សមាគមអ្នកចិញ្ចឹមសត្វត្រចៀកកាំកម្ពុជា មិនគាំទ្រការសាងសង់ផ្ទះត្រចៀកកាំដែលមានទំហំតូចពេកនោះទេ ដោយសារអាចប៉ះពាល់ដល់ស្តង់ដារ និងគុណភាពសំបុក។ ទោះជាយ៉ាងណា អ្នកចិញ្ចឹមត្រចៀកកាំនៅកម្ពុជានៅតែអាចរកប្រាក់ចំណេញបាន ប្រសិនបើអនុវត្តតាមបច្ចេកទេស និងស្តង់ដារត្រឹមត្រូវ ខណៈទីផ្សារបច្ចុប្បន្នកំពុងមានស្ថានភាពល្អប្រសើរ។
 
បច្ចុប្បន្ន ការចិញ្ចឹមត្រចៀកកាំនៅកម្ពុជាមានចន្លោះពី ៥ ០០០ ទៅ ៧ ០០០ ខ្នងអគារ ដែលអាចផលិតទឹកមាត់ត្រចៀកកាំបានប្រមាណ ១០០ តោនក្នុងមួយឆ្នាំ។ ក្នុងចំណោមនេះ មានផ្ទះត្រចៀកកាំជិត ១​ ០០០ កន្លែង បានចុះបញ្ជីជាមួយក្រសួងកសិកម្ម រុក្ខាប្រមាញ់ និងនេសាទ។
 
លោក ស៊ុយ កុកធាន ប្រធានសមាគមអ្នកចិញ្ចឹមសត្វត្រចៀកកាំកម្ពុជា បានបញ្ជាក់ថា ផ្ទះត្រចៀកកាំដែលមានទំហំតូចបំផុត គួរមានប្រវែងទទឹង ៨ គុណ ១៦ ម៉ែត្រ ដែលត្រូវការទុនវិនិយោគប្រមាណ ៥ ម៉ឺនដុល្លារ។ ទំហំបែបនេះអាចផ្តល់លំហគ្រប់គ្រាន់សម្រាប់សត្វត្រចៀកកាំហោះហើរ ចូលស្នាក់នៅ និងបង្កើតសំបុកបានសមស្រប។
 
លោកបានបន្តថា ផ្ទះដែលមានទំហំតូចជាងនេះ អាចបង្កផលប៉ះពាល់ដល់ការរស់នៅ និងការបង្កើតសំបុករបស់សត្វត្រចៀកកាំ។ ចំណែកផ្ទះទំហំមធ្យម អាចមានប្រវែងប្រមាណ ១០ គុណ ២០ ម៉ែត្រ ឬ ១០ គុណ ២៤ ម៉ែត្រ និងមានកម្ពស់ពី ២ ទៅ ៣ ជាន់ ដែលលោកចាត់ទុកថា ជាទំហំសមស្រប ដោយមិនចាំបាច់សាងសង់ធំពេក ធ្វើឱ្យចំណាយដើមទុនច្រើនឡើយ។
 
ពាក់ព័ន្ធនឹងប្រាក់ចំណូល លោក ស៊ុយ កុកធាន បានឱ្យដឹងថា ប្រសិនបើអ្នកចិញ្ចឹមអាចជ្រើសរើសទីតាំងបានល្អ និងប្រើប្រាស់បច្ចេកទេសបានត្រឹមត្រូវ ផ្ទះត្រចៀកកាំអាចបង្កើតចំណូលគួរសមសម្រាប់ទ្រទ្រង់ជីវភាពគ្រួសារ។
  
យោងតាមលោកប្រធានសមាគម​ សំបុកត្រចៀកកាំរបស់កម្ពុជាត្រូវបានចាត់ទុកថា មានគុណភាពខ្ពស់ ដោយសារបរិស្ថានធម្មជាតិរបស់កម្ពុជានៅតំបន់មួយចំនួននៅមានភាពស្អាត និងសមស្របសម្រាប់ការចិញ្ចឹមត្រចៀកកាំ។
 
ក្នុងន័យនេះ លោក ស៊ុយ កុកធាន បានអំពាវនាវដល់ប្រជាពលរដ្ឋដែលមានបំណងសាងសង់ផ្ទះត្រចៀកកាំ ឱ្យសិក្សាឱ្យបានច្បាស់លាស់អំពីបច្ចេកទេសសាងសង់ ទីតាំង និងឧបករណ៍បច្ចេកទេស មុនពេលវិនិយោគ ព្រោះការរៀបចំបានត្រឹមត្រូវអាចជួយកាត់បន្ថយហានិភ័យនៃការខាតបង់ និងបង្កើនឱកាសទទួលបានប្រាក់ចំណេញ។
 
សូមបញ្ជាក់ថា ផ្ទះត្រចៀកកាំភាគច្រើនសាងសង់នៅខេត្តជាប់មាត់សមុទ្រ ដូចជាកំពត និងកោះកុង ហើយក៏ចាប់ផ្តើមមាននៅតំបន់ភូមិភាគកណ្ដាលច្រើនផងដែរ ពិសេសខេត្តជុំវិញបឹងទន្លេសាប ព្រមទាំងខេត្តស្ទឹងត្រែង និងព្រះវិហារជាដើម៕ ​
 
ដោយ៖ម៉ាដេប៉ូ