អគ្គរាជទូតអង់គ្លេសប្រចាំព្រះរាជាណាចក្រកម្ពុជា លោក Dominic Williams បានលើកឡើងថា ការអានសៀវភៅជាគន្លឹះសំខាន់មួយដែលជួយឱ្យលោកអាចឈានដល់តំណែងខ្ពស់ក្នុងវិស័យការទូត ហើយបើគ្មានទម្លាប់អាន លោកមិនអាចឈានដល់ចំណុចនេះបានឡើយ។

លោកបានថ្លែងបែបនេះ ក្នុងឱកាសចូលរួមពិព័រណ៍សៀវភៅខ្នាតតូចលើកទី៥ ដែលបានប្រារព្ធឡើងចាប់ពីថ្ងៃទី២ ដល់ទី៣ ខែមេសា ឆ្នាំ២០២៦ នៅមជ្ឈមណ្ឌលខេមរសិក្សា ក្នុងវត្តដំណាក់ ក្រុងសៀមរាប ខេត្តសៀមរាប។

អគ្គរាជទូតរូបនេះបានលើកទឹកចិត្តឱ្យសាធារណជនបង្កើនទម្លាប់អានសៀវភៅ ដោយបញ្ជាក់ថា សៀវភៅបានផ្តល់បទពិសោធន៍ និងឱកាសជាច្រើនសម្រាប់ជីវិតរបស់លោក។

លោកបានមានប្រសាសន៍ថា «ខ្ញុំធំឡើងក្នុងគ្រួសារដែលមិនសូវធូរធារ ហើយក៏មិនមែនជាគ្រួសារអ្នកមានឋានៈខ្ពស់ដែរ។ ខ្ញុំមិនធ្លាប់ស្គាល់ថា ការទូតជាអ្វីនោះទេ។ ការយល់ដឹងអំពីវិស័យនេះកើតឡើងតាមរយៈសៀវភៅ ដូច្នេះសៀវភៅបានបង្ហាញផ្លូវអាជីពដែលខ្ញុំកំពុងធ្វើសព្វថ្ងៃ»។

លោកបានបន្ថែមថា សៀវភៅជួយឱ្យលោកយល់អំពីវប្បធម៌ផ្សេងៗ និងមនុស្សពីបរិបទខុសៗគ្នា ជួយបង្កើនសមត្ថភាពក្នុងការទំនាក់ទំនង និងភ្ជាប់ទំនាក់ទំនងជាមួយអ្នកដទៃ។

លោកបានបញ្ជាក់បន្ថែមថា ក្នុងសម័យបច្ចេកវិទ្យា AI សព្វថ្ងៃនេះ ចំណេះដឹងបច្ចេកទេសអាចមានសារៈសំខាន់តិចជាងមុន ប៉ុន្តែជំនាញទំនាក់ទំនងមនុស្ស និងសមត្ថភាពយល់ដឹងពីអ្នកដទៃ នឹងកាន់តែមានសារៈសំខាន់ខ្លាំងឡើង។

អ្នកស្រី ឈ ស៊ីវឡេង ប្រធានបណ្ណាល័យមជ្ឈមណ្ឌលខេមរសិក្សា បានឱ្យដឹងថា ពិព័រណ៍សៀវភៅខ្នាតតូចរយៈពេល២ថ្ងៃនេះ បានបញ្ចប់ដោយរលូន និងទាក់ទាញអ្នកចូលរួមប្រមាណ ៣,៧០០ នាក់។

កម្មវិធីនេះមានគោលបំណងបណ្តុះវប្បធម៌អាន ព្រោះការអានមានសារៈសំខាន់យ៉ាងខ្លាំងសម្រាប់ជីវិតប្រចាំថ្ងៃ

អ្នកស្រី ឈ ស៊ីវឡេង ប្រធានបណ្ណាល័យមជ្ឈមណ្ឌលខេមរសិក្សា

សូមជម្រាបថា ពិព័រណ៍សៀវភៅខ្នាតតូចនេះរួមមានសកម្មភាពជាច្រើន ដូចជា ការតាំងលក់សៀវភៅ ការចែករំលែកបទពិសោធន៍ពីអ្នកនិពន្ធ និងអ្នកជំនាញ អ្នកផលិតមាតិកា ក៏ដូចជាសកម្មភាពសម្រាប់កុមារ ដើម្បីបង្កើតបរិយាកាសជួបជុំរវាងអ្នកអាន សិស្សនិស្សិត អ្នកអប់រំ និងសហគមន៍ ក្នុងការផ្លាស់ប្តូរចំណេះដឹង និងលើកកម្ពស់ទម្លាប់អាន៕