រាជរដ្ឋាភិបាលនឹងបន្ថែមការឧបត្ថម្ភធនលើប្រេងឥន្ធនៈក្នុងករណីឡើងថ្លៃ

ភ្នំពេញ ៖ ក្នុងពេលសង្គ្រាមនៅតំបន់មជ្ឈិមបូព៌ាកាន់តែរីករាលដាលខ្លាំងឡើង តម្លៃប្រេងឥន្ធនៈនៅលើពិភពលោក ក៏ត្រូវបានព្យាករថានឹងឡើងថ្លៃខ្ពស់ ហើយបណ្ដាប្រទេសនានាលើពិភពលោកក៏បានដាក់ចេញនូវវិធានការសម្រាប់ជួយពលរដ្ឋរបស់ខ្លួន ។ ដោយឡែក កម្ពុជាក៏បានត្រៀមសម្រាប់បញ្ហានេះដែរ ដោយរាជរដ្ឋាភិបាលនឹងឧបត្ថម្ភធនបន្ថែមលើប្រេងឥន្ធនៈក្នុងករណីឡើងថ្លៃដល់កម្រិតមួយ ។

បើតាមឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានមានប្រសាសន៍ថា តាំងពីអាណត្តិមុនៗរហូតដល់មកដល់អាណត្តិទី៧នេះ រាជរដ្ឋាភិបាលកម្ពុជាបានសហការជាមមួយវិស័យឯកជន ដើម្បីសម្រាលបន្ទុករបស់ពលរដ្ឋដែលជាអ្នកប្រើប្រាស់ប្រេងឥន្ធនៈ ដោយក្នុងនោះរដ្ឋាភិបាលបានបន្ថយតម្លៃ ៦,៥សេនដុល្លារក្នុងមួយលីត្រ ។

ឯកឧត្តមបន្តថា សម្រាប់បច្ចុប្បន្ននេះ បើសិនជាតម្លៃប្រេងសាំងដែលចម្រាញ់រួចឡើងលើសពី ៩០ដុល្លារក្នុងមួយបារ៉ែល ហើយប្រេងម៉ាស៊ូតឡើងលើសពី១០០ដុល្លារក្នុងមួយបារ៉ែល នោះរាជរដ្ឋាភិបាលនឹងបន្ថយ១សេនដុល្លារក្នុងមួយលីត្របន្ថែមទៀត ។ មកដល់បច្ចុប្បន្នតម្លៃប្រេងសាំង និងប្រេងម៉ាស៊ូតបានឡើងថ្លៃលើសពីអ្វីដែលបានកំណត់រួចទៅហើយ គឺលើសពី១០០ដុល្លារក្នុងមួយបារ៉ែល ប៉ុន្តែតម្លៃប្រេងសាំង និងប្រេងម៉ាស៊ូតលក់លើទីផ្សារ នៅតែមិនទាន់ឡើង ដោយសារតែប្រេងឥន្ធនៈដែលលក់លើទីផ្សារនាពេលនេះ បានកំណត់តាំងពីថ្ងៃទី០១ ខែមីនា ហើយនឹងបន្តលក់តម្លៃនេះ រហូតដល់ថ្ងៃទី១០ ខែមីនា ។ ដូច្នេះ ចាប់ពីថ្ងៃទី១១ ខែមីនា ឆ្នាំ២០២២៦តទៅ តម្លៃប្រេងឥន្ធនៈដាក់លក់លើទីផ្សារកម្ពុជានឹងមានការប្រែប្រួល ។

ពាក់ព័ន្ធនឹងការព្រួយបារម្ភរបស់ប្រជាពលរដ្ឋចំពោះកង្វះខាតប្រេងប្រើប្រាស់នៅកម្ពុជា ឯកឧត្តមអ្នកនាំពាក្យបានមានប្រសាសន៍ថា ក្រសួងពាណិជ្ជកម្ម និងក្រសួងរ៉ែ និងថាមពល បានតម្រូវឱ្យក្រុមហ៊ុនឯកជន ដែលនាំចូលប្រេងមកកម្ពុជា ត្រូវបម្រុងប្រេងទុកឱ្យបាន១ខែ ក្នុងករណីមិនមានការនាំចូលសោះ ដូច្នេះហើយសម្រាប់សន្និធិប្រេងដែលបានសហការជាមួយក្រុមហ៊ុនប្រេងឥន្ធនៈ កម្ពុជាអាចទប់ទល់នឹងសភាពការណ៍នាពេលនេះបាន ។

