ទុនវិនិយោគក្នុងវិស័យកសិកម្មបានកើនពី ១០០លានដុល្លារដល់ ៤០០លានដុល្លារ រយៈពេលមួយឆ្នាំ

ក្រសួងកសិកម្មបានលើកទឹកចិត្តឱ្យមានផ្លាស់ប្តូរទស្សនៈដែលថា «ធ្វើកសិកម្មមិនចំណេញ» ដោយជំរុញការផលិតក្នុងស្រុកឱ្យកាន់តែខ្លាំង និងមានប្រសិទ្ធភាព ដើម្បីឆ្លើយតបតម្រូវការទីផ្សារក្នុងប្រទេស កាត់បន្ថយការពឹងផ្អែកលើការនាំចូល ព្រមទាំងបង្កើនសមត្ថភាពប្រកួតប្រជែង និងឈានទៅពង្រីកការនាំចេញផលិតផលកសិកម្មកម្ពុជាទៅកាន់ទីផ្សារអន្តរជាតិ។ ក្រសួងអះអាងថា ទុនវិនិយោគក្នុងវិស័យកសិកម្មបានកើនពី ១០០លានដុល្លារដល់ ៤០០លានដុល្លារ រយៈពេលមួយឆ្នាំ។

ទំហំទុនវិនិយោគក្នុងវិស័យកសិកម្មបានកើនឡើងយ៉ាងគំហុក ពីជាង១០០លានដុល្លារ ក្នុងឆ្នាំ២០២៤ ដល់ជាង ៤០០លានដុល្លារ ក្នុងឆ្នាំ២០២៥ ។ កំណើននេះ ជាសញ្ញាបង្ហាញពីការចាប់អារម្មណ៍កាន់តែខ្លាំងរបស់អ្នកវិនិយោគ ចំពោះវិស័យកសិកម្ម ។ នេះជាការគូសបញ្ជាក់ពីឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១ ខែតុលា ឆ្នាំ២០២៦ ។

ឯកឧត្តម ប្រាក់ ដាវីដ បានថ្លែងថា កន្លងមក វិស័យកសិកម្ម ត្រូវបានគេមើលឃើញថា ជាវិស័យដែលមានហានិភ័យខ្ពស់ និងត្រូវការរយៈពេលវែង ដើម្បីទទួលបានផលចំណេញ ។ កត្តានេះ បានធ្វើឱ្យអ្នកមានទុនមួយចំនួន មានការស្ទាក់ស្ទើរក្នុងការវិនិយោគ ដោយសារបារម្ភពីហានិភ័យ និងការខាតបង់ដែលអាចកើតមាន ។

ចំណែកឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើងថា វិស័យកសិកម្ម បានឈានទៅរបត់ផ្លាស់ប្តូរ ខណៈវិស័យនេះ ក៏កំពុងមានការអភិវឌ្ឍ និងឱកាសវិនិយោគជាច្រើន។ ឯកឧត្តមបញ្ជាក់ថា តាមរយៈកំណើនទំហំទុនវិនិយោគ ជាពិសេសក្នុងរយៈពេលចុងក្រោយនេះបង្ហាញថា វិស័យកសិកម្មកំពុងទទួលបានការចាប់អារម្មណ៍កាន់តែខ្លាំងពីអ្នកវិនិយោគ ។

ទន្ទឹមនេះ ឯកឧត្តមអនុរដ្ឋលេខាធិការ ក៏បានលើកឡើងពីយន្តការជំរុញការវិនិយោគក្នុងវិស័យកសិកម្ម រួមមាន៖ ការផ្តល់ការធានាឥណទានតាមរយៈសាជីវកម្មធានាឥណទានកម្ពុជា (CGCC) ដែលអាចជួយឱ្យអ្នកវិនិយោគ និងកសិករមានលទ្ធភាពទទួលបានហិរញ្ញប្បទាន ដោយកាត់បន្ថយការពឹងផ្អែកលើទ្រព្យធានា ។ ការផ្តល់ការធានារ៉ាប់រងលើកសិកម្ម និងការធ្វើកសិកម្មតាមកិច្ចសន្យា បានជួយធានាទីផ្សារ តម្លៃផលិតផល និងកាត់បន្ថយហានិភ័យរវាងអ្នកផលិត និងអ្នកទិញ ។

ជាមួយនេះ ក្រសួងកសិកម្មបានជួយបង្កើតសហគមន៍កសិកម្មទំនើប ព្រមទាំងរៀបចំប្រព័ន្ធអេកូឡូស៊ី ដែលគាំទ្រពេញលេញ គឺចាប់តាំងពីពូជ ធាតុចូលកសិកម្ម រហូតដល់ការដឹកជញ្ជូន។ ការផ្លាស់ប្តូរពីការធ្វើកសិកម្មបែបគ្រួសារ ទៅជាកសិកម្មបែបពាណិជ្ជកម្ម ក៏ជាកត្តាសំខាន់មួយទៀត ដោយផលិតកម្មកាន់តែមានការភ្ជាប់ជាមួយការកែច្នៃ ការវេចខ្ចប់ និងការនាំចេញទៅកាន់ទីផ្សារអន្តរជាតិ ។

យោងតាមរបាយការណ៍ក្រសួងកសិកម្ម ក្នុងឆ្នាំ២០២៥ កម្ពុជារកចំណូលបានប្រមាណ ៦,៤៦ពាន់លានដុល្លារ ពីការនាំចេញផលិតផលកសិកម្មគ្រប់អនុវិស័យ ។ ចំណូលនេះបានកើនឡើង ៧,៣ភាគរយ ធៀបនឹងឆ្នាំ២០២៤ ដែលសម្រេចបាន ៦,០២ ពាន់លានដុល្លារ ៕