ក្រសួងអប់រំ ៖ ១០ឆ្នាំនៃការប្រើប្រាស់ថវិកាអប់រំ ជួយផ្លាស់ប្តូរវប្បធម៌សាលារៀន និងពង្រឹងគុណភាពអប់រំ

ថ្លែងក្នុងពិធីបើកវេទិកាសាធារណៈស្តីពី ”ថវិកាអប់រំប្រចាំឆ្នាំ២០២៦” និងពិធីផ្សព្វផ្សាយជាផ្លូវការ «របាយការណ៍នៃកម្មវិធីអន្តរជាតិស្តីពីរង្វាយតម្លៃលទ្ធផលសិក្សារបស់សិស្ស ឆ្នាំ២០២៥ (PISA-2025) របស់ប្រទេសកម្ពុជា» នៅថ្ងៃទី៨ ខែកញ្ញា ឯកឧត្តមបណ្ឌិត អ៊ុង បូរាត រដ្ឋលេខាធិការ ក្រសួងអប់រំ យុវជន និងកីឡា លើកឡើងថា តាមរយៈការអនុវត្តថវិកាអប់រំ បានគាំទ្រដល់ការអនុវត្តកម្មវិធីកំណែទម្រង់អប់រំ ក្នុងរយៈពេលជាង ១០ឆ្នាំនេះ ដោយបានផ្លាស់ប្តូរទាំងលទ្ធភាពនៃការទទួលបានសេវាអប់រំគ្រប់កម្រិត ការផ្លាស់ប្តូរវប្បធម៌សាលារៀន និងគុណភាពនៃប្រព័ន្ធអប់រំនៅកម្ពុជា “គុណភាព គណនេយ្យភាព និងនវានុវត្តន៍” ដែលទទួលបានពីកំណែទម្រង់នានា។

រដ្ឋលេខាធិការក្រសួងអប់រំ បន្ថែមថា ការអនុវត្តនេះ បាននិងកំពុងឆ្លើយតបទៅនឹងតម្រូវការនាយុគសម័យសេដ្ឋកិច្ចឌីជីថល និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលបានកំណត់ថា ការអភិវឌ្ឍធនធានមនុស្សជាអាទិភាព ដើម្បីឆ្ពោះទៅសម្រេចចក្ខុវិស័យកម្ពុជា ឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់។

ឯកឧត្តមបណ្ឌិត អ៊ុង បូរាត រដ្ឋលេខាធិការ ក្រសួងអប់រំ យុវជន និងកីឡា

ឯកឧត្តមបណ្ឌិត អ៊ុង បូរាត បញ្ជាក់ថា សម្រាប់ឆ្នាំ២០២៦នេះ កញ្ចប់ថវិការបស់ក្រសួងអប់រំ យុវជន និងកីឡាមានចំនួន ៤ ១៣០,៨ ពាន់លានរៀល (ឬស្មើនឹង ១៦.៨%ធៀបនឹងចំណាយចរន្តថ្នាក់ជាតិ) ដែលក្នុងនោះ ចំណាយលើបន្ទុកបុគ្គលិក ៧៩.៥% និងនៅសល់ប្រមាណ ២០.៥% តែប៉ុណ្ណោះ សម្រាប់ការចំណាយក្រៅបន្ទុកបុគ្គលិក ដូចជា មូលនិធិដំណើរការសាលារៀន ថវិកាអាហារូបករណ៍សិស្សក្រីក្រ ការផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ ថវិកាគាំទ្រមត្តេយ្យសិក្សាសហគមន៍ ការជួសជុលហេដ្ឋារចនាសម្ព័ន្ធអប់រំ ការអភិវឌ្ឍវិស័យកីឡា ការអភិវឌ្ឍយុវជន ការប្រឡងសញ្ញាបត្រមធ្យមសិក្សាបឋមភូមិ ទុតិយភូមិ និងមុខសញ្ញាផ្សេងទៀតដែលមានគោលការណ៍ច្បាស់លាស់។

