នៅថ្ងៃទី៣ ខែមេសា​ នេះ​ SM Entertainment បានប្រកាសថា Mark នឹងបញ្ចប់កិច្ចសន្យាផ្ដាច់មុខជាមួយនឹងផលិតកម្ម ខណៈបញ្ចប់សកម្មភាពការងារទាំងស្រុងក្នុងនាមជាសមាជិក NCT រួមទាំងក្រុម NCT 127 និង NCT DREAM ផងដែរ។

នៅក្នុងសេចក្តីថ្លែងការណ៍ផ្លូវការ SM បានរៀបរាប់ថា៖ “យើងបានពិភាក្សាជាមួយ Mark អំពីទិសដៅសកម្មភាពការងារនៅពេលអនាគតអស់ពេលមួយរយៈពេលធំ។ បន្ទាប់ពីមានការសន្ទនាគ្នាយ៉ាងស៊ីជម្រៅ យើងបានព្រមព្រៀងគ្នាថានឹងបញ្ចប់កិច្ចសន្យាផ្តាច់មុខនៅថ្ងៃទី ៨ ខែមេសា នេះ”។

យោងតាមការសម្រេចចិត្តនេះ Mark នឹងបញ្ចប់រាល់សកម្មភាពទាំងអស់ជាមួយក្រុម NCT ខណៈ NCT 127 គ្រោងនឹងបន្តសកម្មភាពជាមួយសមាជិក ៧ រូបគឺ Johnny, Taeyong, Yuta, Doyoung, Jaehyun, Jungwoo និង Haechan។ ចំណែកឯ NCT Dream គ្រោងនឹងបន្តជាមួយសមាជិក ៦ រូបគឺ Renjun, Jeno, Haechan, Jaemin, Chenle និង Jisung។

ថ្លែងពីការលាគ្នា SM ក៏បានសរសើរដល់តារាប្រុសវ័យ ២៦ ឆ្នាំរូបនេះថា៖ “ចាប់តាំងពីបង្ហាញខ្លួនដំបូងក្នុងនាមជាសមាជិកក្រុម NCT ក្នុងឆ្នាំ ២០១៦ Mark បានបង្ហាញនូវសមត្ថភាពដ៏អស្ចារ្យក្នុងរយៈពេលមួយទសវត្សរ៍កន្លងមកនេះ ដោយធ្វើបានយ៉ាងល្អមិនត្រឹមតែក្នុងនាមជាសមាជិកក្រុមប៉ុណ្ណោះទេ ប៉ុន្តែក៏ជាសិល្បករទោលផងដែរ”។

“យើងខ្ញុំសូមថ្លែងអំណរគុណចំពោះពេលវេលាដ៏មានតម្លៃដែលយើងបានដើររួមគ្នា ហើយយើងក៏សូមគាំទ្រដោយស្មោះអស់ពីចិត្តចំពោះអនាគតរបស់ Mark ក្នុងការចាកចេញពីក្រុម និងចាប់ផ្តើមជំហានថ្មីផងដែរ” ផលិតកម្មរៀបរាប់ដូច្នេះ។ គួរ​ឱ្យដឹងផងដែរថា Mark បានចាប់ផ្តើមអាជីពជាតារាខេប៉ុប ក្នុងនាមជាសមាជិកក្រុម NCT U នៅថ្ងៃទី ៩ ខែមេសា ឆ្នាំ ២០១៦ ជាមួយនឹងបទចម្រៀង “The 7th Sense”។ ការចាកចេញរបស់តារារ៉េបរូបនេះ គឺជាការចាកចេញពីក្រុម ក្រោយរួមរស់ជាមួយគ្នារយៈពេល ១០ឆ្នាំត្រឹម៕