រឿងផ្សំរសជាតិ ឬធ្វើទឹកក្រូចឆ្មារត្រជាក់ៗហើយ ក្រូចឆ្មារនៅមានប្រយោជន៍ក្នុងផ្ទះបាយច្រើនជាងអ្វីដែលអ្នកគិតយ៉ាងអស្ចារ្យ។

វិធីប្រើប្រាស់ប្រយោជន៍ពីក្រូចឆ្មារ ១២ យ៉ាង

• ជូតកញ្ចក់ឱ្យភ្លឺស្អាត៖ ជូតកញ្ចក់ដោយទឹកក្រូចឆ្មារនឹងជួយជម្រះស្នាមប្រឡាក់ និងស្នាមទឹកបានល្អ ដោយសារក្រូចឆ្មារមានអាស៊ីតដែលជួយកាត់បន្ថយស្នាមខ្លាញ់ ស្នាមទឹក និងធូលីដីបានល្អ។ គ្រាន់តែលាយទឹកក្រូចឆ្មារជាមួយទឹកក្ដៅឧណ្ហៗ រួចប្រើក្រណាត់ជ្រលក់ទឹកក្រូចឆ្មារជូតកញ្ចក់។ វិធីនេះមិនត្រឹមតែធ្វើឱ្យកញ្ចក់ថ្លាសស្អាតប៉ុណ្ណោះទេ ប៉ុន្តែថែមទាំងជួយការពារការកើតមានស្នាមប្រឡាក់ថ្មីទៀតផង។
• សម្អាតម៉ាស៊ីនមីក្រូវ៉េវ (Microwave)៖ ខាងក្នុងម៉ាស៊ីនមីក្រូវ៉េវរបស់អ្នកមើលទៅប្រឡាក់ដូចរូបគំនូរ Picasso មែនអត់? ក្រូចឆ្មារជួយឱ្យវាស្អាតរលោង និងគ្មានក្លិនបាន! គ្រាន់តែហាន់ក្រូចឆ្មារជាចំណិត (ឬប្រើកន្លះចំបែកដែលសល់) ដាក់ក្នុងចានដែលមានទឹក រួចដាក់ចូលក្នុងមីក្រូវ៉េវដោយប្រើកម្ដៅអតិបរមាប្រហែល ១៥ នាទី។ ពេលរួចរាល់កុំទាន់ប្រញាប់បើកទ្វារ ត្រូវបិទទុកចោល ៥ នាទីទៀតដើម្បីឱ្យចំហាយទឹកជ្រាប។ បន្ទាប់មកប្រើក្រណាត់សើមល្មមជូតសម្អាតខាងក្នុង។
• ខាត់អាងលាងចានឱ្យរលោងស្រស់ស្អាត៖ រាយ Baking Soda លើអាងលាងចាន រួចប្រើក្រូចឆ្មារកន្លះចំណិតខាត់ដុសឱ្យសព្វ។ លាងជម្រះដោយទឹកស្អាត ហើយជូតឱ្យស្ងួត អាងលាងចានរបស់អ្នកនឹងរួចរាល់សម្រាប់ការប្រើប្រាស់យ៉ាងភ្លឺរលោង។
• សម្អាតជ្រុញ៖ ជ្រុញរបស់អ្នកប្តូរពណ៌ មានស្នាមប្រឡាក់ ឬមានក្លិនខ្លាំងមែនទេ? សាកល្បងប្រើក្រូចឆ្មារកន្លះចំណិតដុសជាមួយអំបិលគ្រាប់ធំ បន្ទាប់មកយកទៅលាងតាមធម្មតា រួចយកទៅហាលឱ្យស្ងួត។
• ជម្រះស្នាមច្រែះ៖ លាយទឹកក្រូចឆ្មារ ១ ភាគ ជាមួយអំបិល ២ ភាគ ដើម្បីធ្វើជាគ្រីមខាប់ បន្ទាប់មកលាបលើកាំបិត ឬស្លាបព្រាសមដែលមានច្រែះ រួចប្រើសម្បកក្រូចឆ្មារខាត់ដុសរហូតដល់ស្នាមច្រែះជ្រុះអស់។
• សម្អាតប្រអប់ប្លាស្ទិក៖ យកក្រូចឆ្មារហាន់ជាចំណិតមកដុសឱ្យសព្វប្រអប់ប្លាស្ទិក មុននឹងយកប្រអប់ប្លាស្ទិកទៅត្រាំក្នុងទឹកលាយទឹកក្រូចឆ្មារទុក ១៥-៣០ នាទី រួចសឹមយកមកលាងជាមួយទឹកលាងចាន និងទឹកស្អាតតាមធម្មតា។ អាស៊ីតស៊ីទ្រីក (Citric acid) ក្នុងក្រូចឆ្មារនឹងជួយសម្លាប់បាក់តេរី និងបំបែកម៉ូលេគុលក្លិនអាលកចេញពីប្រអប់បាន។
• សង្គ្រោះឆ្នាំង/ខ្ទះដែលខ្លោច៖ ងាយៗ គ្រាន់តែចាក់ទឹកឱ្យលិចបាតឆ្នាំង បន្ថែមទឹកក្រូចឆ្មារ ១ ផ្លែ រួចយកទៅរំងាស់ដោយភ្លើងតិចៗប្រហែល ១០–២០ នាទី។ ស្នាមខ្លោចភាគច្រើននឹងសន្សឹមៗរបកចេញ ធ្វើឱ្យអ្នកខាត់ស្នាមខ្លោចដែលសល់ចេញបានងាយស្រួលជាងមុនយ៉ាងខ្លាំង។
• ធ្វើទឹកថ្នាំដេញមូស និងស្រមោច៖ ប្រសិនបើក្នុងផ្ទះបាយមានមូសច្រើន ត្រូវដាំទឹកក្រូចឆ្មារ ទឹកស្អាត និងឈើអែមចូលគ្នា (ប្រើទឹកក្រូចឆ្មារប្រហែល ៤–៥ ផ្លែ ក្នុងទឹក ១ លីត្រ) ចាក់ដាក់ចាន រួចយកទៅដាក់តាមចំណុចដែលត្រូវការការពារ។ ចំណែកការដេញស្រមោច ឱ្យប្រើទឹកក្រូចឆ្មារលាយទឹកស្អាត (សមាមាត្រ ទឹកស្អាត ២ ភាគ : ទឹកក្រូចឆ្មារ ១ ភាគ) បាញ់តាមតំបន់ដែលស្រមោចចូលចិត្តវារកាត់។
• បំបាត់ក្លិនអាប់ក្នុងទូទឹកកក៖ ជ្រលក់ទឹកក្រូចឆ្មារលើប៉ុង ឬដុំសំឡី រួចដាក់លើចានដាក់ក្នុងទូទឹកកក ក្លិនខ្លាំងៗនឹងត្រូវបឺតស្រូបយកទៅ។
• រក្សាអាហារមិនឱ្យខ្មៅ៖ ផ្លែឈើ ដូចជាប៉ោម ចេក ឬអាវ៉ូកាដូ នឹងកើតប្រតិកម្មអុកស៊ីតកម្មយ៉ាងរហ័សពេលប៉ះពាល់ខ្យល់ ធ្វើឱ្យសាច់ផ្លាស់ប្ដូរទៅជាពណ៌ត្នោត។ បញ្ហានេះអាចការពារបានដោយការច្របាច់ទឹកក្រូចឆ្មារស្រោបស្ដើងៗ (អាចប្រើបច្ចេកទេសដូចគ្នានេះបាន ប្រសិនបើត្រូវការធ្វើចេកបំពងស្ងួត)។

