ជាងថតរូបជនជាតិរុស្ស៊ីម្នាក់ឈ្មោះ Alexandra Kuzyk ត្រូវបានតុលាការកាត់ទោសឱ្យធ្វើពលកម្ម​រយៈពេល ១៨ ខែ បន្ទាប់ពីនាងត្រូវបានចោទប្រកាន់ពីបទផលិតរូបភាពអាសអាភាសខុសច្បាប់ តាមរយៈការសរសេររឿងប្រលោមលោកប្រឌិតបែបបុរសស្រឡាញ់បុរស (Gay Fanfiction) អំពីក្រុមចម្រៀង Stray Kids ។ នេះបើផ្អែកតាមការផ្សាយរបស់សារព័ត៌មាន Novaya Gazeta Europe កាលពីថ្ងៃទី១១ ខែឧសភា។

ករណីនេះបានចាប់ផ្តើមឡើង នៅពេលដែលមានស្ត្រីម្នាក់បានរាយការណ៍ទៅប៉ូលីសថា គាត់បានរកឃើញសាច់រឿងដែលសរសេរដោយ Alexandra នៅក្នុងឧបករណ៍អេឡិចត្រូនិករបស់កូនស្រីមិនទាន់គ្រប់អាយុរបស់គាត់។ ប្រលោមលោកដែលបានបង្ហោះតាមអនឡាញក្នុងឆ្នាំ ២០២២ នោះ បានបង្ហាញពីទំនាក់ទំនងរវាងភេទដូចគ្នា។ អង្គការសុខភាព LGBT ឈ្មោះ Parni+ ក្រោយមកបានបញ្ជាក់ថា វាគឺជាសាច់រឿងប្រឌិតដោយអ្នកគាំទ្រ (Fanfiction) អំពីក្រុម Stray Kids ។

កញ្ញា Kuzyk បានទទួលស្គាល់កំហុសទាំងស្រុង ហើយបានប្រាប់តុលាការថា ការសរសេររឿងប្រឌិតបែបនេះ គឺជាចំណូលចិត្តរបស់នាងជាយូរមកហើយ។ រដ្ឋអាជ្ញារុស្ស៊ីបានស្នើសុំឱ្យមានការកាត់ទោសដាក់ពន្ធនាគាររយៈពេល ៤ ឆ្នាំ ប៉ុន្តែតុលាការបានសម្រេចដាក់ទោសនាងឱ្យធ្វើពលកម្ម​រយៈពេល ១៨ ខែជំនួសវិញ ដោយរដ្ឋនឹងដកហូត ១០% នៃប្រាក់ចំណូលរបស់នាង។

សូមបញ្ជាក់ថា ប្រទេសរុស្ស៊ីបានពង្រីកការហាមឃាត់​លើ “ការឃោសនា” អំពី LGBT ក្នុងឆ្នាំ ២០២២ ហើយការអនុវត្តច្បាប់នេះកាន់តែមានភាពតឹងរ៉ឹងឡើង។ អាជ្ញាធរបានបិទគេហទំព័រដែលបង្ហោះសាច់រឿងប្រឌិតមិនផ្លូវការផ្សេងៗជាច្រើន ហើយកាលពីឆ្នាំមុន MangaLIB ដែលជាគេហទំព័រអានរឿងតុក្កតា (Manga) ភាសារុស្ស៊ីដ៏ធំបំផុត ត្រូវបានពិន័យជាប្រាក់ប្រហែល ១៦ ម៉ឺនអឺរ៉ូ ឬប្រហែល ១៨.៧ ម៉ឺនដុល្លារអាមេរិក ពីបទ “ឃោសនា LGBT” ហើយអ្នកគ្រប់គ្រងម្នាក់របស់គេហទំព័រនោះ ក៏ត្រូវបានពិន័យជាប្រាក់បន្ថែមចំនួន ១៣ ៧០០ អឺរ៉ូ (១៦០០០ ដុល្លារ) ផងដែរ ៕