កម្ពុជារំពឹងថានឹងកាន់តែមានភាពទាក់ទាញអ្នកវិនិយោគ ក្រោយអាម៉េរិកកំណត់អត្រាពន្ធថ្មី ១០ ភាគរយ

មន្ត្រីជាន់ខ្ពស់រាជរដ្ឋាភិបាល និងអ្នកជំនាញសេដ្ឋកិច្ច បានលើកឡើងថា ការដែលកម្ពុជាទទួលបានអត្រាពន្ធគយថ្មី ១០ ភាគរយ សម្រាប់ការនាំចេញទៅកាន់សហរដ្ឋអាម៉េរិក ក្រោយការស៊ើបអង្កេតអនុលោមភាពតាមមាត្រា ៣០១ នៃច្បាប់ពាណិជ្ជកម្មសហរដ្ឋអាម៉េរិក នឹងជួយបង្កើនភាពប្រកួតប្រជែង និងទាក់ទាញការវិនិយោគបន្ថែមមកកម្ពុជា។

ថ្លែងក្នុងសន្និសីទសារព័ត៌មានស្ដីពី «អត្រាពន្ធគយថ្មី ក្នុងការនាំចូលពីកម្ពុជា ទៅសហរដ្ឋអាមេរិក បន្ទាប់ពីការស៊ើបអង្កេតអនុលោមភាព នៃមាត្រា ៣០១ ច្បាប់ពាណិជ្ជកម្ម សហរដ្ឋអាមេរិក» កាលពីថ្ងៃទី២៧ ខែកក្កដា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) មានប្រសាសន៍ថា កម្ពុជាទទួលបានអត្រាពន្ធ ១០ ភាគរយ ខណៈប្រទេសមួយចំនួនទៀតត្រូវបង់អត្រា ១២,៥ ភាគរយ ដែលផ្តល់ឱ្យកម្ពុជានូវប្រៀបប្រកួតប្រជែងក្នុងការទាក់ទាញអ្នកវិនិយោគ។

ឯកឧត្តមបានបញ្ជាក់ថា៖ “អត្រាពន្ធមិនមែនជាកត្តាតែមួយដែលអ្នកវិនិយោគពិចារណានោះទេ ប៉ុន្តែពួកគេក៏វាយតម្លៃលើសុខសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច កម្លាំងពលកម្មវ័យក្មេង ហេដ្ឋារចនាសម្ព័ន្ធ និងនីតិវិធីវិនិយោគផងដែរ។”

ឯកឧត្តមមានប្រសាសន៍ថា កម្ពុជាមានច្បាប់វិនិយោគបើកទូលាយ ដែលអនុញ្ញាតឱ្យវិនិយោគិនបរទេសកាន់កាប់ការវិនិយោគបាន ១០០ ភាគរយ លើគ្រប់វិស័យ និងមានការលើកទឹកចិត្តជាច្រើន បើធៀបនឹងប្រទេសជិតខាង។ ជាមួយគ្នានេះ វិនិយោគិនក៏អាចផ្ទេរប្រាក់ចំណេញចេញពីកម្ពុជាបាន ដោយមិនមានការរឹតបន្តឹង។

ឯកឧត្តមបន្ថែមថា រាជរដ្ឋាភិបាលចាត់ទុកវិស័យឯកជនជាដៃគូដ៏សំខាន់ក្នុងការអភិវឌ្ឍសេដ្ឋកិច្ច និងបានបង្កើតយន្តការជាច្រើន ដើម្បីស្តាប់ និងដោះស្រាយបញ្ហាប្រឈមរបស់វិស័យឯកជន ដែលជាកត្តាជួយពង្រឹងសមត្ថភាពប្រកួតប្រជែងរបស់កម្ពុជា។

ពាក់ព័ន្ធនឹងថាមពល ឯកឧត្តម ស៊ុន ចាន់ថុល បានឱ្យដឹងថា បច្ចុប្បន្ន ប្រមាណ ៦៣ ភាគរយ នៃការផលិតអគ្គិសនីរបស់កម្ពុជា បានមកពីថាមពលកកើតឡើងវិញ ហើយកម្ពុជាមានគោលដៅបង្កើនសមាមាត្រនេះដល់ ៧០ ភាគរយ។ ឯកឧត្តមបានចាត់ទុកថា នេះជាកត្តាមួយដែលជួយទាក់ទាញអ្នកវិនិយោគ ជាពិសេសក្រុមហ៊ុនដែលផ្តោតលើការអភិវឌ្ឍប្រកបដោយចីរភាព។

ឯកឧត្តមក៏បានលើកឡើងពីលទ្ធផលនៃការទាក់ទាញវិនិយោគរបស់កម្ពុជាក្នុងរយៈពេលប៉ុន្មានឆ្នាំចុងក្រោយ។ ក្នុងឆ្នាំ២០២៣ CDC បានអនុម័តគម្រោងវិនិយោគចំនួន ២៦៨ គម្រោង។ ឆ្នាំ២០២៤ បានអនុម័ត ៤១៤ គម្រោង ជាមួយទុនវិនិយោគជិត ៧ ពាន់លានដុល្លារអាម៉េរិក។ ឆ្នាំ២០២៥ បានអនុម័ត ៦៣០ គម្រោង មានទុនវិនិយោគ ១០ ពាន់លានដុល្លារអាម៉េរិក និងបង្កើតការងារចំនួន ៤៣៣.០០០ កន្លែង។

