បន្ទាប់ពីវគ្គប្រកួតប្រជែងជម្រុះយ៉ាងស្វិតស្វាញចំនួនពីរវគ្គ ទីបំផុតវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍ (NISTI) រកឃើញយុវជនចំនួន៣រូប ជាប់ជ័យលាភីក្នុងការប្រកួតប្រជែងពានរង្វាន់វិទ្យាសាស្ត្រ Sci-Cup ឆ្នាំ២០២៦។

យុវជនជ័យលាភីទាំង៣រូប រួមមាន យុវសិស្ស នុច សុវឌ្ឍនា មកពីសាលារៀនអន្តរជាតិខេនរីដ, យុវតី គង់ ធារីកា មកពីវិទ្យាល័យព្រះយុគន្ធរ សាលារៀនជំនាន់ថ្មី និងយុវសិស្ស នូ នុភារ មកពីសាលាបញ្ញាសាស្រ្តអន្តរជាតិ។

ការប្រកួតប្រជែងពានរង្វាន់ Sci-Cup ក្នុងឱកាសទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី៤ កាលពីចុងខែមីនា បានបង្ហាញពីការប្តេជ្ញាចិត្តរបស់កម្ពុជា ក្នុងការពង្រឹងការអប់រំលើជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) និងការបណ្តុះនវានុវត្តន៍ករជំនាន់ក្រោយ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា កម្មវិធីប្រកួតប្រជែងវិទ្យាសាស្ត្រនេះឆ្លុះបញ្ចាំងពីគោលដៅរបស់កម្ពុជា ក្នុងការផ្លាស់ប្តូរពីប្រទេសប្រើប្រាស់បច្ចេកវិទ្យា ទៅជាប្រទេសអភិវឌ្ឍ និងបង្កើតនវានុវត្តន៍បច្ចេកវិទ្យានាពេលអនាគត។

“យើងសង្ឃឹមថា យុវជនកម្ពុជាមិនត្រឹមតែចេះប្រើប្រាស់បច្ចេកវិទ្យាប៉ុណ្ណោះទេ ប៉ុន្តែនឹងក្លាយទៅជាអ្នកបង្កើត និងអ្នកអភិវឌ្ឍបច្ចេកវិទ្យាថ្មីៗ ដើម្បីលើកកម្ពស់សក្តានុពលរបស់កម្ពុជា ឱ្យកាន់តែរឹងមាំ មានភាពធន់ និងអាចប្រកួតប្រជែងក្នុងតំបន់ និងលើឆាកអន្តរជាតិបាន”

ឯកឧត្តមបណ្ឌិត កែវ សុជាតិ អគ្គនាយកវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា វគ្គផ្តាច់ព្រ័ត្រនេះ មិនត្រឹមតែបង្ហាញពីសមត្ថភាពសិក្សាប៉ុណ្ណោះទេ ប៉ុន្តែថែមទាំងបង្ហាញពីគំនិតនវានុវត្តន៍ ការជឿជាក់លើខ្លួនឯង និងសមត្ថភាពក្នុងការសម្របខ្លួន។ គុណលក្ខណៈទាំងនេះ នឹងអនុញ្ញាតឱ្យយុវជនរបស់យើងចូលរួមចំណែកយ៉ាងសកម្ម ក្នុងការអភិវឌ្ឍវិទ្យាសាស្ត្រ និងបច្ចេកវិទ្យារបស់ប្រទេសកម្ពុជា។

គួរជំរាបជូនថា កម្មវិធីប្រកួតប្រជែងពានរង្វាន់វិទ្យាសាស្ត្រ Sci-Cup ឆ្នាំ២០២៦ រៀបចំឡើងក្នុងគោលបំណងចូលរួមចំណែកលើកកម្ពស់ការយល់ដឹងផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ដោយផ្ដល់ឱកាសសម្រាប់សិស្សថ្នាក់ទី១០ និង១១ ទាំងសាលារដ្ឋ និងឯកជន ទូទាំងប្រទេសកម្ពុជា៕