អ្នកនាំពាក្យក្រសួងការងារ ៖ រយៈពេល៣ឆ្នាំចុងក្រោយ យុវជនក្រីក្រ និងប្រជាពលរដ្ឋជិត ៥០ម៉ឺននាក់ មានជំនាញជាក់លាក់

ក្នុងរយៈពេល ៣៤ខែ ពោលគឺ ចាប់ពីខែកញ្ញា ឆ្នាំ២០២៣ ដល់ខែមិថុនា ឆ្នាំ២០២៦ យុវជន និងប្រជាពលរដ្ឋជិត ៥០ម៉ឺននាក់ ទទួលបានការបណ្ដុះបណ្ដាលជំនាញបច្ចេកទេស និងវិជ្ជាជីវៈ ដែលនេះ គឺជាគន្លឹះដ៏សំខាន់សម្រាប់ទទួលបានការងារសមរម្យ ប្រាក់ចំណូលប្រសើរ និងអនាគតកាន់តែច្បាស់លាស់។

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ក្នុងចំណោមអ្នកទទួលការបណ្ដុះបណ្ដាលសរុបប្រមាណ ៤៩ម៉ឺននាក់ មានប្រមាណ ៤១ម៉ឺន៥ពាន់នាក់ ទទួលការបណ្ដុះបណ្ដាលក្រោមក្រសួងការងារ និងប្រមាណ ៧,៧ម៉ឺននាក់ ទទួលការបណ្ដុះបណ្ដាលតាមរយៈគម្រោងមូលនិធិអភិវឌ្ឍន៍ជំនាញ (SDF)។

ក្នុងនោះ យុវជនជាង ២៧,៦ម៉ឺននាក់ មកពីគ្រួសារក្រីក្រ និងគ្រួសារងាយរងហានិភ័យ បានទទួលការបណ្ដុះបណ្ដាលក្រោមកម្មវិធីជាតិបណ្ដុះបណ្ដាលជំនាញវិជ្ជាជីវៈ និងបច្ចេកទេសសម្រាប់យុវជនគោលដៅចំនួន ១,៥លាននាក់។

”លទ្ធផលនេះមិនមែនគ្រាន់តែជាតួលេខនៃអ្នកចូលរៀនប៉ុណ្ណោះទេ ប៉ុន្តែជាការផ្តល់ជំនាញពិតប្រាកដ ផ្តល់ឱកាសការងារ បង្កើនប្រាក់ចំណូល និងកសាងអនាគតថ្មីជូនយុវជន និងប្រជាពលរដ្ឋ ជាពិសេសអ្នកមកពីគ្រួសារក្រីក្រ និងគ្រួសារងាយរងហានិភ័យ”
លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ

អ្នកនាំពាក្យរូបនេះបន្តថា ជំនាញជាក់លាក់មួយប្រៀបដូចជាទ្រព្យសម្បត្តិជាប់ខ្លួន ដែលអាចជួយឱ្យយុវជនមានសមត្ថភាពចូលទីផ្សារការងារ ទទួលបានការងារសមរម្យ ឬអាចបង្កើតមុខរបរដោយខ្លួនឯង ដោយមិនចាំបាច់ពឹងផ្អែកតែលើសញ្ញាបត្រទូទៅ។

តាមរយៈការបណ្ដុះបណ្ដាល TVET សិស្ស និងយុវជនមិនត្រឹមតែរៀនទ្រឹស្តីក្នុងថ្នាក់ប៉ុណ្ណោះទេ ប៉ុន្តែថែមទាំងទទួលបានការអនុវត្តជាក់ស្តែងនៅតាមរោងជាង មន្ទីរពិសោធន៍ មជ្ឈមណ្ឌលបណ្ដុះបណ្ដាល សហគ្រាស ក្រុមហ៊ុន និងរោងចក្រ។ ការផ្សារភ្ជាប់រវាងការសិក្សា និងតម្រូវការជាក់ស្តែងរបស់និយោជក ជួយឱ្យអ្នកសិក្សាមានជំនាញដែលអាចយកទៅប្រើប្រាស់បានភ្លាមៗ។

ដើម្បីធានាគុណភាព និងភាពឆ្លើយតបនឹងទីផ្សារការងារ ក្រសួងបានរៀបចំស្តង់ដាបណ្ដុះបណ្ដាលចំនួន ២៥៦គុណវុឌ្ឍិ គ្របដណ្ដប់លើ ១១៦មុខជំនាញ ព្រមទាំងកញ្ចប់សិក្សាផ្អែកលើសមត្ថភាពចំនួន ៣៩៩ម៉ូឌុល ស្មើនឹង ២ ៦២០មេរៀន។

ទន្ទឹមនឹងនេះ គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈសាធារណៈ និងឯកជន បានកើនដល់ចំនួន ២៦៣គ្រឹះស្ថាន ខណៈគ្រូបច្ចេកទេសជាង ៣ ៦០០នាក់ បានទទួលការបណ្ដុះបណ្ដាលបន្ថែម ដើម្បីលើកកម្ពស់គុណភាពនៃការបង្រៀន និងការអនុវត្ត។

ភាពជាដៃគូជាមួយវិស័យឯកជនក៏ត្រូវបានពង្រីក ដើម្បីឱ្យការបណ្ដុះបណ្ដាលស្របតាមជំនាញដែលសហគ្រាសកំពុងត្រូវការ។ ក្នុងរយៈពេល៣៤ខែ កិច្ចសហប្រតិបត្តិការក្នុងវិស័យ TVET ត្រូវបានពង្រឹងតាមរយៈអនុស្សរណៈនៃការយោគយល់គ្នាសរុប ១ ២៦០ និងដៃគូទំនាក់ទំនងសហការចំនួន ៦ ២១៨។

ជាមួយគ្នានេះ លោក ស៊ុន មេសា ក៏បានអំពាវនាវដល់យុវជនឱ្យចាប់យកឱកាសសិក្សាជំនាញ TVET និងស្នើដល់មាតាបិតា អាណាព្យាបាល ឱ្យលើកទឹកចិត្តកូនចៅជ្រើសរើសជំនាញដែលស្របនឹងចំណង់ចំណូលចិត្ត សមត្ថភាព និងតម្រូវការទីផ្សារការងារ។ លោកថា ការជ្រើសរើសរៀនជំនាញ គឺជាការជ្រើសរើសអនាគត។ ជំនាញជាក់លាក់មួយអាចនាំទៅរកការងារសមរម្យ ប្រាក់ចំណូលមានស្ថិរភាព និងជីវភាពកាន់តែប្រសើរ ព្រមទាំងរួមចំណែកកសាងកម្លាំងពលកម្មប្រកបដោយជំនាញ ផលិតភាព និងភាពប្រកួតប្រជែងសម្រាប់សេដ្ឋកិច្ចកម្ពុជា៕

លោក សេក សត្យា | Mr. Sek Sathya

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន