កម្មវិធីសំពះគ្រូ ដែលរៀបចំឡើងរាល់ឆ្នាំមានអត្ថន័យធំធេងខ្លាំង

សិស្សរបាំច្រើនខេត្តក្រុងបានមករាជធានីភ្នំពេញ ដើម្បីរៀបចំកម្មវិធីគ្រូល្ខោនប្រចាំឆ្នាំ២០២៦ ក្រោមប្រធានបទ «មោទកភាពគ្រូ» រៀបចំដោយក្រុមសិល្បៈយុវជនល្ខោនខោល និងរបាំបុរាណជំនាន់ថ្មី ដោយមានការចូលរួមច្រើនប្រមាណ ១ ពាន់នាក់។

នាដក ហង់ ភូមិរ៉ា (យាយកន្តែរ៉ែ) បច្ចុប្បន្នជាគ្រូរបាំបុរាណម្នាក់ បានផ្ដល់សម្ភាសន៍មកដល់ AMS នាកម្មវិធីកាលពីថ្ងៃ ៥ កញ្ញា ឆ្នាំ ២០២៦ ថា ឆ្នាំនេះគឺជាឆ្នាំទី ១០ ហើយដែលបានរៀបចំកម្មវិធីសំពេះគ្រូ។

យាយកន្តែរ៉ែ បានបន្ថែមទៀតថា ពិធីនេះរៀបចំឡើងក្នុងគោលបំណងបួងសួងសុំសេចក្តីសុខសាន្ត ព្រមទាំងរំលឹកដល់គុណូបការៈដ៏ធំធេងរបស់គ្រូឧបជ្ឈាយ៍ ដែលបានខិតខំបង្រៀន និងតម្រង់ទិសដៅដល់អ្នកជំនាន់ក្រោយ។ សកម្មភាពនេះ ក៏ជាការរួមចំណែកដ៏មានតម្លៃក្នុងការថែរក្សាទំនៀមទម្លាប់ និងប្រពៃណីនៃពិធីសំពះគ្រូល្ខោនរបស់អ្នកសិល្បៈ ដែលមានតាំងពីយូរណាស់មកហើយ ដើម្បីធានាថាស្មារតី និងកេរដំណែលសិល្បៈខ្មែរនៅតែបន្តគង់វង្ស។

កម្មវិធីពេញមួយថ្ងៃដែលក្រុមសិល្បៈយុវជនល្ខោនខោល និងរបាំបុរាណជំនាន់ថ្មី មិនបានធ្វើឲ្យសិស្សបាត់បង់ការចូលរួមឡើយ ដោយកម្មវិធីនៅពេលថ្ងៃមានទស្សនីយភាពជាច្រើននៃការសម្ដែងរបាំប្រពៃណីច្រើនទម្រង់។

ក្នុងនោះមិនមែនមានតែក្រុមសិល្បៈយុវជនល្ខោនខោល និងរបាំបុរាណជំនាន់ថ្មីប៉ុណ្ណោះទេ ទស្សនិកជនដែលជាអ្នកស្រុកភូមិចាស់ៗ និងព្រះសង្ឃក៏បានយាងមក ទស្សនាផ្ទាល់ផងដែរ ព្រោះជាវេលាកម្រដែលអាចមើលការសម្ដែងផ្ទាល់ពីសំណាក់សិល្បករបុរាណរាប់រយនាក់ បែបនេះឡើយ៕