តេហេរ៉ង់ ៖ ទីបញ្ជាការយោធាដ៏សំខាន់របស់អ៊ីរ៉ង់ Khatam al-Anbiya បានព្រមានធ្ងន់ៗកាលពីថ្ងៃ ព្រហស្បតិ៍ ថា គ្មាននាវាពាណិជ្ជកម្ម ឬនាវាដឹកប្រេងណាមួយ អាចឆ្លងកាត់ច្រកសមុទ្រ Hormuz ដោយសុវត្ថិភាព ដោយគ្មានការអនុញ្ញាត និងការត្រួតពិនិត្យពីកងកម្លាំងប្រដាប់អាវុធអ៊ីរ៉ង់បានឡើយ ។

អ្នកនាំពាក្យទីបញ្ជាការយោធា Khatam al-Anbiya លោក Ebrahim Zolfaghari និយាយថា ដូចកាលពីពេលមុនដែរ ច្រកសមុទ្រ Hormuz គឺស្ថិតនៅក្រោមការគ្រប់គ្រង និងការចាត់ចែងយ៉ាងពេញលេញរបស់អ៊ីរ៉ង់ ។

ជាមួយគ្នានេះ លោកបានច្រានចោលការអះអាងរបស់អាមេរិក ដែលថា នាវាទាំងអស់អាចឆ្លងកាត់ជាធម្មតាតាមច្រកសមុទ្រ Hormuz គឺជារឿងមិនពិត និងគ្មានអ្វីក្រៅពីការភូតកុហកឡើយ ។

លោកបន្តថា ការអះអាងមិនពិតរបស់អាមេរិក បានបង្ហាញពីភាពអស់សង្ឃឹម និងភាពទាល់ច្រកនៃកងទ័ពរបស់ពួកគេ ដោយលោកបានសង្កត់ធ្ងន់ថា មេដឹកនាំ និងកងទ័ពអាមេរិកបានស្គាល់ច្បាស់រួចហើយ ពីអំណាច និងការតស៊ូរបស់កងកម្លាំងប្រដាប់អាវុធអ៊ីរ៉ង់ ។

ការអះអាងនេះ ធ្វើឡើងបន្ទាប់ពីប្រធានាធិបតីអាមេរិក លោក Donald Trump បានអះអាងលើបណ្តាញសង្គមថា សហរដ្ឋអាមេរិកបានគ្រប់គ្រងទាំងស្រុងលើច្រកសមុទ្រ Hormuz ហើយ ។

យ៉ាងណា អ្នកនាំពាក្យទីបញ្ជាការយោធាអ៊ីរ៉ង់ បានសង្កត់ធ្ងន់ថា កងកម្លាំងប្រដាប់អាវុធអ៊ីរ៉ង់កំពុងតាមដានរាល់សកម្មភាពនានារបស់អាមេរិក និងអ៊ីស្រាអែលនៅក្នុងតំបន់ ហើយក៏មិនស្ទាក់ស្ទើរការពារសិទ្ធិប្រជាជន ក៏ដូចជាអធិបតេយ្យភាពជាតិ និងបំណងប្រថ្នារបស់ប្រទេសអ៊ីរ៉ង់ ជាពិសេសត្រៀមខ្លួនឆ្លើយតបទៅនឹងការគំរាមកំហែងណាមួយ ៕

ប្រភព ៖ ស៊ីនហួរ ប្រែសម្រួល ៖ ឈឹម ទីណា