កីឡាការិនី ស្រួង ភាវី ស្លៀកឈុតប្រពៃណីខ្មែរ «ស្បៃ» យ៉ាងស្រស់ស្អាត ចូលរួមកម្មវិធីប្រគល់ពានរង្វាន់នៅកូរ៉េ

បើទោះជាមានសញ្ជាតិកូរ៉េហើយក៏ដោយ ក៏ ស្រួង ភាវី កីឡាការិនីស្នូឃ័រដែលមានដើមកំណើត ព្រមទាំងឈាមជ័រខ្មែរនៅតែបង្ហាញឲ្យពិភពលោកដឹង ឮ និងស្គាល់ពីខ្មែរ តាមរយៈឈុត «ស្បៃ» ដែលស្ត្រីវ័យជាង ៣០ ឆ្នាំរូបនេះ គ្រងពេលទទួលពានរង្វាន់នៅកូរ៉េ កាលពីយប់មិញ។

ក្នុងកម្មវិធី PBA Golden Cue Awards 2026 ដែលជាកម្មវិធីប្រគល់ពានរង្វាន់កីឡាប៊ីយ៉ាការ៉ុមប្រចាំឆ្នាំនៅប្រទេសកូរ៉េខាងត្បូង ហើយកីឡាការិនីប៊ីយ៉ា និងស្នូឃ័រកម្ពុជា ស្រួង ភាវី ក៏ទទួលបានពានរង្វាន់កិត្តិយសពិសេសមួយផងដែរ ដោយសារឈុតស្បែប្រពៃណីខ្មែរ គឺពានរង្វាន់សម្លៀកបំពាក់ស្រស់ស្អាតបំផុត។

កីឡាការិនី ស្រួង ភាវី ដែលមានស្រុកកំណើតនៅត្បូងឃ្មុំ បានឲ្យដឹងតាមរយៈបណ្ដាញសង្គមនាងថា សហព័ន្ធកីឡាប៊ីយ៉ារ៉ុមអន្តរជាតិបានរៀបចំកម្មវិធីប្រគល់ពានរង្វាន់ និងប្រាក់រង្វាន់ប្រចាំឆ្នាំ ដល់កីឡាករដែលបានខិតខំប្រែងយ៉ាងខ្លាំងក្នុងការចូលរួមប្រកួតពេញមួយឆ្នាំនៅក្នុងខែមីនា ឆ្នាំ ២០២៦ ដែលមានកីឡាករ កីឡាការិនីមកពីបណ្ដាប្រទេសផ្សេងៗ ក្នុងនោះអ្នកនាងក៏បានចូលរួមក្នុងកម្មវិធីនោះដូចគ្នា។

អ្នកនាងបានបន្ថែមថា សម្រាប់នាង ឆ្នាំនេះមិនបានពានរង្វាន់ពិសេសអ្វីទេ ដោយសារធ្លាក់ទឹកដៃ លទ្ធផលក៏មិនជាល្អប៉ុន្មានឡើយ។ តែទោះជាយ៉ាងណា នាង សន្យាថានឹងខិតខំហ្វឹកហាត់បន្ថែមដើម្បីស្វែងរកពានរង្វាន់ និងកេរ្តិ៍ឈ្មោះឲ្យខ្ពស់ជាងនេះ។

ចំណែកពានរង្វាន់ដែលអ្នកនាងទទួលបាន គឺតំណាងឲ្យឈុតប្រពៃណីខ្មែរដែលបានស្លៀកពាក់។ កីឡាការិនី ស្រួង ភាវី បានបន្ថែមថា “ខ្ញុំគិតថា ខ្ញុំអត់បានពានទេ ខ្ញុំស្លៀកឈុតនេះគឺគ្រាន់តែចង់បង្ហាញអត្តសញ្ញាណខ្មែរឲ្យប្រទេសគេបានឃើញ តែមិននឹកស្មានថា ខាងកម្មវិធីបានផ្ដល់ពាននេះដើម្បីតំណាងឲ្យឈុតប្រពៃណីខ្មែរដែលខ្ញុំស្លៀកថ្ងៃនេះ គេពេញចិត្ត និងលេចធ្លោជាងគេ“៕

រូបភាព៖ Sruong Pheavy

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត