សម្តេចធិបតី ហ៊ុន ម៉ាណែត ជំរុញឱ្យគ្រឹះស្ថានអប់រំពង្រឹងសមត្ថភាពពិតរបស់និស្សិត និងព្រមានពីហានិភ័យនៃការរៀនពឹងផ្អែកទាំងស្រុងលើ AI

ប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានអំពាវនាវយ៉ាងទទូចដល់គ្រប់គ្រឹះស្ថានអប់រំទាំងអស់ ឱ្យបន្តពង្រឹងស្តង់ដារបណ្តុះបណ្តាលឱ្យបានម៉ត់ចត់ ដើម្បីស្រង់យកសមត្ថភាពពិតប្រាកដរបស់និស្សិត។ ជាមួយគ្នានេះ សម្តេចធិបតីបានព្រមានថា ការសិក្សាដែលពឹងផ្អែកទាំងស្រុងលើបច្ចេកវិទ្យាបញ្ញាសិប្បនិម្មិត (AI) នឹងធ្វើឱ្យនិស្សិតបាត់បង់សមត្ថភាពការងារជាក់ស្តែង និងបង្កើតជាវិបត្តិធនធានមនុស្សយ៉ាងធ្ងន់ធ្ងរសម្រាប់ជាតិ។

ការថ្លែងជំរុញ និងដាស់តឿនបែបនេះ ត្រូវបានធ្វើឡើងក្នុងឱកាសដែលសម្តេចធិបតី អញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រជូនដល់និស្សិតនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) នាព្រឹកថ្ងៃទី៦ ខែសីហា ឆ្នាំ២០២៦។

នៅក្នុងប្រសាសន៍សំណេះសំណាល សម្តេចធិបតី ហ៊ុន ម៉ាណែត បានគូសបញ្ជាក់ថា គ្រឹះស្ថានសិក្សាមិនត្រូវមើលឃើញត្រឹមតែជាកន្លែងផ្តល់សញ្ញាបត្រ ឬពិន្ទុល្អនោះឡើយ ប៉ុន្តែត្រូវតែជាកន្លែងកែច្នៃ និងរៀបចំវិធីសាស្ត្របង្រៀនឱ្យស្របតាមបរិបទថ្មី ដែលជំរុញឱ្យនិស្សិតអាចបញ្ចេញសក្តានុពល និងអភិវឌ្ឍជំនាញជាក់ស្តែងរបស់ខ្លួនបានពេញលេញ។

ពាក់ព័ន្ធនឹងការគ្រប់គ្រងគុណភាពអប់រំក្នុងយុគសម័យឌីជីថល សម្តេចធិបតីបានគូសរំលេចដោយក្តីបារម្ភថា ការប្រើប្រាស់ AI ដោយខ្វះការពិចារណានិងពឹងផ្អែកទាំងស្រុង នឹងធ្វើឱ្យនិស្សិតខ្វះសមត្ថភាពពិតប្រាកដនៅពេលឈានជើងចូលទីផ្សារការងារ។

កាលណាសិស្ស-និស្សិតប្រើ AI ទាំងស្រុង នោះនៅពេលចេញទៅធ្វើការ ពួកគេនឹងគ្មានគុណភាពពិតប្រាកដ។ ហើយកុំភ្លេចថា បើសិស្សម្នាក់ៗអត់ច្បាស់លាស់ ប្រទេសជាតិមួយនឹងមានធនធានមនុស្សដែលលំបាក

ជាមួយគ្នានេះ សម្តេចធិបតី ហ៊ុន ម៉ាណែត ក៏បានផ្តល់អនុសាសន៍ឱ្យគ្រប់គ្រឹះស្ថានអប់រំ ព្រមទាំងសិស្ស-និស្សិតទាំងអស់ ត្រូវរួមគ្នាយកចិត្តទុកដាក់លើគុណភាពនៃការសិក្សា និងការស្វ័យអភិវឌ្ឍសមត្ថភាពផ្ទាល់ខ្លួនជាចម្បង ដើម្បីធានាបាននូវប្រសិទ្ធភាពការងារ និងកសាងឧត្តមភាពប្រកួតប្រជែងខ្ពស់នៅលើទីផ្សារការងារទាំងក្នុង និងក្រៅប្រទេស៕

លោក សេក សត្យា | Mr. Sek Sathya

លោក សេក សត្យា មានបទពិសោធន៍ធ្វើការលើវិស័យសារព័ត៌មានរយៈ ពេលជាង ១០ឆ្នាំ និងជាផលិតករកម្មវិធីព័ត៌មានទូរទស្សន៍ ។