​ក្នុង​ស្ថានភាព​អាសន្ន​នៅ​ពេល​ដែល​ជនរងគ្រោះ​គាំង​បេះដូង​ ​ឬ​ឈប់​ដកដង្ហើម​ រាល់​វិនាទី​ដែល​កន្លងផុត​ទៅ​សុទ្ធតែ​ជា​ការ​កំណត់​រវាង​ «​ជីវិត​ ​និង​សេចក្តីស្លាប់​»​។ ​ការ​សង្គ្រោះ​មុខងារ​បេះដូង​ ​និង​សួត​ ​ឬ​ ​CPR​ ​(​Cardiopulmonary​ ​Resuscitation​) ​ក្នុង​បរិបទ​សង្គ្រោះ​កម្រិត​មូលដ្ឋាន​ ​(​Basic​ ​Life​ ​Support​ ​-​ ​BLS​) ​គឺជា​ជំនាញ​សង្គ្រោះ​បឋម​ដ៏​សំខាន់​បំផុត​មួយ​ដែល​សាធារណជន​គ្រប់​រូប​គួរ​សិក្សា​ ​និង​យល់ដឹង​ឱ្យ​បាន​ច្បាស់លាស់​។​

​តើ​ពេលណា​ដែល​ត្រូវ​ធ្វើ​ ​CPR​?​

​ការ​ធ្វើ​ ​CPR​ ​ត្រូវ​អនុវត្ត​ភ្លាម​ៗ​ក្នុង​ករណី​អាសន្ន​ដូច​ខាងក្រោម​៖​
​-​ ​អ្នកជំងឺ​គាំង​បេះដូង​ ​៖ ​អ្នកជំងឺ​បាត់បង់​ស្មារតី​ ​ហើយ​ពុំ​អាច​ចាប់​បាន​ជីពចរ​សរសៃ​ឈាម​ ​Carotid​ ​(​នៅ​ត្រង់​ផ្នែក​ចំហៀង​ក)​។
​-​ ​គ្មាន​ដង្ហើម​ ​ឬ​ដង្ហើម​មិន​ប្រក្រតី​ ​៖ ​អ្នកជំងឺ​ឈប់​ដកដង្ហើម​ ​ឬ​មាន​អាការៈ​ដក​ចង្ការ​មាន់​ ​(​Gasping​)​។​

​ជំហាន​នៃ​ការ​ធ្វើ​ ​CPR​ ​តាម​ស្តង់ដារ​បច្ចេកទេស ​(​BLS​ ​Guidelines​)

​1. ​ពិនិត្យ​ជីពចរ​សរសៃ​ឈាម​ ​Carotid​ ​៖ ​ពិនិត្យ​ជីពចរ​នៅលើ​ ​សរសៃ​ឈាម​ ​Carotid​ ​ដែល​ស្ថិត​នៅ​ផ្នែក​ចំហៀង​ក ​(​រូបភាព​ ​4​a​)​។
​-​ ​កុំ​ចំណាយ​ពេល​យូរ​ក្នុង​ការ​ស្វែងរក​ជីពចរ​។​
​-​ ​ពិនិត្យ​មិន​ឱ្យ​លើ​ស ​១០​ ​វិនាទី​។​
​-​ ​ប្រសិនបើ​អ្នក​មិន​ប្រាកដ​ថា​មាន​ជីពចរ ​ឬ​អត់​ទេ ​សូម​ចាប់ផ្តើម​ធ្វើ​ ​CPR​ ​ភ្លាម​ៗ ​ដោយ​ធ្វើ​ ​សង្កត់​ទ្រូង​ ​៣០​ ​ដង​ ​បន្ទាប់មក​ផ្តល់​ដង្ហើម​សង្គ្រោះ​ ​២​ ​ដង​។​
​
​2. ​ដាក់​បាត​ដៃ​លើ​ឆ្អឹង​ទ្រូង​ ​៖​ ​ប្រើ ​បាត​ដៃ​ម្ខាង​ ​ដាក់​លើ​ ​ពាក់កណ្តាល​ផ្នែក​ខាងក្រោម​នៃ​ឆ្អឹង​ទ្រូង​ ​(​Sternum​) ​ដែល​ស្ថិត​នៅ​កណ្តាល​ទ្រូង​ ​(​រូបភាព​ ​4​b​)​។​

​3. ​ដាក់​ដៃ​ម្ខាង​ទៀត​ពីលើ​ ​៖ ​ដាក់​ ​ដៃ​ម្ខាង​ទៀត​ពីលើ​ដៃ​ទី​មួយ​ (​រូបភាព​ ​4​c​)​។​

​4. ​ធ្វើ​ការ​សង្កត់​ទ្រូង​ ​(​Chest​ ​Compression​)
​- ​ត្រង់​ដៃ​ទាំង​ពីរ​។​
-​ ​សង្កត់​ចុះ​ត្រង់​ទៅ​លើ​ទ្រូង​ ​(​រូបភាព​ ​4​c​)​។​
​-​ ​ជម្រៅ​នៃ​ការ​សង្កត់​គួរ​មាន​ ​៥​–​៦​ ​សង់ទីម៉ែត្រ ​(​2​–​2.4​ ​អ៊ីញ​)​។​
​-​ ល្បឿន​គួរតែ​ ​១០០​–​១២០​ ​ដង​ក្នុង​មួយ​នាទី​។​
​
​5. ​អនុញ្ញាតឱ្យ​ទ្រូង​ត្រឡប់មក​សភាព​ដើម​ ៖​ ​បន្ទាប់ពី​សង្កត់​ម្តង​ៗ​ ត្រូវ​ឈប់​សង្កត់​ទាំងស្រុង​ និង​អនុញ្ញាតឱ្យ​ ​ជញ្ជាំង​ទ្រូង​ត្រឡប់មក​ទីតាំង​ធម្មជាតិ​វិញ​ពេញលេញ​។​

