បេក្ខជនប្រឡងបាក់ឌុបឆ្នាំនេះ មានជាង ១៥ម៉ឺននាក់ ខណៈថ្នាក់វិទ្យាសាស្ត្រសង្គមបន្តមានចំនួនច្រើនលើសលប់

ក្រសួងអប់រំ យុវជន និងកីឡា បានប្រកាសជាផ្លូវការនៅថ្ងៃនេះថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ១០ សីហា ២០២៦ ខាងមុខនេះ មានបេក្ខជនចុះឈ្មោះប្រឡងសរុបចំនួន ១៥១,២៣៨ នាក់ (ស្រី ៨៤,៧៣៥ នាក់) ដែលជាតួលេខកើនឡើង បើធៀបនឹងឆ្នាំទៅ មានចំនួន ១៤៦ ៧២០ នាក់។

យោងតាមសេចក្តីប្រកាសព័ត៌មានរបស់ក្រសួងអប់រំ ក្នុងចំណោមបេក្ខជនសរុបជាង ១៥ម៉ឺននាក់នោះ ត្រូវបានបែងចែកជាពីរថ្នាក់រួមមាន ថ្នាក់វិទ្យាសាស្ត្រ មានបេក្ខជនចំនួន ៣៧,៤៤៩ នាក់ (ស្រី ២២,១៩៣ នាក់)។ ខណៈថ្នាក់វិទ្យាសាស្ត្រសង្គម មានបេក្ខជនចំនួន ១១៣,៧៨៩ នាក់ (ស្រី ៦២,៥៤២ នាក់)។

ក្នុងការប្រឡងខាងមុខនេះ ក្រសួងបានរៀបចំមណ្ឌលសំណេរសរុបចំនួន ២៤៤ មណ្ឌល ស្មើនឹង ៦១០៤បន្ទប់ នៅទូទាំង ២៥ រាជធានី-ខេត្ត។ ក្នុងនោះ មណ្ឌលថ្នាក់វិទ្យាសាស្ត្រមានចំនួន ៦៨មណ្ឌល (១,៥២៦បន្ទប់) និងថ្នាក់វិទ្យាសាស្ត្រសង្គមមានចំនួន ១៧៦មណ្ឌល (៤,៥៧៨ បន្ទប់)។ ដោយឡែក មណ្ឌលកំណែមានចំនួន ១០មណ្ឌល ស្ថិតនៅក្នុងរាជធានីភ្នំពេញ។

បន្ថែមពីនេះ ក្រសួងអប់រំបានចាត់តាំងថ្នាក់ដឹកនាំ និងបុគ្គលិកអប់រំចូលរួមជាគណៈកម្មការនានាសរុប ៣៣,៧៤៧ នាក់ (ស្រី ១២,០០១ នាក់) ព្រមទាំងមានកិច្ចសហការយ៉ាងជិតស្និទ្ធជាមួយស្ថាប័នពាក់ព័ន្ធចំនួន ៦ ក្នុងនោះរួមមាន អង្គភាពប្រឆាំងអំពើពុករលួយ (ACU), ក្រសួងមហាផ្ទៃ, ក្រសួងសុខាភិបាល, កងរាជអាវុធហត្ថលើផ្ទៃប្រទេស, អគ្គិសនីកម្ពុជា និងសហភាពសហព័ន្ធយុវជនកម្ពុជា ដើម្បីធានាបាននូវសន្តិសុខ សុវត្ថិភាព សណ្តាប់ធ្នាប់ និងតម្លាភាព ក្រោមគោលការណ៍ «អ្នកចេះ គឺជាប់»។

កាលវិភាគសំខាន់ៗនៃការប្រឡងបាក់ឌុបឆ្នាំ២០២៦
- ថ្ងៃទី០៣ សីហា៖ ការបិទផ្សាយបញ្ជីឈ្មោះបេក្ខជន លើកទី១ (ត្រួតពិនិត្យទិន្នន័យ)
- ថ្ងៃទី០៨ សីហា៖ ការបិទផ្សាយបញ្ជីឈ្មោះបេក្ខជន លើកទី២ (ពិនិត្យលេខតុ និងលេខបន្ទប់)
- ថ្ងៃទី១០-១១ សីហា៖ ដំណើរការប្រឡងសំណេរ
- ថ្ងៃទី១៣-១៩ សីហា៖ ដំណើរការកំណែ
- ថ្ងៃទី២០-៣០ សីហា៖ ដំណើរការស្រង់ និងបូកពិន្ទុដោយកុំព្យូទ័រ និងការផ្ទៀងផ្ទាត់ពិន្ទុ
- ថ្ងៃទី០២ កញ្ញា៖ ប្រកាសលទ្ធផលប្រឡងនៅតាមមណ្ឌលប្រឡងទូទាំង ២៥ រាជធានី-ខេត្ត។

ក្រសួងអប់រំក៏បានរំលឹក និងក្រើនរំលឹកដល់បេក្ខជនទាំងអស់ឱ្យគោរពបទបញ្ញត្តិប្រឡងឱ្យបានម៉ឺងម៉ាត់ ដោយហាមដាច់ខាតនូវការយកទូរស័ព្ទដៃ នាឡិកាឆ្លាតវៃ ឧបករណ៍អេឡិចត្រូនិក ឬសំណៅឯកសារផ្សេងៗចូលក្នុងមណ្ឌល ឬបន្ទប់ប្រឡង។ បេក្ខជនដែលប្រព្រឹត្តល្មើសនឹងបទបញ្ញត្តិ នឹងត្រូវកំណត់ឱ្យធ្លាក់ជាស្វ័យប្រវត្តិ៕

លោក សេក សត្យា | Mr. Sek Sathya

លោក សេក សត្យា មានបទពិសោធន៍ធ្វើការលើវិស័យសារព័ត៌មានរយៈ ពេលជាង ១០ឆ្នាំ និងជាផលិតករកម្មវិធីព័ត៌មានទូរទស្សន៍ ។