ភ្នំពេញ ៖ រាជរដ្ឋាភិបាលកម្ពុជាបានអះអាងយ៉ាងច្បាស់ថា មិនមានគម្រោង ឬផែនការណាមួយក្នុងការលុបឈ្មោះ កាត់បន្ថយ ឬច្របាច់បញ្ចូលគ្នារវាងក្រសួង-ស្ថាប័នណាមួយឡើយ។ គោលដៅរបស់រាជរដ្ឋាភិបាល គឺពង្រឹងតួនាទីខ្លួនឱ្យបានល្អ សហការគ្នារវាងក្រសួង-ស្ថាប័ន និងពង្រឹងការងារផ្ទៃក្នុងរបស់ខ្លួនឱ្យល្អប្រសើរសម្រាប់ប្រយោជន៍ប្រជាជន និងប្រទេសជាតិ។ នេះជាប្រសាសន៍របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ថ្លែងក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋនៅស្រុកខ្សាច់កណ្តាល ខេត្តកណ្តាល នាព្រឹកថ្ងៃទី២៩ ខែកក្កដា ឆ្នាំ២០២៦។​

សម្ដេចបានសង្កត់ធ្ងន់ថា ៖

«រដ្ឋាភិបាលគ្មានគម្រោងកែទម្រង់ កាត់ក្រសួង-ស្ថាប័នណាមួយឡើយ ប៉ុន្តែក្រសួង-ស្ថាប័ននីមួយៗត្រូវវិភាគមុខងារខ្លួនឯង ដើម្បីសម្រួចឱ្យចំការងារ»។

ជាមួយគ្នានេះ សម្តេចមហាបវរធិបតី ហ៊ុន ម៉ាណែត បានណែនាំឱ្យបន្តពង្រឹងអភិបាលកិច្ចស្ថាប័ន, ទាំងថ្នាក់កណ្តាល និង ថ្នាក់ក្រោមជាតិបន្ថែមទៀត ដោយផ្តោតលើ (១). ការកែលម្អបរិយាកាសការងារ និង កន្លែងធ្វើការ ឱ្យស័ក្តិសមជាមជ្ឈមណ្ឌលផ្តល់សេវាកម្មរៀបចំដែនដី នគរូបនីយកម្ម និង សំណង់, (២). ការកសាងមូលធនមនុស្ស ដោយពង្រឹងសមត្ថភាព និង ក្រមសីលធម៌វិជ្ជាជីវៈ របស់មន្រ្តីគ្រប់លំដាប់ថ្នាក់ ឱ្យស័ក្តិសមជាទីពឹងរបស់ប្រជាពលរដ្ឋ, (៣).ពង្រឹងភាពស្អាតស្អំ ជាពិសេសត្រូវពង្រឹងយន្តការត្រួតពិនិត្យផ្ទៃក្នុងរបស់ខ្លួន ដើម្បីទប់ស្កាត់ភាពអសកម្ម និង ការប្រើប្រាស់តួនាទីខុសច្បាប់ ព្រមទាំងចាត់វិធានការតឹងរឹង ប្រសិន មានករណីនេះកើតឡើង,(៤).ពង្រឹងយន្តការតាមដានការអនុវត្ត ច្បាប់ គោលនយោ​បាយ និង បទបញ្ជា ដែលរាជរដ្ឋាភិបាលបានដាក់ចេញ ដើម្បីវាយតម្លៃការអនុវត្តគោលនយោបាយ ធៀបនឹងការអនុវត្តជាក់ស្តែង, ធានាបាននូវការបម្រើសេវាជូនប្រជាពលរដ្ឋ ប្រកបដោយ ប្រសិទ្ធភាព និង វិជ្ជាជីវៈ និង (៥). បន្តជំរុញការធ្វើឌីជីថលូបនីយកម្ម, ទាំងក្នុងក្របខ័ណ្ឌការងារ និង ការផ្តល់សេវាសាធារណៈ៕