ហ្ស៊េរុយសាឡិម ៖ លោក Netanyahu នាយករដ្ឋមន្ត្រីអ៊ីស្រាអែល បាន ធ្វើដំណើរទៅកាន់សហរដ្ឋអាមេរិក ដើម្បីជួបលោកប្រធានាធិបតី Donald Trump នៅឯសេតវិមាន នាថ្ងៃអង្គារនេះ ខណៈដែលវាគឺជាជំនួបលើកដំបូង ចាប់តាំងពីមានសង្គ្រាមជាមួយអ៊ីរ៉ង់។

លោក Netanyahu បានមានប្រសាសន៍ មុនពេលចាកចេញពីប្រទេសអ៊ីស្រាអែល កាលពីថ្ងៃចន្ទថា «នេះគឺជាកិត្តិយសដ៏ធំធេង ប៉ុន្តែ ក៏ជាការទទួលខុសត្រូវដ៏ធំធេងផងដែរ»។

លោកបានបន្ថែមថា«យើងនឹងពិភាក្សាលើរាល់បញ្ហាទាំងអស់ ដែលមាននៅក្នុងរបៀបវារៈ ជាពិសេស គឺបញ្ហាអ៊ីរ៉ង់។ ជាការពិតណាស់ គោលដៅរបស់យើងគឺការពារសន្តិសុខរបស់យើង និងពង្រីកវិសាលភាពនៃសន្តិភាព នៅជុំវិញយើង»។

បើតាម AFP, ទំនាក់ទំនងរវាងលោក Netanyahu និងលោក Trump ហាក់ដូចជាមានភាពតានតឹងខ្លះៗ ក្នុងរយៈពេលប៉ុន្មានខែ ថ្មីៗនេះ ប៉ុន្តែ មេដឹកនាំទាំងពីរបានព្យាយាមកាត់បន្ថយភាពតានតឹងនោះ។

ជំនួបនៅថ្ងៃអង្គារនេះ ត្រូវបានគេរំពឹងថា នឹងផ្តោតសំខាន់លើបញ្ហាសង្គ្រាម ដែលបានចាប់ផ្តើមឡើង ជាមួយនឹងការវាយប្រហាររបស់សហរដ្ឋអាមេរិក និងអ៊ីស្រាអែល ទៅលើអ៊ីរ៉ង់ កាលពីចុងខែកុម្ភៈ ខណៈដែលទីក្រុងវ៉ាស៊ីនតោនបានលើកឡើងថា ខ្លួនចង់ផ្តល់ឱកាសសម្រាប់ការចរចា។

អ៊ីស្រាអែលមិនបានចូលរួមក្នុងជុំចុងក្រោយនៃការប៉ះទង្គិចគ្នា រវាងសហរដ្ឋអាមេរិក និងអ៊ីរ៉ង់នោះទេ ដែលបានផ្ទុះឡើងវិញ នៅដើមខែនេះ ពោលគឺបន្ទាប់ពីកិច្ចព្រមព្រៀងបទឈប់បាញ់ កាលពីខែមេសា បានបរាជ័យ។

ជំនួបនៅថ្ងៃអង្គារនេះ នឹងក្លាយជាជំនួបលើកទី៨ រវាងមេដឹកនាំទាំងពីរ ចាប់តាំងពីលោក Trump បានត្រឡប់មកកាន់តំណែងវិញ កាលពីឆ្នាំមុន ហើយក៏ជាជំនួបដោយផ្ទាល់លើកដំបូងរបស់ពួកលោកផងដែរ ចាប់តាំងពីសង្គ្រាមបានចាប់ផ្តើម៕

ប្រភព ៖ AFP ប្រែសម្រួល ៖ សារ៉ាត