យុវជននៅក្នុងប្រទេសចិនកំពុងចាត់ទុកការងារជាអ្នកដឹកជញ្ជូនអាហារ ជាទម្រង់នៃការណាត់ជួបជាមួយដៃគូ ដែលអាចចំណាយពេលជាមួយគ្នា កាត់បន្ថយភាពហត់នឿយ តានតឹង និងបានកម្រៃក្នុងគ្រាតែមួយ។ នេះបើផ្អែកតាមការចុះផ្សាយរបស់ South China Morning Post កាលពីថ្ងៃទី៣០ ខែមីនា កន្លងទៅ។

ផ្លាស់ប្ដូរពីការណាត់ជួបសង្សារក្នុងទម្រង់ដើម ដែលត្រូវចំណាយប្រាក់ច្រើន យុវជនរស់នៅក្នុងទីក្រុងនានាឯប្រទេសចិន បានចាប់យកនិន្នាការ “City Work” ជាណាត់ជួបគូស្នេហ៍ថ្មីប្លែក បង្កើនភាពផ្អែមល្ហែមពេលល្ងាច ដោយជិះកង់អគ្គិសនីដឹកអាហារជូនភ្ញៀវ។

មនុស្សជាច្រើនបាននិយាយថា វិធីសាស្ត្រប្រកបដោយភាពច្នៃប្រឌិតនេះ គឺជាការសម្រាករាងកាយពីភាពហត់នឿយនឹងការងារពេញមួយថ្ងៃ ព្រោះការងារនេះត្រូវការប្រើកម្លាំងតិច ជួយកាត់បន្ថយភាពតានតឹង និងអាចរកចំណូលបន្ថែមបន្តិចបន្តួច ជំនួសដោយការចំណាយពេលប្រើប្រាស់ទូរស័ព្ទឥតប្រយោជន៍នៅពេលល្ងាច។

ទម្រង់ការណាត់ជួបបែបថ្មីនេះ ជាទូទៅ​ ដៃគូម្នាក់ជាអ្នកបើកបរម៉ូតូ ស្របពេលដែលម្នាក់ទៀតទទួលបន្ទុកទទួល និងយកអាហារជូនភ្ញៀវ។ សកម្មភាពនេះ បានកែប្រែការងារឱ្យទៅជាពេលវេលារីករាយជាមួយគ្នា និងជួយធ្វើឱ្យចំណងទំនាក់ទំនងកាន់តែរឹងមាំមួយកម្រិតទៀត។

និន្នាការនេះមិនត្រឹមតែជួយឱ្យគូស្នេហ៍អាចកាត់បន្ថយការចំណាយពីការណាត់ជួបគ្នាក្នុងទម្រង់ដើម ដែលជាធម្មតានិយមណាត់ជួបគ្នាញ៉ាំអាហារក្នុងភោជនីយដ្ឋានថ្លៃៗប៉ុណ្ណោះទេ ប៉ុន្តែថែមទាំងផ្តល់ឱកាសក្នុងការរកប្រាក់ចំណូលបន្ថែមរួមគ្នាផងដែរ។

ជាឧទាហរណ៍ ស្ត្រីម្នាក់មកពីទីក្រុង Zhengzhou ខេត្ត Henan ភាគកណ្តាលនៃប្រទេសចិន បានចាប់ផ្ដើមធ្វើជាអ្នកដឹកជញ្ជូនអាហារជាមួយនឹងគូស្នេហ៍តាំងតែពីខែកក្កដា ឆ្នាំ ២០២៥ កន្លងទៅ។ ជាទូទៅ គូស្នេហ៍មួយគូនេះចំណាយពេលប្រហែលពីរម៉ោងក្នុងមួយល្ងាច ទទួលការបញ្ជាទិញចំនួន ៥ ទៅ ៦ភ្ញៀវ ដែលអាចរកចំណូលប្រហែល ៤០ យ៉ន់ ឬប្រមាណ ៦ដុល្លារអាមេរិកជាមធ្យម។ នៅក្នុងមួយខែៗ គូស្នេហ៍នេះអាចរកចំណូលប្រមាណ ១ ០០០ យ័ន ឬល្បាក់ ១៤០ ដុល្លារអាមេរិក។

ស្ត្រីរូបនេះបាននិយាយពីការងារខាងលើថា៖ “វាមិនហត់ទាល់តែសោះ តាមពិតទៅយើងពិតជារីករាយជាមួយវាណាស់។ លុយដែលយើងរកបាន គឺទុកសម្រាប់ដើរលេងជុំគ្នា”។

គូស្នេហ៍មួយគូទៀតគឺ Ajie និងមិត្តស្រីដែលរស់នៅក្នុងទីក្រុង Guangzhou ខេត្ត Guangdong បានចាត់ទុកការងារដឹកជញ្ជូនអាហារនេះ ជាការរុករកទីក្រុងជុំគ្នា។

Ajie បានចែករំលែកថា៖ “យើងរីករាយនឹងទទួលការបញ្ជាទិញ។ ការធ្វើដំណើរតាមច្រកឌឿងហែម និងផ្លូវតូចៗ បានជួយឱ្យយើងរកឃើញកន្លែងប្លែកៗដែលលាក់ខ្លួន និងបានឃើញទិដ្ឋភាពផ្សេងៗពីជីវិតនាពេលរាត្រីក្នុងទីក្រុង Guangzhou”៕