របៀបរស់នៅប្រកបដោយសុវត្ថិភាព និងការថែរក្សាសុខភាព ក្នុងរដូវទឹកជំនន់

យោងតាមសេចក្តីជូនដំណឹងស្តីពីស្ថានភាពអាកាសធាតុរបស់ក្រសួងធនធានទឹក និងឧតុនិយម នៅក្នុងរដូវវស្សាឆ្នាំនេះ ស្ថានភាពភ្លៀងធ្លាក់ជោកជាំច្រើនជាប់ៗគ្នានៅក្នុងប្រទេសកម្ពុជា អាចបង្កឱ្យកើតមានជំនន់ទឹកភ្លៀងរហ័ស ព្រមទាំងធ្វើឱ្យកម្ពស់ទឹកស្ទឹង ព្រែក ទន្លេ ហក់ឡើងខ្ពស់ បង្កជាគ្រោះទឹកជំនន់ដែលអាចប៉ះពាល់យ៉ាងធ្ងន់ធ្ងរដល់ហេដ្ឋារចនាសម្ព័ន្ធ ទ្រព្យសម្បត្តិ និងជាពិសេសគឺ សុខភាព និងអាយុជីវិតរបស់ប្រជាពលរដ្ឋ។

ដើម្បីកាត់បន្ថយគ្រោះថ្នាក់ និងផលប៉ះពាល់ជាអតិបរមា ក្រសួងសុខាភិបាលបានចេញសេចក្តីណែនាំស្តីពី «ការការពារសុខភាព ត្រៀមបង្ការ និងឆ្លើយតបនឹងគ្រោះទឹកជំនន់» ដោយក្រើនរំលឹកដល់សាធារណជនទាំងអស់ឱ្យបង្កើនការប្រុងប្រយ័ត្នខ្ពស់ និងអនុវត្តតាមវិធានការណែនាំសំខាន់ៗជា ៣ ដំណាក់កាល ដូចខាងក្រោម៖

១. វិធានការត្រៀមបង្ការ (មុនពេលទឹកជំនន់មកដល់)

ការត្រៀមលក្ខណៈទុកជាមុន គឺជាកត្តាកំណត់ក្នុងការកាត់បន្ថយគ្រោះថ្នាក់៖

តាមដានព័ត៌មាន ៖ ត្រូវយកចិត្តទុកដាក់តាមដានស្ថានភាពកម្ពស់ទឹកជំនន់ជាប្រចាំ។
ត្រៀមស្បៀង និងទីទួលសុវត្ថិភាព ៖ ស្វែងរក និងត្រៀមទីទួលសុវត្ថិភាពដែលនៅជិតបំផុត ព្រមទាំងបម្រុងទុកស្បៀងអាហារ ទឹកស្អាត និងឱសថសង្គ្រោះបន្ទាន់។
រៀបចំជុំវិញផ្ទះសម្បែង ៖ ត្រូវធ្វើរបងព័ទ្ធ ឬបោះបង្គោលសម្គាល់ជុំវិញស្រះទឹក ឬកន្លែងដែលមានទឹកជ្រៅ។ ត្រូវថែរក្សាបរិស្ថានជុំវិញផ្ទះឱ្យស្អាត និងសាងសង់បង្គន់ឱ្យបានខ្ពស់ផុតពីការលិចលង់។

២. វិធានការការពារ និងការរស់នៅ (អំឡុងពេលមានទឹកជំនន់)

