ក្នុងពិធីសំណេះសំណាល និងចែកសៀវភៅមេរៀនសង្ខេបថ្នាក់ទី១២ ដល់សិស្សវិទ្យាល័យ ហ៊ុន សែន កងតាណឹង ស្រុកកងមាស ខេត្តកំពង់ចាម កាលពីថ្ងៃអាទិត្យ (៧ មិថុនា) ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកទឹកចិត្តសិស្សត្រៀមប្រឡងសញ្ញាបត្រមធ្យមសិក្សា​ទុតិយភូមិ ឬបាក់ឌុបទាំងអស់ បន្តខិតខំប្រឹងប្រែងរៀនសូត្រឱ្យអស់ពីលទ្ធភាព ខណៈការប្រឡងបាក់ឌុប កំពុងខិតចូលមកដល់។

រដ្ឋមន្រ្តីក្រសួងអប់រំ លើកទឹកចិត្ត​ដល់​សិស្សានុសិស្សយកសៀវភៅមេរៀនសង្ខេបថ្នាក់ទី១២ ដែលបានចែកជូន យកទៅអាន និងហាត់អនុវត្តឱ្យច្រើន បន្តថែរក្សាសុខភាពឱ្យបានរឹងមាំ ដើម្បីប្រឡងឱ្យជាប់ និងទទួលបាននិទ្ទេសល្អៗ។ ជាពិសេស គឺឱកាសទទួលបានអាហារូបករណ៍ទៅសិក្សាបន្តនៅទីក្រុងភ្នំពេញ នៅតាមសាកលវិទ្យាល័យដែលខ្លួនប៉ងប្រាថ្នា និងសិក្សាជំនាញដែលខ្លួនស្រឡាញ់។

ឯកឧត្តមបណ្ឌិតសភាចារ្យ ក៏បានជំរុញ លោកគ្រូ អ្នកគ្រូ រួមទាំងក្រុមការងារក្រសួង ត្រូវប្រឹងប្រែងបន្ថែមទៀតក្នុងការបន្តជួយជ្រោមជ្រែងឱ្យអស់ពីលទ្ធភាព និងគ្រប់រូបភាព ដើម្បីធានាបានថា សិស្សានុសិស្ស នឹងទទួលបានលទ្ធផលល្អ ឆ្លើយតបនឹងការខិតខំប្រឹងប្រែងរៀនសូត្ររបស់ពួកគេជាច្រើនឆ្នាំមកនេះ។

សម្រាប់ការប្រឡងសញ្ញាបត្រមធ្យមសិក្សាទុតិយភូមិខាងមុខ ឯកឧត្តមបណ្ឌិតសភាចារ្យ ហង់ជួន ណារ៉ុន បានជូនពរប្អូនៗថ្នាក់ទី១២ ទាំងអស់ បន្តខិតខំរៀនសូត្រ ដើម្បីទទួលបានជោគជ័យទាំងអស់គ្នា ជាពិសេសត្រូវរក្សាឱ្យបាននូវអត្រាជាប់ខ្ពស់ ដែលមិនត្រឹមតែសម្រាប់ខ្លួនឯងប៉ុណ្ណោះទេ ថែមទាំងជាមោទនភាពសម្រាប់គ្រួសារ សាលារៀន និងសហគមន៍ឃុំកងតាណឹងផងដែរ៕