តម្លៃកង្កែបធ្លាក់ចុះ សហគមន៍កង្កែបទន្លេសាប បែរទៅរកការកែច្នៃ អាចបង្កើនតម្លៃបន្ថែម

សៀមរាប៖ ខណៈតម្លៃកង្កែបសាច់រស់នៅលើទីផ្សារធ្លាក់ចុះ សហគមន៍កសិកម្មកង្កែបទន្លេសាប ក្នុងខេត្តសៀមរាប បានបង្វែរបញ្ហាទីផ្សារទៅជាឱកាស ដោយកែច្នៃកង្កែបជាផលិតផលសម្រេចចំនួន ៥ ប្រភេទ ដើម្បីបង្កើនតម្លៃបន្ថែម និងពង្រីកទីផ្សារសម្រាប់ផលិតផលក្នុងស្រុក។

សហគមន៍កសិកម្មកង្កែបទន្លេសាប មានទីតាំងនៅភូមិអង្រ្គង ឃុំកន្រ្ទាំង ស្រុកប្រាសាទបាគង ខេត្តសៀមរាប។ បច្ចុប្បន្ន សហគមន៍កំពុងកែច្នៃកង្កែបជា ៥ ប្រភេទ រួមមាន កង្កែបធម្មតា កង្កែបប្រឡាក់ម្ទេស កង្កែបប្រឡាក់គ្រឿង កង្កែបបោក និងផ្អកកង្កែប ដើម្បីផ្គត់ផ្គង់ទីផ្សារក្នុងស្រុក។

លោក គង់ គឹមឆាវ ប្រធានសហគមន៍កសិកម្មកង្កែបទន្លេសាប បានឱ្យដឹងថា ការកែច្នៃនេះធ្វើឡើងដើម្បីដោះស្រាយបញ្ហាតម្លៃកង្កែបសាច់ធ្លាក់ចុះ ដែលធ្វើឱ្យកសិករប្រឈមនឹងការខាតបង់។ បច្ចុប្បន្ន តម្លៃកង្កែបសាច់រស់នៅលើទីផ្សារមានត្រឹម ៥,៥០០ ទៅ ៦,០០០ រៀលក្នុងមួយគីឡូក្រាម ខណៈកសិករត្រូវការតម្លៃចាប់ពី ៦,៥០០ រៀលក្នុងមួយគីឡូក្រាមឡើងទៅ ដើម្បីអាចទទួលបានផលចំណេញ។

ដើម្បីជួយសមាជិក សហគមន៍បានបន្តទិញកង្កែបសាច់រស់ពីសមាជិកចំនួន ១៥ គ្រួសារ ក្នុងតម្លៃថេរ ៦,៥០០ រៀលក្នុងមួយគីឡូក្រាម រួចយកមកកែច្នៃជាផលិតផលសម្រេច។

សហគមន៍អាចប្រមូលកង្កែបសាច់បានចន្លោះពី ៥ ទៅ ៧ តោនក្នុងមួយខែ ដោយលក់ជាសាច់ និងកែច្នៃជាផលិតផលសម្រេចចូលទីផ្សារបានចន្លោះពី ៥០០ ទៅ ៦០០ គីឡូក្រាមក្នុងមួយខែ ដែលមានទម្ងន់កន្លះគីឡូក្រាមក្នុងមួយកញ្ចប់។

លោក គឹមឆាវ បានបញ្ជាក់ថា ផលិតផល ៤ ប្រភេទ រួមមាន កង្កែបធម្មតា កង្កែបប្រឡាក់ម្ទេស កង្កែបប្រឡាក់គ្រឿង និងផ្អកកង្កែប មានតម្លៃ ១២,៥០០ រៀលក្នុងមួយកញ្ចប់។ ដោយឡែក កង្កែបបោក មានតម្លៃ ១៥,០០០ រៀលក្នុងមួយកញ្ចប់។

កញ្ញា គឹង មុំ អ្នកវេចខ្ចប់ផលិតផលកង្កែប បានឱ្យដឹងថា ផលិតផលត្រូវបានផលិតតាមបែបប្រពៃណីខ្មែរ ដោយប្រើប្រាស់គ្រឿងផ្សំក្នុងស្រុក រួមជាមួយបច្ចេកវិទ្យាជំនួយ ដូចជា ម៉ាស៊ីនកិនសាច់ ម៉ាស៊ីនកិនគ្រឿង និងម៉ាស៊ីនច្រកថង់បឺតខ្យល់ (Vacuum Sealing)។ ផលិតផលអាចរក្សាទុកបានរហូតដល់ ២ ខែ ដោយផ្តោតលើសុវត្ថិភាពម្ហូបអាហារ និងអនាម័យ។

បច្ចុប្បន្ន ផលិតផលកែច្នៃទាំងនេះកំពុងពង្រីកការចែកចាយទៅកាន់តំបន់ភាគឦសាន និងតំបន់ឆ្នេរសមុទ្រ រួមមាន ខេត្តព្រះសីហនុ រតនគិរី ស្ទឹងត្រែង ឧត្តរមានជ័យ ព្រះវិហារ កំពង់ស្ពឺ និងកោះរ៉ុង។

តាមរយៈសញ្ញាណវិជ្ជមាននៃតម្រូវការទីផ្សារ សហគមន៍មានផែនការបន្ថែមមុខទំនិញថ្មីៗ និងពង្រីកបណ្ដាញចែកចាយឱ្យកាន់តែទូលំទូលាយ ដើម្បីធានាចីរភាពប្រាក់ចំណូលជូនកសិករក្នុងតំបន់។

លោក គង់ គឹមឆាវ មានសុទិដ្ឋិនិយមថា ទីផ្សារផលិតផលកង្កែបកែច្នៃនឹងអាចពង្រីកបានកាន់តែទូលំទូលាយ ដោយសារចំនួនការបញ្ជាទិញកំពុងកើនឡើង និងមានការចាប់អារម្មណ៍ពីប្រជាពលរដ្ឋ។ ទោះបីចំណូលពីការលក់ផលិតផលកង្កែបមិនទាន់មានទំហំធំដុំក៏ដោយ ក៏លោកចាត់ទុកការកែច្នៃនេះថាជាជំហានមួយក្នុងការបង្កើនតម្លៃកសិផល និងពង្រីកទីផ្សារសម្រាប់កសិករក្នុងតំបន់៕

លោក កែ ផុស | Mr. Ker Phors

ជីវប្រវត្តិ: បានបញ្ចប់ការសិក្សាថ្នាកអនុបណ្ឌិតផ្នែកប្រព័ន្ធផ្សព្វផ្សាយមកពីសហភាពសូវៀត និងមានបទពិសោធន៍ជាង ២០ឆ្នាំក្នុងវិស័យសារព័ត៌មាន។ បច្ចុប្បន្ន លោកជាអ្នកយកព័ត៌មានសេដ្ឋកិច្ចឱ្យសារព័ត៌មាន AMS Economy ។

តម្លៃ​កង្កែប​ធ្លាក់ចុះ​ សហគមន៍​កង្កែប​ទន្លេ​សាប ​បែរ​ទៅ​រក​ការ​កែច្នៃ​ ​អាច​បង្កើន​តម្លៃ​បន្ថែម​

លោក កែ ផុស | Mr. Ker Phors

តម្លៃកង្កែបធ្លាក់ចុះ សហគមន៍កង្កែបទន្លេសាប បែរទៅរកការកែច្នៃ អាចបង្កើនតម្លៃបន្ថែម