ក្នុងយុគសម័យបញ្ញាសិប្បនិម្មិត​ (AI) កំពុងរីកចម្រើនយ៉ាងរហ័ស គ្រូបង្រៀនមិនអាចប្រកែកមិនប្រើប្រាស់បច្ចេកវិទ្យាឆ្លាតវៃនេះឡើយ។ ទន្ទឹមគ្នានេះ មានគ្រូបង្រៀនជាច្រើន ទទួលស្គាល់ថា AI ជាជំនួយការដ៏ឆ្លាតវៃសម្រាប់លើកកម្ពស់ដំណើរការបង្រៀន និងលទ្ធផលសិក្សាសិស្សកាន់តែប្រសើរ។

អ្នកគ្រូ សាំង សុខៃ គ្រូបង្រៀនឯកទេសជីវវិទ្យា នៃសាលារៀនជំនាន់ថ្មី វិទ្យាល័យជាស៊ីមព្រែកអញ្ចាញ លើកឡើងថា បច្ចុប្បន្ននេះ គ្រូបង្រៀនមិនអាចប្រកែកមិនប្រើប្រាស់ AI បានទេ ដោយសារបច្ចេកវិទ្យាដ៏ឆ្លាតវៃនេះ គឺជាជំនួយការដ៏ល្អរបស់គ្រូបង្រៀន។

អ្នកគ្រូ សុខៃ ​ឱ្យដឹងថា អ្នកគ្រូប្រើប្រាស់ AI ដើម្បីជួយសម្រួលដល់កិច្ចការរដ្ឋបាល និងសម្រាប់ផ្ដល់ជាគោលគំនិតល្អៗ រួមមាន ការបង្កើតកិច្ចតែងការបង្រៀន ល្បែងសិក្សាថ្មីៗ សន្លឹកកិច្ចការតាមបែបវិទ្យាសាស្រ្ត​ សំណួរស្រាវជ្រាវជ្រៅៗដែលមិនមានក្នុងសៀវភៅសិក្សាគោល ការបង្កើតវីដេអូថ្មីៗទាក់ទងជាមួយមេរៀន ការពិសោធខ្លីៗ ដែលធ្វើឱ្យសិស្សងាយយល់មេរៀន។

ពាក់ព័ន្ធនឹងការប្រើប្រាស់ AI នេះ អ្នកគ្រូ សុខៃ លើកឡើងថា កាលពីមុន អ្នកគ្រូធ្លាប់ជួបបញ្ហាពិបាកក្នុងការសរសេរពាក្យបញ្ជា (Prompt) ប៉ុន្តែនៅពេលចូលរួមចងក្រងសៀវភៅ “មគ្គុទេសក៍ជំនួយការប្រើប្រាស់បញ្ញាសិប្បនិម្មិត AI សម្រាប់គ្រូបង្រៀន” ដែលក្រសួងអប់រំ​ ឱ្យគ្រូបង្រៀនទាញយកទៅប្រើប្រាស់ មានបង្ហាញរូបមន្តក្នុងសរសេរ Prompt ឱ្យបានត្រឹមត្រូវ ទើបជួយឱ្យយល់ច្បាស់ជាងមុនពីរបៀបប្រើប្រាស់ AI។

“ពីមុនយើងប្រើពេលច្រើនដើម្បីធ្វើកិច្ចតែការ ធ្វើសន្លឹកកិច្ចការ ឥឡូវនេះ យើងអាចប្រមូលផ្ដុំពេល ប្រមូលផ្ដុំគំនិត ទៅលើដំណើរការបង្រៀន ដោយសារយើងមានជំនួយការពិសេស គឺ AI ចាំជួយយើង ឱ្យតែយើងចេះសួរ និងចេះប្រើប្រាស់”

អ្នកគ្រូ សាំង សុខៃ បន្ថែមថា ការប្រើប្រាស់ AI ក៏ផ្ដល់ផលប៉ះពាល់ដែរ ប្រសិនបើគ្រូបង្រៀនមិនចេះច្បិចយកគំនិតពី AI ហើយច្នៃឱ្យទៅជាសិល្បៈបង្រៀន ដោយយកចម្លើយរបស់ AI មកប្រើប្រាស់ទាំងស្រុង។ ម៉្យាងវិញទៀត កម្មវិធីរបស់ AI មួយចំនួនតម្រូវឱ្យគ្រូបង្រៀនបង់ថវិកាទើបប្រើប្រាស់បាន នេះក៏ជាបញ្ហាប្រឈមមួយរបស់គ្រូបង្រៀនផងដែរ។ អ្នកគ្រូ សាំង សុខៃ ក៏បានលើកទឹកចិត្តគ្រូបង្រៀនទាំងអស់ត្រូវដើរឱ្យទាន់សម័យកាលបច្ចេកវិទ្យា និងចេះប្រើប្រាស់បច្ចេកវិទ្យា ដើម្បីឱ្យងាយស្រួលក្នុងការគ្រប់គ្រងលទ្ធផលសិក្សារបស់សិស្ស។

