ក្រៅពីប្រគេនដី ៤ ហិចតាហើយ ហេង វិសាល ស្រីនា និងគ្រួសារ បរិច្ចាគប្រាក់ ១ ម៉ឺនដុល្លារពីលើថែមទៀត

កាលពីមួយខែមុន ពោលថ្ងៃ ២៧ ខែមីនា ឆ្នាំ ២០២៦ អ្នកផលិតមាតិកាដ៏ល្បី ហេង វិសាល និងភរិយា ព្រមទាំងគ្រួសារបានប្រកាសប្រគេនដី ៤ ហិកតាដល់សង្ឃ ដើម្បីកសាងជាកន្លែងបដិបត្តិវិបស្សនា ដោយមិនទាន់បានបង្ហើបឲ្យដឹងពីទីតាំងឡើយ។

នៅថ្ងៃនេះដែរ គ្រួសារអ្នកផលិតមាតិកា និងចូលចិត្តធ្វើបុណ្យរូបនេះ បានឲ្យដឹងបន្ថែមទៀតថា ក្រៅពីដី ៤ ហិចតា នោះហើយ ហេង វិសាល និងភរិយា ជា ស្រីនា ព្រមទាំងគ្រួសារបរិច្ចាគប្រាក់ ១ ម៉ឺនដុល្លារពីលើបន្ថែមទៀត ដើម្បីចូលរួមកសាងមជ្ឈមណ្ឌល។

ម្ចាស់ផលិតផល We Young បានចែករំលែកដំណឹងល្អនេះថា “បងប្អូនអើយថ្ងៃនេះខ្ញុំសប្បាយចិត្តណាស់ ឥឡូវនេះមជ្ឈមណ្ឌលវិបស្សនាខេត្តកំពង់ឆ្នាំងចាប់ផ្ដើមកសាងហើយ ដូច្នេះបងប្អូនដែលជាអ្នកដែលប្រាថ្នាបុណ្យ ជាអ្នកស្រឡាញ់នៅអំពើល្អ ជាអ្នកប៉ង និងផ្ដល់ក្ដីសុខដល់ខ្លួនឯង និងអ្នកដទៃអស់កាលយូរ ចូរអ្នកទាំងឡាយចូលរួមនៅការបំពេញបុណ្យនេះចុះ ក្រៅពីដីចំនួន ៤ ហិចតាដែលខ្ញុំ ក្រុមគ្រួសារ និងក្រុមញាតិបានលះហើយថ្ងៃមុន ព្រឹកនេះខ្ញុំ និងភរិយាក៏សូមបរិច្ចាគប្រាក់ចំនួន 10 000$ ពីលើបន្ថែមទៀត ដើម្បីចូលរួមកសាងមជ្ឈមណ្ឌលនេះឲ្យឆាប់ហើយសូមការលះនៅទ្រព្យផ្ទាល់ខ្លួននេះ សូមឲ្យបានជាប្រយោជន៍ដល់ជនច្រើន ហើយសូមឲ្យមនុស្ស សត្វទាំងអស់បានដល់នៅសេចក្ដីសុខ”។

សកម្មភាព ហេង វិសាល និងគ្រួសារទទួលបានការសាទរ និងចូលរួមតាមរយៈការវេរបច្ច័យច្រើនតាម KHQR។ សម្រាប់ទីតាំងកន្លែងវិបស្សនានោះជាប់វត្តក្រាំងល្វា ឬឈ្មោះវត្តឧទុម្ពរ នៅភូមិក្រាំងល្វា ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។

គ្រាន់តែឃើញរូបភាពតាមរយៈរូបភាពប្លង់ 3D កន្លែងវិបស្សនានោះមានអាគារ មានគូទឹក មានឈើ បៃតងខៀវខ្ចី ស្រស់ស្អាត ស្រឡះមុខស្រឡះមាត់ និងគួរឲ្យចង់ទៅ។ គួរបញ្ជាក់ថា គ្រួសារ ស្រីនា វិសាល ជាមនុស្សជ្រះថ្លានូវវិស័យពុទ្ធសាសនា។ ដូចថ្មីៗនេះឪពុកក្មេក ហេង វិសាល បានទៅបួស ហើយម្ដាយបង្កើតក៏បានចូលរួមបញ្ចប់វគ្គបដិបត្តិវិបស្សនាញាណ១៦ នៅវត្តត្រកៀត៕