ឯកឧត្តមបានបញ្ជាក់ថា ៖

«ដំណើរការនៃសង្គ្រាមនៅតំបន់មជ្ឈិមបូព៌ា យើងមិនទាន់ដឹងថាវានឹងអូសបន្លាយរយៈពេលប៉ុន្មានទេ ប៉ុន្តែថ្មីៗនេះយើងបានឃើញថាប្រទេសចិនបានបញ្ជាឱ្យក្រុមហ៊ុនចម្រាញ់ប្រេងធំៗរបស់ខ្លួន បន្ថយ ឬកម្រិតការនាំចេញប្រេង ដូច្នេះ កម្ពុជាក៏ត្រូវមានការប្រុងប្រយ័ត្ន និងត្រូវប្រើប្រាស់ប្រេងឥន្ធនៈដោយសន្សំសំចៃ ក្នុងករណីមានការរឹតត្បិតពីប្រភពនាំចូល ពីព្រោះថាកម្ពុជាមិនទាន់មានរោងចក្រចម្រាញ់ខ្លួនឯងទេ គឺនាំចូលប្រេងមកប្រើសុទ្ធសាធ»។

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានមានប្រសាសន៍ថា សង្គ្រាមនៅមជ្ឈិមបូព៌ា បាន និងកំពុងធ្វើឱ្យប៉ះពាល់ដល់ឧស្ម័ន និងប្រេងឥន្ធនៈ ហើយដូចដែលបានដឹងហើយថា ការដឹកជញ្ជូនប្រេង និងឧស្ម័នឥន្ធនៈប្រមាណជាង២០ភាគរយ ត្រូវបានឆ្លងកាត់ច្រក Hormuz តំបន់មជ្ឈិមបូព៌ា ដែលឥឡូវប្រទេសអ៊ីរ៉ង់បានគំរាមកំហែងបាញ់នាវាណាដែលដឹកជញ្ជូនប្រេងតាមច្រកនេះ ។

ឯកឧត្តមបន្តថា ៖

«នៅពេលដែលច្រកនេះត្រូវបានបិទចរាចរណ៍ធ្វើឱ្យតម្លៃប្រេង និងឧស្ម័នឥន្ធនៈបានហក់ឡើង ជាក់ស្ដែងបច្ចុប្បន្ននេះ តម្លៃប្រេងបានហក់ឡើងប្រមាណ៣០ភាគរយរួចទៅហើយ ។ សម្រាប់កម្ពុជាក៏រងផលប៉ះពាល់ពីការបិទច្រកដ៏សំខាន់មួយនេះ ប៉ុន្តែភ្លាមៗនេះ យើងរកមិនទាន់ឃើញនូវផលប៉ះពាល់បន្ទាន់នោះទេ ។ ការផ្គត់ផ្គង់ប្រេងពីបណ្ដាប្រទេសមួយចំនួនដូចជាអាមេរិក និងបារាំង ដែលមានក្រុមហ៊ុននៅកម្ពុជានៅតែបន្ត ប៉ុន្តែ អ្វីដែលជៀសមិនផុតនោះគឺការឡើងថ្លៃប្រេងឥន្ធនៈនៅពេលខាងមុខ»។

ឯកឧត្តមបានបញ្ជាក់ថា នៅចំពោះមុខនាពេលនេះ មិនមានសញ្ញាណាមួយថា នៅកម្ពុជានឹងខ្វះប្រេងសម្រាប់ប្រើប្រាស់នោះទេ ហើយក្នុងស្ថានភាពបែបនេះ កម្ពុជាមានប្រេងបម្រុងទុកសម្រាប់ប្រើប្រាស់ ហើយបន្តទិញចូលមកស្តុកទុកប្រើប្រាស់ទៅតាមតម្រូវការ ។

យោងតាមទិន្នន័យរបស់គយ និងរដ្ឋាករកម្ពុជា ក្នុងឆ្នាំ២០២៥ កន្លងទៅកម្ពុជាបាននាំចូលប្រេងម៉ាស៊ូតក្នុងទំហំទឹកប្រាក់១,២៦ពាន់លានដុល្លារអាមេរិក បើធៀបនឹងឆ្នាំ ២០២៤ ថយចុះប្រមាណ១០,៩៨ភាគរយ ចំណែកប្រេងសាំងមានទំហំទឹកប្រាក់ ៨៤០លានដុល្លារអាមេរិក បើធៀបនឹងឆ្នាំ ២០២៤ មានការថយចុះប្រមាណ១១,២៤ភាគរយ ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។

រាជរដ្ឋាភិបាលនឹង​បន្ថែមការ​ឧបត្ថម្ភ​ធន​លើ​ប្រេង​ឥន្ធនៈក្នុង​ករណីឡើងថ្លៃ

លោក អ៊ិច ណែត | Mr. Ich Neth

រាជរដ្ឋាភិបាលនឹងបន្ថែមការឧបត្ថម្ភធនលើប្រេងឥន្ធនៈក្នុងករណីឡើងថ្លៃ