សម្រាប់សិស្សានុសិស្សដែលទើបប្រឡងជាប់សញ្ញាបត្រមធ្យមសិក្សាទុតិយភូមិ ហើយមានបំណងចង់បានអាហារូបករណ៍សិក្សាដោយឥតបង់ថ្លៃ ពេលនេះឱកាសបានមកដល់ហើយ សាកលវិទ្យាល័យសិល្បៈភ្នំពេញ បានប្រកាសផ្តល់អាហារូបករណ៍ ១០០% ចំនួន ៥៥ កន្លែង ក្នុងឆ្នាំសិក្សា២០២៥-២០២៦។

ចំពោះអាហារូបករណ៍ទាំង ៥៥កន្លែង ត្រូវបានផ្តល់ជូនទៅលើមុខជំនានចំនួន ៣ រួមមាន ជំនាញអប់រំភាសាអង់គ្លេស ចំនួន ២០ កន្លែង, ការអប់រំភាសាកូរ៉េ ចំនួន ២០ កន្លែង និងជំនាញបច្ចេកវិទ្យាព័ត៌មាន ចំនួន ១៥ កន្លែង សិក្សារយៈពេល ៤ឆ្នាំ។

អាហារូបករណ៍នេះ ផ្ដល់ជូនសម្រាប់សិស្សានុសិស្សដែលបានប្រឡង ជាប់សញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា ២០២៥-២០២៦ ដោយជោគជ័យ និងមានចំណេះដឹង ភាសាអង់គ្លេសចាប់ពីកម្រិតមធ្យមឡើងទៅ។

លក្ខខណ្ឌទទួលបានអាហារូបករណ៍៖

 -បេក្ខជនត្រូវប្រឡងជាប់ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់ឆ្នាំសិក្សា ២០២៥-២០២៦។
-បេក្ខជនត្រូវមានសមត្ថភាពប្រើប្រាស់ភាសាអង់គ្លេសក្នុងកម្រិតល្អ។
-នៅពេលមកដាក់ពាក្យ បេក្ខជនត្រូវបញ្ជាក់ថា ខ្លួនមកដាក់ពាក្យសម្រាប់ «អាហារូបករណ៍ President Chan Hae Lee»។

ព័ត៌មានបន្ថែម សិស្សអាចទាក់ទងសាកលវិទ្យាល័យតាមរយៈ អាសយដ្ឋាន៖ ផ្ទះលេខ ១៣៤A ផ្លូវ Pasteur លេខ ៥១ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ឬតាមរយៈទូរស័ព្ទ៖ ០១២ ២៥៥ ១៧៤ ចាប់ពីពេលនេះ រហូតដល់ថ្ងៃទី២៦ ខែកញ្ញា ឆ្នាំ២០២៦ ជាកំហិត៕