លោក រ៉ា វិចិត្រា គ្រូបង្រៀនគីមីវិទ្យា នៃសាលារៀនជំនាន់ថ្មី វិទ្យាល័យព្រែកលៀប និងជាគណៈកម្មការអភិវឌ្ឍវិជ្ជាជីវជាប្រចាំ (CPD) មានប្រសាសន៍ថា AI ពិតជាអាចជួយការងារគ្រូបង្រៀនបានច្រើន ហើយបច្ចុប្បន្ន លោកក៏កំពុងប្រើ AI ជាជំនួយការក្នុងការបង្រៀន និងរៀនផងដែរ។

លោក វិចិត្រា បញ្ជាក់ថា លោកប្រើ AI ឱ្យជួយបង្កើតជាបទបង្ហាញបង្រៀន (Slide), បង្កើតលំហាត់ វិញ្ញាសាប្រឡង, បង្កើតមាតិកា, បង្កើតរូបភាពស្អាតៗ រូបផែនទីគំនិត និងយករូបភាពពីសៀវភៅសិក្សាគោល ស-ខ្មៅ បម្លែងទៅជា វីដេអូអប់រំខ្លី, ពាក្យពិបាកចាំបង្កើតជាចម្រៀង ដែលធ្វើឱ្យសិស្សងាយស្ដាប់ ចាប់អារម្មណ៍ច្រើន។ ជាពិសេស ជួយសន្សំសំចៃ​កិច្ចការរដ្ឋបាល ដូចជា ការធ្វើអត្រាកំណែ ក៏ដូចជា ការរង្វាយតម្លៃលទ្ធផលសិស្ស។

គ្រូបង្រៀនគីមីវិទ្យា នៃសាលារៀនជំនាន់ថ្មី វិទ្យាល័យព្រែកលៀប បន្ថែមថា AI ជួយគាំទ្រការបង្រៀនមុខវិជ្ជាស្ទែម និងបច្ចេកវិទ្យា ដូចជា ការជួយរកប្រធានបទងាយៗសម្រាប់សិស្សធ្វើ ដោយគ្រាន់តែផ្ដល់តម្រូវការ និងផលវិបាក នោះវានឹងដោះស្រាយបញ្ហាជូនភ្លាមៗ។ ម៉្យាងវិញទៀត AI ក៏ជួយក្នុងការពង្រឹង និងបណ្ដុះបណ្ដាលផ្សេងៗ ដូចជា ការចុះទៅបណ្ដុះបណ្ដាលគ្រូបង្រៀននៅតាមខេត្ត ដោយគ្រាន់តែប្រាប់ AI ពីមូលហេតុ តម្រូវការ រយៈពេល ស្ថានភាព នោះ AI នឹងជួយផ្ដល់ចម្លើយ ដោយយើងគ្រាន់តែកែសម្រួលបន្ថែម រួចអាចយកមកប្រើប្រាស់បាន។

“កាលពីមុន ខ្ញុំចំណាយពេលខ្ទង់ ៤ម៉ោង ធ្វើកិច្ចការមួយ តែនៅពេលប្រើ AI ជួយសម្រួលធ្វើកិច្ចការសល់ពេលត្រឹមតែ ៣០នាទីទៅ៤០នាទី”

លោក រ៉ា វិចិត្រា បញ្ជាក់ដែរថា ការប្រើប្រាស់ AI ក៏មានការលំបាកមួយចំនួនដែរ នៅពេលមិនចេះពីរបៀបសរសេរពាក្យបញ្ជា (Prompt) នោះចម្លើយចេញមក មិនចំគោលដៅដែលយើងចង់បាន។ លោកគ្រូ វិចិត្រា បន្តថា បន្ទាប់ពីរៀនស្រាវជ្រាវ ទើបអាចធ្វើការងារច្រើន។

គ្រូបង្រៀនគីមីវិទ្យា នៃសាលារៀនជំនាន់ថ្មី វិទ្យាល័យព្រែកលៀប ក៏បានសំណូមពរទៅលោកគ្រូ អ្នកគ្រូ និងអ្នកអប់រំ កុំទាន់ទុកចិត្ត AI ទាំងស្រុង ព្រោះចម្លើយទាំងអស់ នឹងផ្ដល់នូវកំហុសឆ្គងមួយចំនួន ដូច្នេះ តម្រូវឱ្យគ្រូបង្រៀនតាមមុខវិជ្ជាផ្ទាល់ ត្រូវតែត្រួតពិនិត្យឡើងវិញឱ្យបានច្បាស់ មុននឹងយកទៅប្រើប្រាស់ក្នុងថ្នាក់រៀន។

កាលពីថ្ងៃទី៧ ខែឧសភា កន្លងទៅ ក្រសួងអប់រំ យុវជន និងកីឡា បានដាក់ចេញនូវវគ្គសិក្សា មគ្គុទេសក៍ជំនួយការប្រើប្រាស់បញ្ញាសិប្បនិម្មិត AI សម្រាប់គ្រូបង្រៀន ដើម្បីជួយឱ្យការអប់រំនៅកម្ពុជាដើរទាន់និន្នាការសកល និងជំរុញការអប់រំ STEM ឱ្យកាន់តែប្រសើរឡើង។ តាមរយៈឯកសារថ្មីនេះ លោកគ្រូ អ្នកគ្រូ នឹងយល់ច្បាស់អំពីបច្ចេកទេសប្រើប្រាស់ AI, ការសរសេរ Prompt, បង្កើនអន្តរកម្មក្នុងថ្នាក់, ក្រមសីលធម៌ និងសុវត្ថិភាព៕