ស្ថានទូតអាម៉េរិកប្រចាំកម្ពុជា នឹងរៀបចំពិធីស្បថ ចូលកាន់តំណែងរបស់ក្រុមអ្នកស្ម័គ្រចិត្តអង្គការ Peace Corps ជំនាន់ទី ១៨ នៅថ្ងៃសុក្រទី ៩ ខែតុលា ឆ្នាំ ២០២៦ ខាងមុខចាប់ពីម៉ោង ៩ ដល់ ១១ព្រឹក នៅ សណ្ឋាគារហ៊ីម៉ាវ៉ារី រាជធានីភ្នំពេញ។ នេះបើយោង តាមសេចក្តីប្រកាសព័ត៌មានរបស់ស្ថានទូតអាម៉េរិកកាលពីថ្ងៃទី៦ ខែតុលា។

សេចក្តីប្រកាសព័ត៌មានដដែលបានឱ្យដឹងថា លោកស្រី Aleks Zittle ភារធារីស្តីទីនៃស្ថានទូត អាម៉េរិក រួមជាមួយតំណាងក្រសួងអប់រំ យុវជន និងកីឡា នឹងអញ្ជើញជាអធិបតី និងថ្លែងសុន្ទរកថាគន្លឹះ ក្នុងពិធីនេះ។ ពិធីនាឆ្នាំនេះ មានអត្ថន័យជាប្រវត្តិសាស្ត្រ យ៉ាងពិសេស ដោយ​សារការស្បថចូលកាន់តំណែង របស់អ្នកស្ម័គ្រចិត្ត Peace Corps លើពិភពលោកទី ២៥០ ០០០ នេះ ប្រព្រឹត្តទៅទន្ទឹមគ្នានឹងការ​ប្រារព្ធខួប ២៥០ ឆ្នាំនៃការបង្កើតសហរដ្ឋអាម៉េរិក។

សេចក្តីប្រកាសព័ត៌មានបានរំលេចថា ក្នុងរយៈពេល ៦៥ ឆ្នាំកន្លងមកនេះ ប្រជាជនអាម៉េរិកគ្រប់វ័យ និងគ្រប់ មជ្ឈដ្ឋាន បានចូលរួមបម្រើ​ការងារ​ក្នុងទីភ្នាក់ងារ Peace Corps នៅតាមប្រទេសចំនួន ១៤៤ ជុំវិញពិភពលោក ដោយបានកសាងចំណងមិត្តភាព និងកិច្ចសហ​ប្រតិ​បត្តិការ​យ៉ាងជិតស្និទ្ធរវាងប្រជាជនអាម៉េរិក និង​សហគមន៍​ម្ចាស់ផ្ទះ។ ដោយឡែក ទីភ្នាក់ងារ Peace Corps បានស្វាគមន៍ក្រុមអ្នកស្ម័គ្រចិត្ត​ជំនាន់ដំបូងរបស់​ខ្លួនមកកាន់កម្ពុជាកាលពីឆ្នាំ ២០០៧។

សម្រាប់បេសកកម្មរយៈពេលពីរឆ្នាំខាងមុខនេះ ក្រុម​អ្នក​ស្ម័គ្រ​ចិត្តថ្មីទាំងអស់ នឹងចុះទៅរស់នៅជាមួយគ្រួសារ​ប្រជាពលរដ្ឋកម្ពុជាតាម​សហគមន៍ និងធ្វើការសហការ​ជិតស្និទ្ធជាមួយគ្រូបង្រៀនក្នុងស្រុក ដើម្បីលើកកម្ពស់​ការ​បង្រៀនភាសាអង់គ្លេស និងការគិតបែបស៊ីជម្រៅ សំដៅពង្រីកឱកាសសិក្សា និងវិជ្ជាជីវៈដល់យុវជន​នៅទូទាំងប្រទេស។ ទីភ្នាក់ងារ Peace Corps សម្តែងនូវមោទនភាពក្នុងការ​បន្តកិច្ចសហ​ប្រតិបត្តិការ​ជាមួយដៃគូ និងភាគីពាក់ព័ន្ធកម្ពុជា ដើម្បីពង្រឹងវិស័យ​អប់រំ​ភាសាអង់គ្លេស និងរៀបចំយុវជនកម្ពុជាឱ្យកាន់​តែមាន​សមត្ថភាព​ក្នុងការប្រកួតប្រជែងក្នុងសេដ្ឋកិច្ច​សកល៕

ដោយ៖ ង៉ាន់ ទិត្យ