សារមន្ទីរ ស.ស.រ សហការជាមួយស៊ីប៉ា បោះពុម្ពសៀវភៅណែនាំសម្រាប់ភ្ញៀវទស្សនា លើកកម្ពស់ការយល់ដឹងអំពីប្រវត្តិសាស្ត្ររបស់ប្រទេសកម្ពុជា

(ភ្នំពេញ) ៖ សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) បានដាក់សម្ពោធជាផ្លូវការនូវសៀវភៅថ្មីមួយក្នុងឈ្មោះ «យើងទៅទស្សនាសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ)» ក្រោមកិច្ចសហការជាមួយគ្រឹះស្ថានបោះពុម្ពផ្សាយស៊ីប៉ា ដោយមានគោលដៅជំរុញការអាន ការអប់រំ និងពង្រីកលទ្ធភាពទទួលបានចំណេះដឹងដល់សាធារណជន។

ពិធីសម្ពោធសៀវភៅនេះ ប្រព្រឹត្តទៅនៅបរិវេណសួនច្បារព្រះបាទអង្គឌួង ក្នុងបរិវេណសារមន្ទីរ ស.ស.រ ដោយមានតំណាងមកពីវិស័យវប្បធម៌ អប់រំ និងវិស័យឯកជនចូលរួមជាច្រើន។

សៀវភៅ «យើងទៅទស្សនាសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ)» មានគោលបំណងបង្ហាញខ្លឹមសារសង្ខេបនៃពិព័រណ៍អចិន្ត្រៃយ៍របស់សារមន្ទីរ តាមរយៈអត្ថបទខ្លីៗ រួមផ្សំជាមួយរូបភាពគំនូរ ដើម្បីឱ្យអ្នកអានគ្រប់វ័យ អាចយល់បានយ៉ាងងាយស្រួល អំពីប្រវត្តិសាស្ត្រសេដ្ឋកិច្ច និងរូបិយវត្ថុកម្ពុជា ដែលមានអាយុកាលជាង ២០០០ ឆ្នាំមកហើយ។ ជាមួយគ្នានេះ សៀវភៅក៏អាចប្រើប្រាស់ជាឧបករណ៍មគ្គុទ្ទេសក៍សម្រាប់ភ្ញៀវទស្សនានៅពេលចូលទស្សនាសារមន្ទីរផងដែរ។

លោក ប្លែស គីលីយ៉ង់ សហប្រធានសារមន្ទីរ ស.ស.រ មានប្រសាសន៍ថា ការផ្តល់លទ្ធភាពឱ្យសាធារណជនគ្រប់មជ្ឈដ្ឋាន ទទួលបានចំណេះដឹងផ្នែកប្រវត្តិសាស្ត្រសេដ្ឋកិច្ច និងរូបិយវត្ថុនៃប្រទេសកម្ពុជា ជាបេសកកម្មមួយដ៏សំខាន់របស់សារមន្ទីរ ស.ស.រ។ ”យើងខ្ញុំមានសេចក្តីសោមនស្សរីករាយ ដែលបានរួមសហការជាមួយគ្រឹះស្ថាន ស៊ីប៉ា ក្នុងការបោះពុម្ពផ្សាយសៀវភៅនេះឡើង ដោយបានផ្តល់នូវភាពងាយស្រួលក្នុងការអាន និងយល់ពីខ្លឹមសារនៃពិព័រណ៍អចិន្ត្រៃយ៍របស់សារមន្ទីរ”។

លោក ហុក សុទ្ធិ អគ្គនាយកគ្រឹះស្ថានបោះពុម្ពផ្សាយស៊ីប៉ា មានប្រសាសន៍ថា គ្រឹះស្ថានបោះពុម្ពផ្សាយស៊ីប៉ា មានមោទកភាពដែលបានចាប់ដៃគូសហការជាមួយសារមន្ទីរ ស.ស.រ ក្នុងការបោះពុម្ពសៀវភៅនេះឡើង ដែលជាធនធានផ្នែកអប់រំដ៏សាមញ្ញ ប៉ុន្តែមានតម្លៃមិនអាចកាត់ថ្លៃបានសម្រាប់យុវជនកម្ពុជា ក៏ដូចជាភ្ញៀវទេសចរអន្តរជាតិ។

សៀវភៅ «យើងទៅទស្សនាសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ)» ត្រូវបានបោះពុម្ពជាបីភាសា គឺភាសាខ្មែរ អង់គ្លេស និងបារាំង ដែលអាចរកទិញបាននៅហាងលក់វត្ថុអនុស្សាវរីយ៍ក្នុងបរិវេណសារមន្ទីរ ស.ស.រ ក៏ដូចជានៅគ្រឹះស្ថានបោះពុម្ពផ្សាយស៊ីប៉ា៕

លោក សេក សត្យា | Mr. Sek Sathya

លោក សេក សត្យា មានបទពិសោធន៍ធ្វើការលើវិស័យសារព័ត៌មានរយៈ ពេលជាង ១០ឆ្នាំ និងជាផលិតករកម្មវិធីព័ត៌មានទូរទស្សន៍ ។