​6. ​បើក​ផ្លូវ​ដង្ហើម​ (​Open​ ​the​ ​Airway​) ​៖​ ​បន្ទាប់ពី​សង្កត់​ទ្រូង​ ​៣០​ ​ដង​ ​ត្រូវ​ឈប់​សង្កត់​ ​ហើយ​បើក​ផ្លូវ​ដង្ហើម​ដោយ​វិធី​ ​Head​ ​Tilt​–​Chin​ ​Lift​ ​(​រូបភាព​ ​4​d​ ​និង​ ​4​e​)​។​
ក​.​ ​Head​ ​Tilt​, ​ដាក់​ដៃ​លើ​ថ្ងាស​អ្នកជំងឺ​ ​ហើយ​ផ្អៀង​ក្បាល​ថយ​ក្រោយ​។​
ខ​.​ ​Chin​ ​Lift​, ​ដាក់​ម្រាម​ដៃ​ចង្អុល ​និង​ម្រាម​ដៃ​កណ្តាល​ក្រោម​ឆ្អឹង​ថ្គាម​ក្រោម​ ​ហើយ​លើក​ថ្គាម​ឡើង​។
គ​. ​ប្រសិនបើ​សង្ស័យ​មាន​របួស​ក,​ ​មិន​ត្រូវ​ប្រើ​វិធី​ ​Head​ ​Tilt​–​Chin​ ​Lift​ ​ទេ​។​ ក្នុង​ករណី​នេះ​ ត្រូវ​ប្រើ​វិធី​ ​Jaw​-​Thrust​ ​Maneuver​។
ឃ​.​ ​Jaw​-​Thrust​ ​Maneuver​
​-​ ​ចាប់​មុំ​ទាំង​សងខាង​នៃ​ឆ្អឹង​ថ្គាម​ក្រោម​។​
​-​ ​ប្រើ​ដៃ​ទាំង​ពីរ​លើក​ និង​រុញ​ថ្គាម​ទៅ​មុខ​។​
​-​ ​ប្រសិនបើ​បបូរមាត់​បិទ​ជិត​ ​សូម​ប្រើ​មេដៃ​បើក​បបូរមាត់​ក្រោម​ ​(​រូបភាព​ ​4​f​)​។​ ​

​7. ​ផ្តល់​ដង្ហើម​សង្គ្រោះ​ ​(​Rescue​ ​Breaths​)
​-​ ​ផ្តល់​ដង្ហើម​ ​១​ ដង ​ខណៈពេល​សង្កេតមើល​ថា​ទ្រូង​លើកឡើង​ឬ​អត់​។​
​-​ ​បន្ទាប់មក​ផ្តល់​ដង្ហើម​ ដង​ទី​២​។​
​-​ ​ដង្ហើម​នីមួយ​ៗ​គួរ​ចំណាយ​ពេល​ប្រហែល​ ​១​ វិនាទី​។​
​
​8.​ ​បន្ត​ការ​សង្កត់​ទ្រូង​ ​៖​ ​បន្ទាប់ពី​ផ្តល់​ដង្ហើម​ ​២​ ​ដង​ ​ត្រូវ​បន្ត​ការ​សង្កត់​ទ្រូង​វិញ​ភ្លាម​ៗ​។
​-​ ​ប្ដូរ​រវាង​ ​ការ​សង្កត់​ទ្រូង​ ​៣០​ ​ដង​ ​និង​ ការ​ផ្តល់​ដង្ហើម​ ​២​ ដង​ ​ឱ្យ​បាន​លឿន​។​
​-​ ​គោលបំណង​គឺ​ ​កាត់បន្ថយ​ការ​ផ្អាក​ការ​សង្កត់​ទ្រូង​ឱ្យ​មាន​រយៈពេល​ខ្លី​បំផុត​ ​ដើម្បី​រក្សា​លំហូរ​ឈាម​ទៅ​កាន់​ខួរក្បាល​ ​និង​សរីរាង្គ​សំខាន់​ៗ​។​

​សារ​អប់រំ​បន្ថែម​៖ ​នៅពេល​ជួបប្រទះ​ករណី​អាសន្ន ​ជំហាន​ដំបូង​គេ​បង្អស់​គឺ​ត្រូវ​ ​ហៅទូរស័ព្ទ​ទៅ​លេខ​សង្គ្រោះ​បន្ទាន់​ ​(​119​) ​ឬ​ស្រែក​រក​ជំនួយ​ពី​មនុស្ស​ជុំវិញ​ខ្លួន​ជាមុន​សិន ​មុននឹង​ចាប់ផ្តើម​ធ្វើ​ ​CPR​ ​ហើយ​ត្រូវ​បន្ត​ធ្វើ​ ​CPR​ រហូតដល់​ក្រុម​គ្រូពេទ្យ​សង្គ្រោះ​មកដល់​ ​ឬ​រហូតដល់​អ្នកជំងឺ​មាន​ចលនា​ដង្ហើម​ឡើងវិញ​៕