Ariana Grande ​ត្រៀមបញ្ចេញអាល់ប៊ុមទី ៨ ក្រោមឈ្មោះថា “Petal” នៅថ្ងៃទី ៣១ ខែកក្កដា ខាងមុខ ដោយអាល់ប៊ុមថ្មីនេះ នឹងរៀបរាប់រឿងរ៉ាវជីវិតដែលធំធាត់ឡើង តាមរយៈស្លាកស្នាមប្រេះស្រាំ។

នៅថ្ងៃទី២៨ ខែមេសា នេះ តារាចម្រៀងវ័យ ៣២ឆ្នាំ បានប្រកាសនៅលើ Instagram ផ្ទាល់ខ្លួនថា​ នាងនឹងចេញអាល់ប៊ុមថ្មី ដែលជាការរួបរួមចម្រៀងចំនួន ១២បទ ជាស្នាដៃសហនិពន្ធរវាងតារាស្រីផ្ទាល់ និង Ilya ដែលជាដៃគូផលិតចម្រៀងដ៏ជិតស្និទ្ធ ធ្លាប់សហការគ្នាតាំងតែពីអាល់ប៊ុម Sweetener កាលពីឆ្នាំ ២០១៨។

Ariana Grande បានបង្ហើបឱ្យដឹងថា ចំពោះគោលគំនិតនៃ Petal នឹងផ្តោតលើការនិទានរឿងរ៉ាវនៃការរីកចម្រើនរបស់ជីវិត តាមរយៈបទពិសោធន៍ដ៏លំបាក និងការប្រឈមមុខជាមួយបញ្ហានានា ក៏ប៉ុន្តែ​អាល់ប៊ុមនេះក៏ជាស្នាដៃមួយដែលពេញទៅដោយជីវិតជីវ៉ាដូចគ្នា។

គួរឱ្យដឹងផងដែរថា ការបញ្ចេញអាល់ប៊ុមថ្មីនៅគ្រានេះ បានធ្វើឱ្យអ្នកគាំទ្រមានការភ្ញាក់ផ្អើល ព្រោះកន្លងមក Ariana Grande ធ្លាប់បាននិយាយថា នាងប្រហែលជាត្រូវការក្លូនខ្លួនឯង ទើបអាចចេញអាល់ប៊ុមថ្មីក្នុងពេលឆាប់ៗនេះបាន ខណៈនាងកំពុងមមាញឹកនឹងការងារទាំងក្នុងវិស័យសិល្បៈ និងជំនួញ។

ជាក់ស្ដែង ម្ចាស់ពានរង្វាន់ Grammy រូបនេះ ត្រូវមមាញឹកនឹងការងារសម្ដែងក្នុងភាពយន្តថ្មី Focker-in-Law ដែលគ្រោងចាក់ផ្សាយនៅក្នុងខែវិច្ឆិកា ខាងមុខ រួមទាំងការប្រគំតន្ត្រី Eternal Sunshine Tour ដែលនឹងប្រព្រឹត្តទៅនៅអំឡុងខែមិថុនា ដល់ខែកញ្ញា ក៏ដូចជាការងារសម្រាប់យីហោគ្រឿងសម្អាង R.E.M Beauty ជាដើម៕