អភិបាលខេត្តបាត់ដំបង ទៅសួរសុខទុក្ខលោកយាយ រស់ សាបឿន ជាបងស្រីបង្កើតរបស់លោកស្រី រស់ សេរីសុទ្ធា

លោក សុខ លូ អភិបាលនៃគណៈអភិបាលខេត្តបាត់ដំបង បានអញ្ជើញចុះទៅជួប ដើម្បីសាកសួរសុខទុក្ខលោកយាយ រស់ សាបឿន ដែលត្រូវជាបងស្រីបង្កើតរបស់លោកស្រី រស់ សេរីសុទ្ធា តារាចម្រៀងស្រីល្បីល្បាញក្នុងទសវត្សរ៍ ៦០ និងត្រូវបានទស្សនិកជនដាក់រហស្សនាមរាជិនីសំឡេងរៃមាសកណ្ដឹង។

កាលពីរសៀលថ្ងៃ ២០ ខែមេសា ឆ្នាំ ២០២៦ អភិបាលខេត្តបាត់ដំបង បានធ្វើដំណើរទៅជួបលោកយាយ រស់ សាបឿន បងស្រីរបស់ម្ចាស់បទ «ជំនោរប៉ៃលិន» រូបនេះ បានថ្លែងអំណរគុណដល់ អភិបាលខេត្តបាត់ដំបង និងក្រុមការងារដែលបានអញ្ជើញមកសាកសួរសុខទុក្ខដល់គេហដ្ឋានរបស់លោកយាយផ្ទាល់។

លោកយាយ រស់ សាបឿន ក៏បានលើកឡើងពីការយកចិត្តទុកដាក់របស់ថ្នាក់ដឹកនាំខេត្ត ដែលបានលើកតម្កើងសិល្បករជំនាន់ដើម តាមរយៈការរៀបចំសួនសិល្បៈ និងការសាងសង់រូបសំណាក សិល្បករ សិល្បការិនី ជំនាន់ដើមក្នុងនោះក៏មានការសាងសង់រូបសំណាកលោកស្រី រស់ សេរីសុទ្ធា និងកវីនិពន្ធ តារាចម្រៀងដទៃទៀត ដែលមានដើមកំណើតចេញពីខេត្តបាត់ដំបងផងដែរ។

គួរបញ្ជាក់ផងដែរថា សួនសិល្បៈដែលរដ្ឋបាលខេត្តបាត់ដំបងបានរៀបចំសាងសង់បានប្រមាណ ៨០% ហើយ ដោយក្រុមការងារនឹងបន្តសាងសង់បន្ថែមទៀត ហើយនៅពេលសម្ពោធដាក់ឲ្យប្រើប្រាស់ជាផ្លូវការ នឹងអញ្ជើញសាច់ញាតិ ក្រុមគ្រួសារនៃកវីនិពន្ធ តារាចម្រៀង មកចូលរួមផងដែរ៕