តារាសម្ដែងកូរ៉េ Kim Soo Hyun បានចេញសេចក្តីថ្លែងការណ៍ផ្លូវការមួយ ដើម្បីថ្លែងអំណរគុណដល់អាជ្ញាធរស៊ើបអង្កេត និងអ្នកគាំទ្រដែលបានជួយជ្រោមជ្រែងរូបលោក រយៈពេលមួយឆ្នាំបន្ទាប់ពីការធ្វើសន្និសីទសារព័ត៌មានទាំងទឹកភ្នែក ជុំវិញការចោទប្រកាន់ជាច្រើនដែលបានឡោមព័ទ្ធរូបលោក។

នៅថ្ងៃទី ២៧ ខែឧសភា នេះ ក្រុមហ៊ុន Gold Medalist ដែលជាភ្នាក់ងារគ្រប់គ្រងរបស់លោក បានចេញសេចក្តីថ្លែងការណ៍មួយទាក់ទងនឹងការចោទប្រកាន់ផ្សេងៗ រួមទាំងភស្តុតាង និងពាក្យបណ្ដឹងផ្លូវច្បាប់ជាច្រើនករណីពាក់ព័ន្ធនឹងរឿងចម្រូងចម្រាសកន្លងមក។

យោងតាមភ្នាក់ងារនេះ បានឱ្យដឹងថា ការសន្ទនាតាមកម្មវិធី KakaoTalk ដែលត្រូវបានបញ្ចេញជាសាធារណៈ និងត្រូវបានចោទប្រកាន់ថាមានការពាក់ព័ន្ធនឹងតារាសម្ដែងស្រី Kim Sae Ron ត្រូវបានរកឃើញថាជាការសន្ទនាដែលត្រូវបានគេកែច្នៃ និងប្រឌិតឡើង ដោយប្រើប្រាស់ការឆ្លើយឆ្លងរបស់បុគ្គលផ្សេងដែលមិនមានការពាក់ព័ន្ធណាមួយជាមួយលោក Kim Soo Hyun ឡើយ។ ភ្នាក់ងារនេះក៏បានអះអាងផងដែរថា ខ្សែអាត់សំឡេងដែលត្រូវបានគេនិយាយថាជាសំឡេងតារាសម្ដែងស្រីរូបនោះ គឺត្រូវបានប្រឌិតឡើងដោយប្រើប្រាស់បច្ចេកវិទ្យា AI។

សេចក្តីថ្លែងការណ៍បានបន្ថែមថា ភាពធ្ងន់ធ្ងរនៃករណីនេះបាននាំឱ្យតុលាការសម្រេចចេញដីកាចាប់ខ្លួន លោក Kim Se Ui ជាម្ចាស់ឆានែលយូធូប Hover Lab និងវិទ្យាស្ថានស្រាវជ្រាវ Garo Sero ពីបទរំលោភច្បាប់ រួមមានការបរិហារកេរ្តិ៍តាមរយៈព័ត៌មានមិនពិតនៅក្រោមច្បាប់បណ្ដាញព័ត៌មាន និងទូរគមនាគមន៍, បទល្មើសពាក់ព័ន្ធនឹងការតាមដាន និងយាយី, ការចែកចាយសម្ភារដែលបានថតដោយខុសច្បាប់ ព្រមទាំងការបង្ខិតបង្ខំ និងការគំរាមកំហែង។

ភ្នាក់ងារនេះបានថ្លែងថា៖ «យើងខ្ញុំសូមថ្លែងអំណរគុណយ៉ាងស្មោះអស់ពីចិត្តចំពោះអាជ្ញាធរស៊ើបអង្កេត ដែលបានវែកញែករកការពិតផ្អែកលើភស្តុតាងទាំងឡាយ»។

ភ្នាក់ងារនេះក៏បានរម្លឹកឡើងវិញអំពីសន្និសីទសារព័ត៌មានរបស់ Kim Soo Hyun កាលពីមួយឆ្នាំមុន ដែលកាលណោះតារាសម្ដែងរូបនេះបាននិយាយថា៖ «ខ្ញុំនឹងមិនសុំឱ្យមនុស្សគ្រប់គ្នាជឿជាក់លើខ្ញុំនោះទេ។ ខ្ញុំនឹងបង្ហាញភាពស្អាតស្អំឱ្យបាន»។ យោងតាមសេចក្តីថ្លែងការណ៍បានឱ្យដឹងថា៖ «រយៈពេលមួយឆ្នាំកន្លងមកនេះ គឺត្រូវបានលះបង់ទាំងស្រុងដើម្បីរក្សាការសន្យានោះ»។

សេចក្តីថ្លែងការណ៍បានបន្តទៀតថា៖ «ទីបំផុត ការពិតត្រូវបានបង្ហាញឱ្យឃើញតាមរយៈនីតិវិធីស្របច្បាប់ និងការស៊ើបអង្កេតយ៉ាងល្អិតល្អន់។ យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្នកគ្រប់គ្នាដែលបានជឿជាក់ និងរង់ចាំលោក Kim Soo Hyun»។

គួរបញ្ជាក់ផងដែរថា មុននេះ Kim Soo Hyun បានធ្លាក់ចូលទៅក្នុងរឿងចម្រូងចម្រាសយ៉ាងខ្លាំងជុំវិញការចោទប្រកាន់ថា លោកធ្លាប់បានទាក់ទងស្នេហាជាមួយតារាសម្ដែងស្រីដែលបានបាត់បង់ជីវិត Kim Sae Ron ខណៈពេលដែលនាងនៅជាអនីតិជននៅឡើយ។ ទោះបីជាលោកបានទទួលស្គាល់ថា ពួកគេពិតជាធ្លាប់បានទាក់ទងគ្នាកាលពីអតីតកាលមែនក៏ដោយ ប៉ុន្តែលោកបានបដិសេធយ៉ាងដាច់អហង្ការចំពោះការអះអាងដែលថា ទំនាក់ទំនងនោះបានចាប់ផ្ដើមឡើងតាំងពីពេលដែលនាងមិនទាន់គ្រប់អាយុ ៕