មូស្គូ ៖ «រុស្ស៊ីជាប្រទេសតែមួយគត់ នៅលើពិភពលោកដែលមានជំនាញគ្រប់ជ្រុងជ្រោយ ក្នុងវិស័យថាមពលនុយក្លេអ៊ែរទាំងមូល» នេះគឺជាការគូសបញ្ជាក់របស់ លោកប្រធានាធិបតី វ្ល៉ាឌីមៀ ពូទីន កាលពីថ្ងៃសុក្រ។

បើតាម Tass, ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងដូច្នេះ នៅក្នុងកិច្ចប្រជុំមួយស្តីពីថាមពលនុយក្លេអ៊ែរ។

មេដឹកនាំវិមានក្រឹមឡាំងរូបនេះបានអះអាងថា រុស្ស៊ីគឺជាប្រទេសតែមួយគត់នៅក្នុងពិភពលោក ដែលមានជំនាញ និង សមត្ថភាពគ្រប់ជ្រុងជ្រោយ នៅក្នុងវិស័យថាមពលនុយក្លេអ៊ែរទាំងមូល។

លោកបានមានប្រសាសន៍ថា «អាចនិយាយបានថា រុស្ស៊ីគឺជាប្រទេសតែមួយគត់នៅក្នុងពិភពលោកដែលមានសមត្ថភាពគ្របដណ្តប់លើខ្សែសង្វាក់ទាំងមូលនៃវិស័យថាមពលនុយក្លេអ៊ែរ ហើយ ក៏រក្សាបាននូវស្តង់ដារខ្ពស់ជាប្រពៃណីទាំងផ្នែកសុវត្ថិភាព និងភាពជឿជាក់នៃប្រតិបត្តិការ នៅតាមរោងចក្រថាមពលរបស់ខ្លួនផងដែរ»។

ប្រធានាធិបតី វ្ល៉ាឌីមៀ ពូទីន បានសង្កត់ធ្ងន់ថា គុណសម្បត្តិប្រកួតប្រជែងទាំងនេះអនុញ្ញាតឱ្យប្រទេសរុស្ស៊ីកាន់កាប់តួនាទីនាំមុខគេ នៅក្នុងទីផ្សារសាងសង់រោងចក្រថាមពលនុយក្លេអ៊ែរ នៅបរទេស៕

ប្រភព ៖ Tass ប្រែសម្រួល ៖ សារ៉ាត