រដ្ឋលេខាធិការ ក្រសួងអប់រំ បញ្ជាក់បន្ថែមថា ក្រសួងបានផ្ទេរថវិកាទៅរដ្ឋបាលក្រុង ស្រុក ខណ្ឌ ដែលមានឥណទានសរុបចំនួន ១ ៨៥៨,៤ ពាន់លានរៀល ស្មើនឹង ៣៩.៧% នៃឥណទានចំណាយចរន្តសរុប ក្នុងនោះ បន្ទុកបុគ្គលិកចំនួន ៩៣.៨% និងក្រៅបន្ទុកបុគ្គលិកចំនួន ៦.១%។

បើតាម ឯកឧត្តមបណ្ឌិត អ៊ុង បូរាត ក្នុងរយៈពេលប្រមាណជាង ១០ឆ្នាំចុងក្រោយនេះ ចាប់តាំងពីកំណែទម្រង់ស៊ីជម្រៅ និងតាមរយៈលទ្ធផលប្រឡងមធ្យមសិក្សាទុតិយភូមិក្នុងឆ្នាំ២០១៤ វិស័យអប់រំនៅកម្ពុជាបានឈានជើងចូលដល់ដំណាក់កាលផ្លាស់ប្តូរគួរឱ្យកត់សម្គាល់ ដោយទទួលបាននូវវឌ្ឍនភាពជាច្រើនទាំងបរិមាណវិស័យ និងគុណវិស័យ។

វិស័យអប់រំនៅកម្ពុជាបានឈានជើងចូលដល់ដំណាក់កាលផ្លាស់ប្តូរគួរឱ្យកត់សម្គាល់

ឯកឧត្តមបណ្ឌិត អ៊ុង បូរាត ក៏បានវាយតម្លៃខ្ពស់ ចំពោះថ្នាក់ដឹកនាំ ក្រសួង បុគ្គលិកអប់រំគ្រប់លំដាប់ថ្នាក់ ដៃគូអភិវឌ្ឍន៍ ព្រមទាំងអាជ្ញាធរមូលដ្ឋាន វិស័យឯកជន សប្បុរសជន និងសហគមន៍ទាំងអស់ ដែលបានសហការ និងចូលរួមគាំទ្រយ៉ាងសកម្ម ដល់ការអភិវឌ្ឍវិស័យអប់រំនៅកម្ពុជា និងសូមលើកទឹកចិត្តឱ្យមានការបន្តផ្តល់នូវការឧបត្ថម្ភ ការគាំទ្រ និងការចូលរួមតទៅមុខទៀត ដើម្បីជាឧត្តមប្រយោជន៍ដល់កុមារ និងយុវជនកម្ពុជាគ្រប់រូប។

គួរជម្រាបជូនថា វេទិកាសាធារណៈស្តីពី “ថវិកាអប់រំប្រចាំឆ្នាំ២០២៦” គឺជាឆ្នាំទី៣ និងជាព្រឹត្តិការណ៍ប្រចាំឆ្នាំដ៏មានសារៈសំខាន់មួយ ដែលផ្តល់ឱកាសឱ្យថ្នាក់ដឹកនាំ ដៃគូអភិវឌ្ឍ បុគ្គលិកអប់រំ និងសាធារណជនបានជ្រាបអំពី វឌ្ឍនភាព និងសមិទ្ធផលនៃការអនុវត្តកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ និងកម្មវិធីកំណែទម្រង់អប់រំដទៃទៀត ជាពិសេសការប្រើប្រាស់កញ្ចប់ថវិកាប្រចាំឆ្នាំ ដើម្បីគាំទ្រដល់ការអនុវត្ត និងការសម្រេចបានសមិទ្ធផលអប់រំ ទាំងផ្នែកបរិមាណ ទាំងផ្នែកគុណវិស័យ៕

ក្រសួងអប់រំ ៖ ១០ឆ្នាំនៃការប្រើប្រាស់ថវិកាអប់រំ ជួយផ្លាស់ប្តូរវប្បធម៌សាលារៀន និងពង្រឹងគុណភាពអប់រំ

កញ្ញា វ៉ាន គីមសល់ | Ms. Van Kimsal

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន