ដឹងតែល្អមើលឆ្នាំនេះ! មហោស្រពល្ខោននិយាយទូទាំងប្រទេស ក្រោមប្រធានបទ «ចង្កឹះមួយបាច់»

ជាទស្សនីយភាពមួយដ៏កម្រ និងមានតម្លៃបំផុតនៅកម្ពុជា ខណៈដែលអ្នកបន្តវេនថែវប្បធម៌ខ្មែរបានពូតដៃរួបរួមគ្នាជាកម្លាំងរៀបចំឱ្យមានព្រឹត្តិការណ៍មហោស្រពល្ខោននិយាយទូទាំងប្រទេសក្នុងឆ្នាំ ២០២៦ នេះ។

នាថ្ងៃទី ១៤ ខែ សីហា ឆ្នាំ ២០២៦ នេះ គណៈមេប្រយោគឆ្នើមទាំង ៥ រូប ដែលសុទ្ធសឹងជាសាស្ត្រាចារ្យដែលមានជំនាញលើសិល្បៈបុរាណ នៃជំនាញល្ខោននិយាយ និងបទពិសោធន៍រយៈពេលជាង ៣០ ឆ្នាំ បានចំណាយពេលវេលាដ៏មានតម្លៃក្នុងការទស្សនាវីដេអូរបស់ក្រុមបេក្ខជនដែលបានដាក់ពាក្យយ៉ាងយកចិត្តទុកបំផុតដើម្បីវាយតម្លៃនិងរើសយកចំនួន ៥ ក្រុមដើម្បីទៅកាន់វគ្គផ្ដាច់ព្រ័ត្រដែលធ្វើឡើងនៅថ្ងៃទី ០១-០២ ខែ តុលា ឆ្នាំ ២០២៦ ខាងមុខ។

ត្បិតថាជាលើកទី១ ប៉ុន្តែកម្លាំងជំរុញចិត្តមួយនេះហាក់ដូចជាពុះកញ្ជ្រោលសឹងតែលោតចេញមកខាងក្រៅទាំងបណ្ដាសិស្សនិស្សិតនិងបេក្ខភាពដែលបានដាក់ពាក្យចូលរួមប្រកួតជាច្រើនក្រុម លោកគ្រូ អ្នកគ្រូ ជាសិល្បករ ក៏ដូចជាសាស្ត្រាចារ្យ និងបណ្ដាអង្គភាពពាក់ព័ន្ធទាំងអស់។ ដូចដែលមហាជនអ្នកស្នេហាវិស័យសិល្បៈបុរាណខ្មែរ ជាពិសេសលើជំនាញ ល្ខោននិយាយ បានជ្រាបរួចមកហើយថា ក្រសួងវប្បធម៌ និងវិចិត្រសិល្បៈ បានប្រកាសស្វែងរកបេក្ខជនជាច្រើនក្រុមនាក់មកពីតាមបណ្ដាខេត្តទូទាំង២៥ខេត្តក្រុង ចូលរួមដាក់ពាក្យប្រកួត មិនត្រឹមដើម្បីដណ្ដើមយកពានរង្វាន់ ថែមទាំងបានបន្តចែករំលែកជំនាញសិល្បៈដ៏មានតម្លៃនិងកម្រ ដោយសារតែជំនាញពីដូនតាមួយនេះស្ទើរតែលែងមានអ្នកបន្តវេនទៅហើយមកដល់ពេលបច្ចុប្បន្ននេះ។

សូមរង់ចាំទស្សនាទាំងអស់គ្នា ថាតើក្រុមជើងខ្លាំងមកពីខេត្តក្រុងមួយណានឹងក្លាយជាម្ចាស់ពានរង្វាន់នៃមហោស្រពល្ខោននិយាយទូទាំងប្រទេសឆ្នាំ ២០២៦ នេះ ៕