គ្រឹះស្ថាន ខេមា និង Mission Alliance រួមគ្នាពង្រឹងចំណេះដឹងហិរញ្ញវត្ថុ និងជំនាញអាជីវកម្មដល់សហគ្រិនខ្នាតមីក្រូ

១៩ សីហា ២០២៦ — គ្រឹះស្ថាន ខេមា មីក្រូហិរញ្ញវត្ថុ លីមីតធីត និង Mission Alliance ប្រចាំប្រទេសកម្ពុជា បានចុះអនុស្សរណៈយោគយល់គ្នា ដើម្បីរួមគ្នាលើកកម្ពស់ចំណេះដឹងហិរញ្ញវត្ថុ និងជំនាញអាជីវកម្មដល់ម្ចាស់អាជីវកម្មខ្នាតមីក្រូ និងបុគ្គលស្វ័យនិយោជន៍ នៅតាមតំបន់ប្រតិបត្តិការរបស់គ្រឹះស្ថាន ខេមា។

កិច្ចសហការនេះមានគោលបំណងជួយឱ្យសហគ្រិនខ្នាតមីក្រូ និងបុគ្គលស្វ័យនិយោជន៍ មានចំណេះដឹង និងឧបករណ៍ជាក់ស្តែងសម្រាប់គ្រប់គ្រងអាជីវកម្ម និងហិរញ្ញវត្ថុប្រចាំថ្ងៃ ដើម្បីពង្រឹងសមត្ថភាពរកប្រាក់ចំណូល និងភាពធន់ផ្នែកហិរញ្ញវត្ថុរបស់គ្រួសារ និងសហគមន៍។

ក្រោមអនុស្សរណៈនេះ Mission Alliance នឹងសហការជាមួយគ្រឹះស្ថាន ខេមា ក្នុងការផ្តល់ការស្វ័យសិក្សាតាមរយៈ Roksi Chatbot ការបណ្តុះបណ្តាលដោយគ្រូបង្គោល និងការរៀបចំសិក្ខាសាលា។ ខ្លឹមសារនឹងផ្តោតលើការគ្រប់គ្រងអាជីវកម្មខ្នាតមីក្រូ និងចំណេះដឹងហិរញ្ញវត្ថុ ដែលអាចយកទៅអនុវត្តបានក្នុងជីវភាព និងការប្រកបអាជីវកម្មប្រចាំថ្ងៃ។

លោក Biju Abraham នាយក Mission Alliance ប្រចាំប្រទេសកម្ពុជា បានមានប្រសាសន៍ថា៖ “សកម្មភាពអាជីវកម្មខ្នាតតូច និងក្រៅប្រព័ន្ធ មានតួនាទីសំខាន់ក្នុងការរក្សាជីវភាព និងភាពធន់របស់គ្រួសារ និងសហគមន៍ជនបទ។ តាមរយៈគំនិតផ្តួចផ្តើម «រកស៊ី» យើងចង់ផ្តល់ការគាំទ្រដល់បុគ្គលស្វ័យនិយោជន៍ និងសហគ្រិនខ្នាតមីក្រូ ដែលភាគច្រើនជាកសិករ អ្នកលក់ដូរតូចតាច និងសិប្បករ ដែលមានក្តីស្រមៃចង់ពង្រីកអាជីវកម្ម និងលើកកម្ពស់ជីវភាព ប៉ុន្តែមានកម្រិតក្នុងការទទួលបានការបណ្តុះបណ្តាល និងធនធានគាំទ្រ។ កិច្ចសហការជាមួយ ខេមា នឹងជួយនាំចំណេះដឹងទាំងនេះឱ្យកាន់តែខិតជិតទៅដល់សហគមន៍ដែលត្រូវការវា”។

អ្នកស្រី ឌិត នីតា ប្រធានក្រុមប្រឹក្សាភិបាល នៃគ្រឹះស្ថាន ខេមា បានមានប្រសាសន៍ថា៖ “សុខុមាលភាពហិរញ្ញវត្ថុរបស់អតិថិជន ខេមា ក៏ជាសុខុមាលភាពរបស់គ្រឹះស្ថាន ខេមា ដែរ។ ការលើកកម្ពស់ចំណេះដឹងហិរញ្ញវត្ថុ គឺជាផ្នែកមួយដ៏សំខាន់នៃការផ្តល់សេវាហិរញ្ញវត្ថុប្រកបដោយការទទួលខុសត្រូវ។ តាមរយៈកិច្ចសហការជាមួយ Mission Alliance យើងចង់ឱ្យអតិថិជនមិនត្រឹមតែទទួលបានលទ្ធភាពប្រើប្រាស់សេវាហិរញ្ញវត្ថុប៉ុណ្ណោះទេ ប៉ុន្តែថែមទាំងមានចំណេះដឹង និងសមត្ថភាពក្នុងការប្រើប្រាស់ហិរញ្ញវត្ថុប្រកបដោយប្រសិទ្ធភាព ដើម្បីកសាងអាជីវកម្ម គ្រួសារ និងសហគមន៍ដែលមានភាពធន់ជាងមុន”។

Mission Alliance មានបេសកកម្មកាត់បន្ថយភាពក្រីក្រ និងលើកកម្ពស់យុត្តិធម៌ តាមរយៈភាពជាដៃគូជាមួយអង្គការសង្គមស៊ីវិល ក្រសួង-ស្ថាប័នរដ្ឋ និងវិស័យឯកជន។

កិច្ចសហការនេះក៏ជាផ្នែកមួយនៃការបន្តការងាររបស់គ្រឹះស្ថាន ខេមា ក្នុងការលើកកម្ពស់សុខុមាលភាព និងភាពធន់របស់អតិថិជន និងសហគមន៍។ ចាប់ពីចុងឆ្នាំ២០២៥ គ្រឹះស្ថាន ខេមា បានផ្សព្វផ្សាយចំណេះដឹងហិរញ្ញវត្ថុ សុវត្ថិភាពហិរញ្ញវត្ថុសហគមន៍ និងចំណេះដឹងទាក់ទងនឹងទឹកស្អាតនិងអនាម័យ ដល់អតិថិជនគោលដៅ។

គិតត្រឹមខែកក្កដា ឆ្នាំ២០២៦ បុគ្គលិកគ្រឹះស្ថាន ខេមា បានផ្សព្វផ្សាយចំណេះដឹងទាំងនេះដល់អតិថិជនគោលដៅចំនួន ២.៧៥៨ នាក់ ក្នុងនោះប្រមាណ ៥៩% ជាស្ត្រី។ តាមរយៈកិច្ចសហការថ្មីនេះ គ្រឹះស្ថាន ខេមា និង Mission Alliance នឹងបន្តពង្រីកឱកាសឱ្យសហគ្រិនខ្នាតមីក្រូ និងបុគ្គលស្វ័យនិយោជន៍ ទទួលបានចំណេះដឹងដែលអាចជួយពួកគេធ្វើការសម្រេចចិត្តផ្នែកហិរញ្ញវត្ថុបានកាន់តែប្រសើរ និងកសាងជីវភាពដែលមានភាពធន់ និងចីរភាព៕