សារមន្ទីរសិល្បៈមេត្រូប៉ូលីតាន ព្រមប្រគល់វត្ថុបុរាណ ២ ទៀត មកឱ្យកម្ពុជា ក្រោយចរចាអស់ជាច្រើនឆ្នាំ

ក្រោយឃ្លាតចាកពីមាតុប្រទេសអស់ពេលដ៏យូរ ពេលនេះវត្ថុបុរាណចំនួន ២ រូប ដែលអ្នកជំនាញអះអាងថាមានប្រភពដើមពីប្រាសាទចិន ក្នុងតំបន់កោះកេរ ត្រូវបានប្រគល់មកម្ចាស់ដើមវិញពោលគឺប្រទេសកម្ពុជា។

វត្ថុបុរាណទាំង ២ រួមមាន ៖ (១) ផ្ដែរធ្វើពីថ្មភក់ មានចម្លាក់រូបរាហូ (ព្រះកាល) សម័យមុនអង្គរ ចន្លោះសតវត្សរ៍ ទី៧ ឬទី៨។ (២) បដិមាធ្វើពីថ្មភក់ (អាចសម្គាល់ជារូបអសុរ ហិរណ្យកសិពុ) សម័យអង្គរ សតវត្សទី១០ មានប្រភពដើមមកពីប្រាសាទចិន ក្នុងតំបន់កោះកេរ។

តាមការជូនដំណឹងលើផេកផ្លូវការក្រសួងវប្បធម៌និងវិចិត្រសិល្បៈបានឱ្យដឹងថា ពិធីប្រគល់-ទទួល ជាផ្លូវការវត្ថុបុរាណទាំង២ ធ្វើនៅការិយាល័យរដ្ឋអាជ្ញាប្រចាំសង្កាត់ម៉ាន់ហាតាន ទីក្រុងញូវយ៉ក នាថ្ងៃ ១០ ខែមិថុនា ឆ្នាំ ២០២៦។

ទាក់ទិនវត្ថុបុរាណទាំង២ខាងលើ អង្គភាពប្រឆាំងការជួញដូរវត្ថុបុរាណ នៃការិយាល័យរដ្ឋអាជ្ញាប្រចាំសង្កាត់ម៉ានហាតាន បានផ្ដល់ភស្តុតាងទៅសារមន្ទីរសិល្បៈមេត្រូប៉ូលីតាន ដោយបញ្ជាក់ថា វត្ថុបុរាណទាំង២ ពាក់ព័ន្ធនឹងបណ្ដាញជួញដូររបស់អ្នកស្រី Nancy Wiener។ ក្រោយពិនិត្យយ៉ាងត្រឹមត្រូវលើឯកសារ សារមន្ទីរមេត្រូប៊ូលីតាន បានយល់ព្រមក្នុងការប្រគល់ត្រឡប់វត្ថុបុរាណទាំង២មកកម្ពុជាវិញ តាមការស្នើរបស់ ការិយាល័យរដ្ឋអាជ្ញាប្រចាំសង្កាត់ម៉ាន់ហាតាន។

គួរបញ្ជាក់ដែរថា កាលពីខែធ្នូ ឆ្នាំ ២០២៣ សារមន្ទីរសិល្បៈមេត្រូប៉ូលីតាន បានប្រគល់វត្ថុបុរាណចំនួន ១៤ រូប ជូនមកប្រទេសកម្ពុជាវិញ ក្រោយកិច្ចចរចាអស់រយៈពេលជាច្រើនឆ្នាំ៕

រូបភាព ៖ ក្រសួងវប្បធម៌ និងវិចិត្រសិល្បៈ

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។