ស្ថាប័ន FIFA និងអង្គការ Global Citizen បានប្រកាសនៅថ្ងៃទី៩ ខែកក្កដានេះថា កំពូលតារាចម្រៀងប៉ុប Justin Bieber នឹងចូលរួមជាតួឯកសំខាន់ម្នាក់ទៀត ក្នុងកម្មវិធី Halftime Show នៃវគ្គផ្តាច់ព្រ័ត្រពានរង្វាន់ FIFA World Cup 2026™ ដែលនឹងប្រព្រឹត្តទៅនៅថ្ងៃអាទិត្យ ទី១៩ ខែកក្កដា ឆ្នាំ២០២៦ ខាងមុខនេះ នៅកីឡដ្ឋាន New York New Jersey Stadium។

Justin Bieber នឹងចូលរួមជាមួយ Madonna, Shakira និង BTS ក្នុងនាមជាតួឯកសម្តែងរួមគ្នាសម្រាប់កម្មវិធីវគ្គផ្តាច់ព្រ័ត្រ Halftime Show លើកដំបូងបង្អស់ ដោយប្រមូលផ្តុំសិល្បករលំដាប់កំពូលៗរបស់ពិភពលោក ដើម្បីរួមគ្នាបង្កើតការអបអរសាទរដ៏អស្ចារ្យដែលជាចំណុចប្រសព្វរវាងវិស័យកីឡា តន្ត្រី និងការជះឥទ្ធិពលជាសកល។ លើសពីនេះ Burna Boy (ម្ចាស់បទល្បី ‘Dai Dai’ ច្រៀងរួមគ្នាជាមួយ Shakira) ក៏នឹងបង្ហាញខ្លួនក្នុងអំឡុងពេលផ្សាយផ្ទាល់រយៈពេល ១១ នាទីនេះផងដែរ រួមជាមួយ Gustavo Dudamel ព្រមទាំងក្រុមចម្រៀងកុមារ PS 22 Chorus ​រួមជាមួយក្រុម Coldplay។

ប្រធានសហព័ន្ធ FIFA លោក Gianni Infantino បានមានប្រសាសន៍ថា៖ «នៅពេលនិយាយអំពីអ្វីដែលពិភពលោកកំពុងត្រូវការ គឺមិនមានអ្វីសំខាន់ជាងការអប់រំនោះឡើយ។ យើងមានមោទនភាពខ្លាំងណាស់ដែលមាន Justin Bieber មកចូលរួមជាមួយ Madonna, Shakira និង BTS ដើម្បីគាំទ្រដល់មូលនិធិ FIFA Global Citizen Education Fund ក្នុងការបង្កើនឱកាសទទួលបានការអប់រំប្រកបដោយគុណភាព និងឱកាសកីឡាបាល់ទាត់សម្រាប់កុមារៗនៅជុំវិញពិភពលោក»។

គួរបញ្ជាក់ថា កម្មវិធីសម្ដែងជាប្រវត្តិសាស្ត្រនេះនឹងគាំទ្រដល់មូលនិធិ FIFA Global Citizen Education Fund ដែលមានគោលដៅរៃអង្គាសប្រាក់ឱ្យបាន ១០០ លានដុល្លារអាមេរិក ដើម្បីពង្រីកឱកាសទទួលបានការអប់រំ និងកីឡាបាល់ទាត់សម្រាប់កុមារទូទាំងពិភពលោក។ គិតមកទល់ពេលនេះ ថវិកាជាង ៥០ លានដុល្លារអាមេរិកត្រូវបានរៃអង្គាសរួចរាល់ ដោយថវិកាចំនួន ១ ដុល្លារអាមេរិកពីការលក់សំបុត្ររាល់ការប្រកួតរបស់ FIFA World Cup 2026 ទាំងអស់ នឹងត្រូវបរិច្ចាគចូលទៅក្នុងមូលនិធិនេះ។

តារាចម្រៀង Justin Bieber បានចែករំលែកថា៖ «ពានរង្វាន់ FIFA World Cup ជួយរំលេចឱ្យពិភពលោកទាំងមូលមករួបរួមគ្នាក្នុងទម្រង់មួយដែលគ្មានអ្វីផ្សេងអាចធ្វើបានឡើយ។ ខ្ញុំពិតជាមានអំណរគុណណាស់ដែលបានក្លាយជាផ្នែកមួយនៃកម្មវិធីនេះ ហើយកាន់តែមានចិត្តត្រេកអរនៅពេលដឹងថា វាកំពុងតែជួយពង្រីកឱកាសទទួលបានការអប់រំសម្រាប់កុមារៗ» ៕