ក្រុមចម្រៀង Red Velvet បច្ចុប្បន្នកំពុងផលិតស្នាដៃអាល់ប៊ុមថ្មី ដោយគ្រោងនឹងត្រឡប់មកវិញនៅក្នុងខែ សីហា ខាងមុខ។ នេះបើផ្អែកតាមការចុះផ្សាយរបស់ Allkpop នៅថ្ងៃទី១១ ខែ មិថុនា នេះ។

ការចេញផ្សាយលើកនេះនឹងក្លាយជាគម្រោងជុំគ្នាទាំង ៥នាក់ ដំបូងរបស់ក្រុម ក្នុងរយៈពេលប្រហែលពីរឆ្នាំពីរខែ បន្ទាប់ពីការចេញផ្សាយអាល់ប៊ុមខ្នាតតូច “Cosmic” កាលពីខែមិថុនា ឆ្នាំ២០២៤ ដើម្បីអបអរសាទរខួប ១០ឆ្នាំរបស់ក្រុម។

បើទោះបីជាបច្ចុប្បន្ននេះ Wendy និង Yeri បានចាកចេញពីផលិតកម្ម SM Entertainment និងចុះកិច្ចសន្យាជាមួយផលិតកម្មថ្មីរៀងៗខ្លួនទៅហើយក្ដី តែសមាជិកទាំង ៥ នៅតែអាចត្រឡប់មកជុំគ្នា ដើម្បីបើកទំព័រថ្មីមួយទៀតសម្រាប់ក្រុម Red Velvet។

ក្នុងរយៈពេល ២ឆ្នាំកន្លងមកនេះ សមាជិកម្នាក់ៗបានផ្តោតលើសកម្មភាពផ្ទាល់ខ្លួនទាំងក្នុងវិស័យតន្ត្រី សម្តែង វិទ្យុ និងទូរទស្សន៍។ Joy បានចេញអាល់ប៊ុមទោលខ្នាតតូចដំបូងរបស់ខ្លួនដែលមានចំណងជើងថា “From Joy, With Love” ចំណែកឯ Wendy បានបន្តអាជីពទោលជាមួយអាល់ប៊ុមខ្នាតតូចទី៣ គឺ “Cerulean Verge”។

រីឯ Yeri វិញ បានពង្រឹងសមត្ថភាពសម្តែងតាមរយៈគម្រោងខ្សែភាពយន្ត និងរឿងភាគ ខណៈដែល Irene ទើបតែបានចេញផ្សាយអាល់ប៊ុមទោលខ្នាតពេញដំបូងបង្អស់របស់ខ្លួន ក្រោមចំណងជើងថា “Biggest Fan”។

សូមរំឭកផងដែរថា Red Velvet បានបង្ហាញខ្លួនជាលើកដំបូងជាមួយសមាជិក ៤នាក់ គឺ Irene Seulgi Wendy និង Joy ដោយចេញផ្សាយបទ “Happiness” នៅក្នុងខែសីហា ឆ្នាំ២០១៤។ លុះដល់ខែមីនា ឆ្នាំ២០១៥ ទើបមានវត្តមាន Yeri មករួមក្រុមជាមួយនឹងការចេញផ្សាយអាល់ប៊ុម “Ice Cream Cake”៕