ការប្រុងប្រយ័ត្នពេលប្រើទឹកក្រូចឆ្មារសម្អាត

• ហាមលាយជាមួយទឹកសាប៊ូធ្វើឱ្យស (Bleach)៖ ទឹកក្រូចឆ្មារមានលក្ខណៈជាអាស៊ីត ដូច្នេះមិនគួរយកទៅលាយជាមួយទឹកសាប៊ូ ឬផលិតផលសម្អាតប្រភេទផ្សេងទៀតឡើយ ព្រោះការលាយទឹកសាប៊ូជាមួយសារធាតុដែលមានលក្ខណៈជាអាស៊ីត អាចបង្កឱ្យកើតឧស្ម័នក្លរីន ដែលធ្វើឱ្យរលាកភ្នែក បំពង់ក និងប្រព័ន្ធដង្ហើម។ មជ្ឈមណ្ឌលគ្រប់គ្រងនិងបង្ការជំងឺណែនាំថា មិនគួរលាយទឹកសាប៊ូ ឬទឹកថ្នាំសម្លាប់មេរោគជាមួយផលិតផលសម្អាតផ្សេងៗឡើយ។
• ទឹកក្រូចឆ្មារមិនមែនជាទឹកថ្នាំសម្លាប់មេរោគស្តង់ដារទេ៖ ទោះបីជាទឹកក្រូចឆ្មារជួយជម្រះស្នាមប្រឡាក់ និងកាកសំណល់មួយចំនួនបាន ប៉ុន្តែការសម្អាតមិនដូចគ្នានឹងការសម្លាប់មេរោគនោះទេ។ ការសម្លាប់មេរោគលើរបស់ផ្សេងៗដែលមានហានិភ័យ គួរប្រើប្រាស់ផលិតផលដែលបានឆ្លងកាត់ការទទួលស្គាល់ និងអនុវត្តតាមស្លាកសញ្ញាយ៉ាងម៉ឺងម៉ាត់។

ប្រសិនបើបានដឹងល្បិចទាំងអស់នេះហើយ ក៏ដល់ពេលទាញយកប្រយោជន៍ពីក្រូចឆ្មារមកប្រើឱ្យសមតម្លៃគ្រប់ដំណក់គ្រប់ផ្នែកហើយ។ ប៉ុន្តែប្រសិនបើអ្នកនៅតែភ្លេចទុកក្រូចឆ្មារកន្លះចំបែកចោលក្នុងទូទឹកកកទៀតនោះ យ៉ាងហោចណាស់ក៏ត្រូវរក្សាទុកឱ្យត្រូវវិធី ដើម្បីកុំឱ្យវាស្ងួតក្រពិត និងអស់ទឹក ដោយត្រូវរក្សាទុកក្នុងប្រអប់បិទគម្រប ឬដាក់ក្នុងកែវទឹក រួចក្លាសេទុកក្នុងទូទឹកកក។ វិធីល្អគួររកអ្វីមកគ្របបិទផង ព្រោះទោះបីជាមិនយកមកញ៉ាំបន្ត ក៏នៅតែអាចយកទៅប្រើប្រយោជន៍ផ្សេងៗទៀតបានដែរ ៕