យុវជនកម្ពុជា ៧រូប តំណាងជាតិ ចូលរួម World Youth Festival 2026 នៅរុស្ស៊ី ផ្តោតលើជំនាញបច្ចេកវិទ្យា និងរ៉ូបូត

យុវជនកម្ពុជា ៧រូប នឹងតំណាងឱ្យកម្ពុជាចូលរួមកម្មវិធី World Youth Festival 2026 ដែលជាព្រឹត្តិការណ៍យុវជនអន្តរជាតិមួយ នឹងប្រព្រឹត្តទៅចាប់ពីថ្ងៃទី១១ ដល់ថ្ងៃទី១៧ ខែកញ្ញា ឆ្នាំ២០២៦ នៅទីក្រុង Ekaterinburg សហព័ន្ធរុស្ស៊ី ដោយមានការចូលរួមពីថ្នាក់ដឹកនាំ និងយុវជនមកពីបណ្តាប្រទេសជុំវិញពិភពលោក ក្រោមការចូលរួមរបស់លោក វ្ល៉ាឌីមៀរ ពូទីន ប្រធានាធិបតីសហព័ន្ធរុស្ស៊ី។

ប្រតិភូយុវជនកម្ពុជាទាំង ៧រូប ត្រូវបានជ្រើសរើសឱ្យតំណាងកម្ពុជាក្នុងវិស័យជំនាញផ្សេងៗ រួមមាន ភាពជាអ្នកដឹកនាំ ការទូត សេដ្ឋកិច្ច ហិរញ្ញវត្ថុ សំណង់ បច្ចេកវិទ្យា វិទ្យាសាស្ត្រ បញ្ញាសិប្បនិម្មិត (AI) Blockchain បច្ចេកវិទ្យាឌីជីថល និងសហគ្រិនភាព។

សម្រាប់លោក ណោង រិទ្ធី តំណាងកម្ពុជាក្នុងវិស័យភាពជាអ្នកដឹកនាំ យុវជន ការទូត ទំនាក់ទំនងអន្តរជាតិ និងរដ្ឋបាលសាធារណៈ។ លោក លី សុវណ្ណដារ៉ុង តំណាងកម្ពុជាក្នុងវិស័យសំណង់ ស្ថាបត្យកម្ម ឧស្សាហកម្ម បច្ចេកវិទ្យា ថាមពល ដឹកជញ្ជូន និងភស្តុភារកម្ម។ ចំណែកលោក ភឹម វុត្ថា និងលោក គីម ទិព្វវីរៈរិទ្ធិ តំណាងកម្ពុជាក្នុងវិស័យសេដ្ឋកិច្ច ហិរញ្ញវត្ថុ ពាណិជ្ជកម្ម ពន្ធដារ គយ វិនិយោគ និងសហគ្រិនភាព។

ក្នុងវិស័យវិទ្យាសាស្ត្រ និងបច្ចេកវិទ្យា លោក អ៊ាន សុខណាង លោក ថៃ ផាន្នី និងលោក សុត បញ្ញា ត្រូវបានជ្រើសរើសឱ្យតំណាងកម្ពុជាក្នុងវិស័យវិទ្យាសាស្ត្រ ការអប់រំ ប្រព័ន្ធផ្សព្វផ្សាយ បញ្ញាសិប្បនិម្មិត (AI) បច្ចេកវិទ្យា Blockchain បច្ចេកវិទ្យាឌីជីថល និងព័ត៌មាន។

លោក អ៊ាន សុខណាង បានលើកឡើងថា លោកមានក្តីរីករាយដែលត្រូវបានជ្រើសរើសជាតំណាងកម្ពុជាចូលរួមក្នុងកម្មវិធីអន្តរជាតិនេះ ហើយបានត្រៀមខ្លួនរួចរាល់ ដើម្បីចូលរួមតំណាងឱ្យវិស័យវិទ្យាសាស្ត្រ និងបច្ចេកវិទ្យារបស់កម្ពុជា។

ការចូលរួមក្នុងវេទិកាអន្តរជាតិនេះ គឺជាឱកាសសម្រាប់ប្រតិភូកម្ពុជា ក្នុងការផ្លាស់ប្តូរចំណេះដឹង បទពិសោធន៍ និងគំនិតជាមួយយុវជន និងអ្នកជំនាញមកពីប្រទេសនានា ព្រមទាំងស្វែងយល់ពីការវិវត្តថ្មីៗក្នុងវិស័យវិទ្យាសាស្ត្រ និងបច្ចេកវិទ្យា។

ជាពិសេស ការចូលរួមរបស់យុវជនដែលមានជំនាញក្នុងវិស័យ AI បច្ចេកវិទ្យាឌីជីថល និងរ៉ូបូត នឹងផ្តល់ឱកាសឱ្យកម្ពុជាបង្ហាញពីសមត្ថភាព និងការរីកចម្រើនរបស់យុវជនក្នុងវិស័យបច្ចេកវិទ្យាទំនើប ព្រមទាំងចែករំលែកបទពិសោធន៍ និងគំនិតច្នៃប្រឌិតជាមួយអ្នកចូលរួមអន្តរជាតិ។

ការចូលរួមរបស់ប្រតិភូយុវជនកម្ពុជាទាំង ៧រូប ក៏ជាឱកាសសម្រាប់ពួកគេក្នុងការពង្រីកបណ្តាញទំនាក់ទំនងអន្តរជាតិ ស្វែងរកកិច្ចសហប្រតិបត្តិការថ្មីៗ និងបង្ហាញពីសក្តានុពលរបស់យុវជនកម្ពុជានៅលើឆាកអន្តរជាតិ។

World Youth Festival 2026 នឹងក្លាយជាវេទិកាសម្រាប់យុវជនមកពីបណ្តាប្រទេសជុំវិញពិភពលោកជួបជុំគ្នា ផ្លាស់ប្តូរគំនិត និងបទពិសោធន៍ ព្រមទាំងពិភាក្សាអំពីបញ្ហាប្រឈម និងឱកាសរបស់យុវជនក្នុងវិស័យវិទ្យាសាស្ត្រ បច្ចេកវិទ្យា សេដ្ឋកិច្ច សង្គម និងនវានុវត្តន៍៕

លោកស្រី សែន ដាវិត | Mrs. Sen David

ជីវប្រវត្តិ ៖ លោកស្រី សែន ដាវិតបានបញ្ចប់ការសិក្សាផ្នែករដ្ឋបាលសាធារណៈ នៅសាកលវិទ្យាល័យភូមិន្ទនីតិសាស្រ្ដ និងវិទ្យាសាស្រ្ដសេដ្ឋកិច្ច។ លោកស្រីមានបទពិសោធន៍ជាអ្នកសារព័ត៌មាន ក្នុងផ្នែកបោះពុម្ព វិទ្យុ និងជាអ្នករាយការណ៍ព័ត៌មានទូរទស្សន៍។