ភ្នំពេញ៖គណៈរដ្ឋមន្ត្រីកម្ពុជា នៅថ្ងៃចន្ទទី១៦ ខែមីនានេះ បាន បញ្ជូនសេចក្តីព្រាងច្បាប់ ស្តីពី ការប្រឆាំង ការឆបោក តាម ប្រព័ន្ធបច្ចេកវិទ្យាទៅកាន់ រដ្ឋសភា ដើម្បីពិនិត្យ និងអនុម័ត។
កាលពីថ្ងៃសុក្រសប្តាហ៍មុន គណៈរដ្ឋមន្ត្រី បានអនុម័ត សេចក្តីព្រាងច្បាប់ ដ៏មានសារសំខាន់នេះ ដែលជាផ្នែកមួយ នៃ ការតាំងចិត្ត ក្នុងការបោសសម្អាត បទឧក្រិដ្ឋដ៏ចម្រូងចម្រាស់នេះ ឳ្យអស់នៅត្រឹមខែមេសា ឆ្នាំ ២០២៦។
ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជាបានប្រាប់បណ្ដាញព័ត៌មាន AMS ថាសេចក្តីព្រាងច្បាប់ស្តីពីការប្រឆាំងការឆបោ ក តាមប្រព័ន្ធបច្ចេកវិទ្យាបានបញ្ជូនទៅរដ្ឋសភាពិនិត្យ និងអនុម័ត បន្ទាប់គណៈរដ្ឋមន្រ្តីបានសម្រេច និងអនុម័តកាលពីថ្ងៃសុក្រសប្ដាហ៍មុន។
យោងតាមសេចក្តីព្រាងច្បាប់ ជនដែលមានកំហុសអាចប្រឈមនឹងការជាប់ពន្ធនាគារពី ៥ ទៅ ១០ ឆ្នាំ រួមជាមួយការផាកពិន័យជាប្រាក់ចាប់ពី ៥០០ លាន ទៅ ១ ប៊ីលានរៀល (ប្រហែល ១២ម៉ឺន ៥,០០០ ទៅ ២៥ម៉ឺនដុល្លារ)។
ប្រសិនបើបទល្មើសមានពាក់ព័ន្ធនឹងការជួញដូរមនុស្ស អំពើហិង្សា ការឃុំខ្លួន ឬការបង្ខាំងទុក ការដាក់ទោសពន្ធនាគារអាចកើនឡើងដល់ ១០ ទៅ ២០ ឆ្នាំ និងពិន័យជាប្រាក់រហូតប្រមាណ ៥០ម៉ឺន ដុល្លារ
ហើយក្នុងករណីដែលមានការស្លាប់ពាក់ព័ន្ធនឹងសកម្មភាពនៅមជ្ឈមណ្ឌលឆបោក ជនល្មើសអាចប្រឈមនឹងការជាប់ពន្ធនាគារពី ១៥ ទៅ ៣០ ឆ្នាំ ឬជាប់ពន្ធនាគារអស់មួយជីវិត។
 
សេចក្តីព្រាងច្បាប់នេះ នៅតែត្រូវការការអនុម័តពីសភាជាតិកម្ពុជា មុនពេលក្លាយជាច្បាប់ជាធរមាន។
អ្នកនាំពាក្យរដ្ឋសភា មិនទាន់ឆ្លើយតបសំណួររបស់ AMS នៅឡើយ រហូតមកទល់នឹង ល្ងាចថ្ងៃចន្ទនេះ។
 
ចាប់តាំងពីខែកក្កដាមក រដ្ឋាភិបាលបានស៊ើបអង្កេតទីតាំងដែលសង្ស័យថាជាកន្លែងឆបោកប្រហែល ២៥០ កន្លែង និងបានបិទចោលប្រហែល ២០០ កន្លែង។
ប្រទេសកម្ពុជាបានធ្វើមាតុភូមិនិវត្តន៍កម្មករជិត ១ម៉ឺននាក់ មកពីប្រទេសចំនួន ២៣ ពីទីតាំងឆបោកនានា ខណៈដែលបុគ្គលតិចជាង ១,០០០ នាក់ទៀតកំពុងរង់ចាំការត្រឡប់ទៅប្រទេសកំណើតវិញ។
 
ជនរងគ្រោះជាច្រើនផ្សេងទៀត បានព្យាយាមរត់គេចខ្លួនដោយខ្លួនឯង ឬត្រូវបានដោះលែងក្នុងអំឡុងពេលប៉ូលីសចុះឆ្មក់បង្ក្រាបទីតាំងទាំងនោះ៕
ដោយ៖សេង បារាំង