ដោយឡែក ក្នុងរយៈពេល ៦ ខែដំបូង ឆ្នាំ២០២៦ កម្ពុជាបានអនុម័តគម្រោងវិនិយោគ ២៧៦ គម្រោង មានទុនវិនិយោគប្រមាណ ៤,៧ ពាន់លានដុល្លារអាម៉េរិក និងរំពឹងបង្កើតការងារប្រមាណ ១៦ ម៉ឺនកន្លែង។

ទោះជាយ៉ាងណា ឯកឧត្តម ស៊ុន ចាន់ថុល បានបញ្ជាក់ថា កម្ពុជាមិនគួរពឹងផ្អែកលើអត្រាពន្ធតែមួយមុខនោះទេ ប៉ុន្តែត្រូវបន្តកែលម្អនីតិវិធីវិនិយោគ ធ្វើឱ្យកាន់តែងាយស្រួល និងកាត់បន្ថយភាពស្មុគស្មាញ ដើម្បីជំរុញឱ្យអ្នកវិនិយោគអាចបំពេញនីតិវិធីទាំងអស់តាមប្រព័ន្ធច្រកចេញចូលតែមួយ។ ជាមួយគ្នានេះ រាជរដ្ឋាភិបាលក៏កំពុងខិតខំកាត់បន្ថយថ្លៃដើមឡូជីស្ទីក ដើម្បីបង្កើនសមត្ថភាពប្រកួតប្រជែងជាមួយប្រទេសជិតខាង។

លោកបណ្ឌិត ឌុច ដារិន្ទ អ្នកជំនាញសេដ្ឋកិច្ច បានវាយតម្លៃថា អត្រាពន្ធថ្មី ១០ ភាគរយ គឺជាសញ្ញាវិជ្ជមានសម្រាប់កម្ពុជា បើប្រៀបធៀបនឹងប្រទេសមួយចំនួនក្នុងតំបន់ដែលទទួលអត្រា ១២,៥ ភាគរយ។ លោកមានប្រសាសន៍ថា ទោះភាពខុសគ្នាត្រឹម ២,៥ ភាគរយ ក៏ដោយ ប៉ុន្តែវាមានសារៈសំខាន់សម្រាប់ឧស្សាហកម្មដែលមានការប្រកួតប្រជែងខ្លាំង ដូចជាវិស័យកាត់ដេរ ស្បែកជើង និងផលិតផលធ្វើដំណើរ ហើយអាចជួយទាក់ទាញទាំងការវិនិយោគ និងការបញ្ជាទិញបន្ថែម។

លោកបានផ្តល់អនុសាសន៍ថា ដើម្បីទាញយកឱកាសនេះ កម្ពុជាគួរបន្តរក្សាស្ថិរភាពនយោបាយ និងម៉ាក្រូសេដ្ឋកិច្ច អភិវឌ្ឍហេដ្ឋារចនាសម្ព័ន្ធ ពង្រឹងជំនាញកម្លាំងពលកម្ម បង្កើនផលិតភាព និងសមត្ថភាពប្រកួតប្រជែងរយៈពេលវែង ព្រមទាំងជំរុញការធ្វើពិពិធកម្មសេដ្ឋកិច្ច និងទីផ្សារនាំចេញ។

ជាមួយគ្នានេះ ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានបញ្ជាក់ថា ការកំណត់អត្រាពន្ធថ្មី ១០ ភាគរយ នេះ មិនបង្កផលប៉ះពាល់ដល់ទីផ្សារនាំចេញទំនិញរបស់កម្ពុជាទៅកាន់សហរដ្ឋអាម៉េរិកនោះទេ៕

លោក ញ៉ែម សុផល | Mr. NHEM SOPHAL

ជីវប្រវត្តិ: លោក ញ៉ែម សុផល ចាប់ផ្តើមអាជីពសារព័ត៌មាននៅឆ្នាំ១៩៩៣និងធ្លាប់មានបទពិសោធន៍ជិត៣០ឆ្នាំក្នុងវិស័យសារព័ត៌មាន ផ្នែកសេដ្ឋកិច្ច ពាណិជ្ជកម្ម អប់រំ វប្បធម៌ សង្គម និង បកប្រែភាសាអង់គ្លេស ។ ធ្លាប់បម្រើការក្នុងស្ថាប័នសារព័ត៌មានធំៗជាច្រើន ដូចជា ស្ថានីយទូរទស្សន៍ កាសែត ទស្សនាវដ្តី និងគេហទំព័រ ដោយទទួលបានការបណ្តុះបណ្តាលវិជ្ជាជីវៈទាំងនៅក្នុងស្រុកនិងក្រៅប្រទេស។ លោកបានបញ្ចប់ការសិក្សាថ្នាក់បរិញ្ញាបត្រជំនាញភាសាអង់គ្លេស។បច្ចុប្បន្នជាអ្នកយកព័ត៌មានជាន់ខ្ពស់ផ្នែកសេដ្ឋកិច្ចនិងផ្សព្វផ្សាយនៅ AMS Economy ៕