អំឡុងពេលទឹកកំពុងជន់លិច ការប្រុងប្រយ័ត្នត្រូវអនុវត្តគ្រប់ពេលវេលា៖

សុវត្ថិភាពស្នាក់នៅ និងអគ្គិសនី៖ មិនត្រូវចូលទៅក្នុងផ្ទះចាស់ ឬអគារទ្រុឌទ្រោមឡើយ ព្រោះអាចបាក់ស្រុត។ មិនត្រូវប៉ះពាល់គ្រឿងបរិក្ខារអគ្គិសនី ដោយដៃសើម ឬកំពុងឈរនៅក្នុងទឹកដាច់ខាត។
ការការពារជំងឺឆ្លង៖ ត្រូវសម្រាន្តក្នុងមុងគ្រប់ពេល (ទាំងយប់ទាំងថ្ងៃ) ដើម្បីការពារជំងឺគ្រុនឈាម គ្រុនចាញ់ និងជំងឺផ្សេងៗ។ ត្រូវងូតទឹកស្អាតជាមួយសាប៊ូជាប្រចាំ ដើម្បីបង្ការជំងឺសើស្បែក និងរមាស់។
អនាម័យចំណីអាហារ និងទឹកស្អាត ៖ ត្រូវទទួលទានទឹកស្អាត ដោយប្រើធុងចម្រោះ ដាំទឹកឱ្យពុះ ឬប្រើប្រាស់ថ្នាំក្លរីន ឬក្លរ៉ាមីន ៥០០ក្រាម (២គ្រាប់ អាចរំលាយទឹក ២០លីត្រ រួចទុក ៣០នាទីមុនប្រើប្រាស់) ដើម្បីចៀសវាងជំងឺរាគ អាសន្នរោគ ពុលចំណីអាហារ ឬជំងឺផ្លូវដង្ហើមស្រួចស្រាវ។ ត្រូវលាងបន្លែ ផ្លែឈើ ចម្អិនអាហារឱ្យបានឆ្អិនល្អ គ្របអាហារជិត និងលាងសម្អាតដៃជាមួយសាប៊ូឱ្យបានញឹកញាប់ ពិសេសមុន-ក្រោយបរិភោគ និងក្រោយចេញពីបង្គន់។
សុខភាពមាតា ទារក មនុស្សចាស់ និងជនមានពិការភាព៖ ស្ត្រីមានផ្ទៃពោះត្រូវតាមដាន និងពិនិត្យផ្ទៃពោះតាមការកំណត់។ បើជិតដល់ពេលសម្រាល ត្រូវរកកន្លែងស្នាក់នៅក្បែរមណ្ឌលសុខភាព ឬមន្ទីរពេទ្យ។ កុមារតូចៗត្រូវនាំទៅចាក់ថ្នាំបង្ការឱ្យបានទៀងទាត់។ ត្រូវយកចិត្តទុកដាក់ខ្ពស់ចំពោះមនុស្សចាស់ និងជនមានពិការភាព ដោយត្រៀមឈើច្រត់ រទេះរុញ ឬឱសថដែលពួកគាត់ត្រូវប្រើប្រាស់ប្រចាំថ្ងៃ។
សុវត្ថិភាពធ្វើដំណើរ និងសត្វអសិរពិស៖ ធ្វើដំណើរតាមទូក ឬកាណូត មិនត្រូវផ្ទុកមនុស្សលើសទម្ងន់កំណត់ឡើយ ហើយពេលយប់ត្រូវមានភ្លើងបំភ្លឺ និងអាវពោងសុវត្ថិភាព។ ត្រូវប្រុងប្រយ័ត្នពស់ចឹក ឬសត្វអសិរពិសទិច ដោយពិនិត្យឱ្យបានម៉ត់ចត់មុនឡើងទីទួល ឬដើមឈើ។ ពេលយប់ត្រូវស្លៀកខោវែង ពាក់ស្បែកជើងកវែង។ ករណីមានពស់ចឹក ឬសត្វអសិរពិសទិច ត្រូវបញ្ជូនជនរងគ្រោះជាប្រញាប់ទៅមណ្ឌលសុខភាព ឬមន្ទីរពេទ្យដែលនៅជិតបំផុត។

៣. វិធានការស្តារឡើងវិញ (ក្រោយពេលទឹកជំនន់ស្រកចុះ)

ក្រោយទឹកស្រក ហានិភ័យនៃជំងឺឆ្លងនៅតែអាចកើតមាន៖

បន្តអនាម័យ៖ បន្តបរិភោគអាហារ និងទឹកស្អាត សម្រាន្តក្នុងមុង និងសម្អាតខ្លួនប្រាណ។
ត្រួតពិនិត្យផ្ទះសម្បែង៖ ពិនិត្យមើលផ្ទះក្រែងមានការបាក់ស្រុត និងប្រយ័ត្នសត្វអសិរពិសដែលបង្កប់ខ្លួន។
សម្អាតបរិស្ថាន និងប្រភពទឹក៖ សម្អាតបរិស្ថានជុំវិញ និងក្នុងផ្ទះ ចៀសវាងការដក់ទឹកដែលនាំឱ្យកើតមូស។ អណ្តូងទឹក និងអាងទឹកត្រូវតែស្តារ និងសម្អាតឡើងវិញមុននឹងប្រើប្រាស់ ព្រមទាំងជួសជុលបង្គន់ឱ្យបានត្រឹមត្រូវ។

ការស្វែងរកសេវាសុខាភិបាលបន្ទាន់

នៅគ្រប់ដំណាក់កាល ប្រសិនបើបងប្អូនប្រជាពលរដ្ឋមានបញ្ហាសុខភាព សូមស្វែងរកការពិគ្រោះ ពិនិត្យ និងព្យាបាលជាបន្ទាន់នៅ ប៉ុស្តិ៍សុខភាពក្បែរទីទួលសុវត្ថិភាព មណ្ឌលសុខភាព ឬមន្ទីរពេទ្យដែលនៅជិតលោកអ្នកបំផុត៕

របៀបរស់នៅប្រកបដោយសុវត្ថិភាព និងការថែរក្សាសុខភាព ក្នុងរដូវទឹកជំនន់

លោក សេក សត្យា | Mr. Sek Sathya

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន

របៀប​រស់នៅ​ប្រកប​ដោយ​សុវត្ថិភាព​ ​និង​ការ​ថែរក្សា​សុខភាព​ ក្នុង​រដូវ​ទឹក​ជំនន់

លោក សេក សត្យា | Mr. Sek Sathya

របៀបរស់នៅប្រកបដោយសុវត្ថិភាព និងការថែរក្សាសុខភាព ក្នុងរដូវទឹកជំនន់