អ្នកជំនាញសង្គម ៖ អ្នកបង្កើតមាតិកា គួរគិតឱ្យបានគ្រប់ជ្រុងជ្រោយមុនបញ្ចេញមតិលើបណ្ដាញសង្គម

ស្របពេលមានការជជែកវែកញែកយ៉ាងក្តៅគគុកជុំវិញការចែករំលែកមាតិកាមិនសមហេតុផលពីសំណាក់អ្នកផលិតមាតិកា (Content Creator) មួយចំនួននៅលើបណ្តាញសង្គម អ្នកជំនាញកិច្ចការសង្គម បានដាស់តឿនដល់អ្នកបង្កើតមាតិកាទាំងអស់ ត្រូវមានការត្រួតពិនិត្យ និងគិតគូរឱ្យបានគ្រប់ជ្រុងជ្រោយ មុននឹងបញ្ចេញមតិជាសាធារណៈ ដើម្បីជៀសវាងការប៉ះពាល់ដល់សីលធម៌ និងសុជីវធម៌សង្គម។

លោកបណ្ឌិត ឈត ប៊ុនថង អ្នកជំនាញទស្សនវិជ្ជា និងកិច្ចការសង្គម បានគូសបញ្ជាក់ថា ត្បិតការបញ្ចេញមតិយោបល់មិនមែនជារឿងខុសឆ្គង ប៉ុន្តែការបង្ហាញទស្សនៈ ការយល់ឃើញផ្ទាល់ខ្លួន ឬចំណង់ចំណូលចិត្តណាដែលផ្ទុយពីសីលធម៌ និងសុជីវធម៌សង្គម នឹងបង្កើតឱ្យមានការរិះគន់ពីសាធារណជនជាមិនខាន។

«ការបញ្ចេញមតិយោបល់ មិនមែនជារឿងខុសឆ្គងនោះទេ កុំឱ្យតែការចោទប្រកាន់គេ ការអូសទាញ ឃោសនាឱ្យគេធ្វើតាមការគិតមិនត្រឹមត្រូវ»

លោកបណ្ឌិតបន្ថែមថា ទោះបីជាបុគ្គលម្នាក់ៗមានសេរីភាព និងមានមធ្យោបាយបច្ចេកវិទ្យាក្នុងការបញ្ចេញមតិយោបល់ឱ្យអ្នកដទៃបានដឹងឮក៏ដោយ ក៏ត្រូវតែគិតគូរពីផលប៉ះពាល់ដល់អ្នកដទៃផងដែរ។ លោកបានសង្កត់ធ្ងន់ថា អ្នកផលិតមាតិកាគួរពិចារណាឡើងវិញនូវអ្វីដែលជាប្រយោជន៍ និងអ្វីដែលមិនគួរនិយាយ ឬមិនគួរបង្ហោះជាសាធារណៈ។

ស្របនឹងការព្រួយបារម្ភនេះដែរ លោក ជី សុផាត ដែលគេស្គាល់ថាជាអ្នកជំនាញបច្ចេកវិទ្យា និងបណ្តាញសង្គមនៅកម្ពុជា ក៏យល់ឃើញដែរថា អ្នកផលិតមាតិកានៅលើបណ្តាញសង្គមគួរមានក្រមសីលធម៌ និងគម្បីថ្លឹងថ្លែងឱ្យគ្រប់ជ្រុងជ្រោងមុនបញ្ចេញមតិលើបណ្ដាញសង្គម, លោកថា ប្រសិនបើអ្នកផលិតមាតិកាមិនបានថ្លឹងថ្លែងឱ្យគ្រប់ជ្រុងជ្រោងទេ នោះគឺក្រសួងនានា អាចពិនិត្យមើលផលប៉ះពាល់ និងចាត់វិធានការ។

ជាមួយគ្នានេះ លោក ជី សុផាត សង្ឃឹមថា នឹងមានការយកចិត្តទុកដាក់ពីក្រសួង ឬអ្នកដែលពាក់ព័ន្ធនានា ទៅលើអ្នកផលិតមាតិកា ព្រោះលោកមើលឃើញថា អ្នកផលិតមាតិកា អាចជាឥទ្ធិពលធំសម្រាប់សង្គមបច្ចុប្បន្ន ដូច្នេះពួកគាត់គួរតែត្រូវទទួលបានការឆ្លងកាត់ ឬក៏ទទួលស្គាល់ ឬក៏ត្រូវបានត្រួតពិនិត្យមួយចំនួន ហើយប្រសិនបើជាអាច លោករំពឹងថា នឹងមានការចុះបញ្ជីអ្នកផលិតមាតិកាឱ្យស្ថិតក្នុងក្រុមណាមួយ ដូចជា «អ្នកផលិតមាតិកាសហគមន៍» ជាដើម។

ក្រៅពីដាស់តឿនដល់អ្នកផលិតមាតិកា ទាំងលោកបណ្ឌិត ឈត ប៊ុនថង និងលោក ជី សុផាត ក៏បានផ្តល់ការណែនាំដល់អ្នកទស្សនាផងដែរ ដោយត្រូវមានគុណតម្លៃខ្លួនឯងក្នុងការថ្លឹងថ្លែងខ្លឹមសារដែលគេបង្ហោះនៅលើបណ្តាញសង្គម។ សម្រាប់លោកបណ្ឌិត ឈត ប៊ុនថង បានណែនាំថា ប្រសិនបើអ្នកទស្សនាបានឃើញមាតិកាណាដែលមិនសមទំនង មិនត្រឹមត្រូវ គឺគួរអូសរំលងចោល ដោយមិនចាំបាច់ឆ្លើយតបឡើយ ព្រោះការបន្តទស្សនាមាតិកាមិនល្អទាំងនោះ អាចរុញច្រានឱ្យមានបញ្ហាផ្លូវចិត្តថែមទៀតផង៕

កញ្ញា វ៉ាន គីមសល់ | Ms. Van Kimsal

កញ្ញា វ៉ាន គីមសល់ ជាអ្នកសរសេរព័ត៌មានអប់រំ នៅ AMS Education។ កញ្ញាមានចំណូលចិត្តសរសេរមាតិកាព័ត៌មានអប់រំទាក់ទងនឹង ព្រឹត្តិការណ៍ ព័ត៌មានជាតិ ការអប់រំយុវជន និងកុមារតូច ព្រមទាំងស្រាវជ្រាវលើការវិវឌ្ឍន៍ថ្មីៗក្នុងវិស័យអប់រំ។