កសិករវៀតណាមវ័យ ៦៥ឆ្នាំម្នាក់ បានបញ្ចប់ការសិក្សាដោយជោគជ័យនៅកម្រិតបរិញ្ញាបត្រពីសាកលវិទ្យាល័យមួយក្នុងប្រទេសវៀតណាម ទោះបីជាគាត់ត្រូវបានមនុស្សជុំវិញខ្លួនបញ្ចុះបញ្ចូលឱ្យបោះបង់ការសិក្សាជាច្រើនដង ដោយសារវ័យចាស់ និងបញ្ហាហិរញ្ញវត្ថុក៏ដោយ។ សមិទ្ធផលរបស់លោក ត្រូវបានអ្នកជំនាញអប់រំចាត់ទុកថា ជាឧទាហរណ៍ដ៏មានឥទ្ធិពលនៃ «ការរៀនសូត្រពេញមួយជីវិត»។

យោងតាមសារព័ត៌មាន VN Express បានឱ្យដឹងថា លោក Duong Van Bay បានធ្វើដំណើរជាង ២០០គីឡូម៉ែត្រពីខេត្តអានយ៉ាង ទៅកាន់សាកលវិទ្យាល័យវិទ្យាសាស្ត្រសង្គម និងមនុស្សសាស្ត្រ ក្នុងទីក្រុងហូជីមិញ ដើម្បីចូលរួមពិធីប្រគល់សញ្ញាបត្រកាលពីថ្ងៃទី១៧ ខែមេសា។

ក្នុងឯកសណ្ឋាន​បញ្ចប់ការសិក្សា លោកបានទទួលសញ្ញាបត្រផ្នែកសិក្សាវៀតណាម ជាមួយនឹងនិទ្ទេស «ល្អ»។

លោក Bay បាននិយាយទាំងក្តីរំភើបថា «ខ្ញុំសប្បាយចិត្តខ្លាំងណាស់។ ខ្ញុំគេងមិនលក់ទេ ខ្ញុំដើរទៅដើរមកជុំវិញផ្ទះ បន្ទាប់ពីទទួលដំណឹងថា ខ្ញុំបានបញ្ចប់ការសិក្សាពីសាកលវិទ្យាល័យ នៅអាយុ៦៥ឆ្នាំ»។

លោកបានរំលឹកថា កាលពីយុវវ័យ ដោយសារគ្រួសារមានជីវភាពលំបាក លោកបានសម្រេចចិត្តឈប់រៀនក្រោយបញ្ចប់វិទ្យាល័យ ហើយរៀបការជាមួយសង្សាររបស់លោក។

ក្នុងពេលនោះ លោកធ្វើជាកសិករ ខណៈភរិយារបស់លោកប្រកបរបរលក់ដូរតាមរដូវ និងតាមហាង។ ទោះជាយ៉ាងណា លោកនៅតែមានក្តីស្រមៃចង់បន្តការសិក្សា។

លោកបាននិយាយថា «ខ្ញុំចង់បន្តរៀន ព្រោះខ្ញុំមានអារម្មណ៍ថា ខ្លួនឯងទាបជាងមិត្តភក្តិ ដែលភាគច្រើនជាវេជ្ជបណ្ឌិត និងគ្រូបង្រៀន។ ពេលពួកគេនិយាយអំពីជីវិតនៅសាកលវិទ្យាល័យ ខ្ញុំមានអារម្មណ៍ខ្មាសគេ ព្រោះខ្ញុំមិនបានរៀនដល់ថ្នាក់នោះ»។

នៅចុងទសវត្សរ៍ឆ្នាំ១៩៨០ លោកបានដឹងថា សាកលវិទ្យាល័យហិរញ្ញវត្ថុ និងគណនេយ្យ នៅទីក្រុងហូជីមិញ កំពុងទទួលនិស្សិតដែលត្រូវបានផ្ញើដោយអាជ្ញាធរមូលដ្ឋាន។ លោកបានលើកទឹកចិត្តភរិយារបស់លោកឱ្យដាក់ពាក្យចូលរៀន ហើយនាងក៏បានជាប់។ បន្ទាប់ពីភរិយារបស់លោកបញ្ចប់ការសិក្សា និងទទួលបានការងាររដ្ឋនៅដើមទសវត្សរ៍ឆ្នាំ១៩៩០ ស្ថានភាពហិរញ្ញវត្ថុគ្រួសារក៏ចាប់ផ្តើមប្រសើរឡើង។

រហូតដល់ឆ្នាំ២០១៩ ដោយមានការជួយលើកទឹកចិត្តពីមិត្តភក្តិ លោកបានត្រឡប់ទៅរៀនថ្នាក់វិទ្យាល័យជាលើកទី៣។ លើកនេះ ការសិក្សារបស់លោកដំណើរការយ៉ាងរលូន។

បន្ទាប់មក លោកបានសម្រេចចិត្តចូលរៀននៅសាកលវិទ្យាល័យ ដោយមានការគាំទ្រពេញទំហឹងពីភរិយា និងកូនៗ។

ទោះបីមានអាយុច្រើនជាងមិត្តរួមថ្នាក់ភាគច្រើនក៏ដោយ លោក Bay នៅតែចូលរួមសកម្មភាពក្រុម និងការពិភាក្សាក្នុងថ្នាក់យ៉ាងសកម្ម។

ដោយសារមិនសូវចេះប្រើឧបករណ៍ឌីជីថល លោកតែងសរសេរកិច្ចការដោយដៃ ថតរូប ហើយផ្ញើឱ្យមិត្តរួមថ្នាក់ជួយរៀបចំ និងចងក្រង។

បន្ទាប់ពីខិតខំរៀនយ៉ាងយកចិត្តទុកដាក់ លោកបានប្រឡងជាប់កម្រិតភាសាអង់គ្លេស B1 កាលពីខែធ្នូឆ្នាំមុន។

លោកបាននិយាយថា «ការប្រឡងជាប់ B1 អាចជារឿងធម្មតាសម្រាប់យុវជនសម័យនេះ ប៉ុន្តែសម្រាប់ខ្ញុំ វាជាអព្ភូតហេតុមួយ»។

លោកស្រី Nguyen Thi Quoc Minh សាស្ត្រាចារ្យនៅសាកលវិទ្យាល័យវិទ្យាសាស្ត្រសង្គម និងមនុស្សសាស្ត្រ បាននិយាយថា ទោះបីមានវ័យចាស់ និងរស់នៅឆ្ងាយពីសាលាក៏ដោយ លោក Bay តែងចូលរៀនទៀងទាត់ និងចូលរួមពិភាក្សាក្នុងថ្នាក់យ៉ាងសកម្ម។

លោកស្រីបានសរសើរការតស៊ូរបស់លោក ក្នុងការជម្នះឧបសគ្គលើមុខវិជ្ជាភាសាអង់គ្លេស និងព័ត៌មានវិទ្យា។ លោកស្រីបន្ថែមថា «ខ្ញុំពិតជាគោរព និងកោតសរសើរគាត់។ គាត់គឺជាឧទាហរណ៍ដ៏មានឥទ្ធិពលនៃការរៀនសូត្រពេញមួយជីវិត»៕