តារាសម្ដែង ម៉េង ប៊ុនទ្បូ ធ្លាក់ខ្លួនឈឺធ្ងន់ចូលពេទ្យ ដោយសារជំងឺបែកសរសៃជើងខាងឆ្វេង

តារាសម្ដែងប្រុស ម៉េង ប៊ុនទ្បូ ត្រូវបានចូលសម្រាកព្យាបាលនៅក្នុងមន្ទីរពេទ្យមួយកន្លែង ដោយសារទ្បើងកម្ដៅរហូតដល់ ៤០ អង្សា បណ្ដាលមកពីជំងឺបែកសរសៃជើងខាងឆ្វេង(សរសៃវ៉ែនរត់ទៅបេះដូង) និងរលាកបំពង់កធ្ងន់ធ្ងរ។ នេះបើយោងតាមការបង្ហោះរបស់តារារួមអាជីព សាវិន ហ្វីលីព បង្ហោះលើហ្វេសប៊ុកនៅព្រឹកនេះ។

នៅលើការបង្ហោះរបស់លោក សាវិន ហ្វីលីព បានឲ្យដឹងបន្ថែមទៀតថា ម៉េង ប៊ុនទ្បូ បានលាក់បាំងទុកជំងឺបែកសរសៃជើងខាងឆ្វេងនេះយូរមកហើយ ដោយសារគ្មានថវិកាធ្វើការវះកាត់ព្យាបាល (ប្រហែល ៣ ពាន់ដុល្លារ)។ តាមការរៀបរាប់របស់តារាប្រុស សាវិន ហ្វីលីពបានឲ្យដឹងថា វេជ្ជបណ្ឌិត ធ្លាប់ព្រមាន តួឯកប្រុស «ចៅពស់កេងកង» ថាបើគាត់មិនព្រមធ្វើការព្យាបាលសរសៃជើងឆ្វេងនេះឲ្យទាន់ពេលទេ ម៉េង ប៊ុនឡូ អាចនឹងប្រឈមមុខនឹងជំងឺគាំងបេះដូងនៅថ្ងៃមុខ។

ក្នុងសំណេររបស់មិត្តរួមអាជីពរូបនោះ បានបញ្ជាក់ថា ម៉េង ប៊ុនទ្បូ មានខ្សែជីវិតបច្ចុប្បន្នកម្សត់ណាស់ ត្រូវមកដេកពេទ្យម្នាក់ឯង គ្មានអ្នកកំដរ ចំណែកជីវភាពរបស់គាត់ពេលនេះមិនប្រសើរទាល់តែសោះ ប៉ុន្តែអតីតតារាចម្រៀងផលិតកម្ម SSB រូបនេះ មិនដែលត្អូញត្អែរម្ដងណាទេ និងព្យាយាមលាក់បាំងស្ថានភាពជីវិត ក្រោយបាត់មុខឈឹងពីសិល្បៈរហូតមកដើ់ថ្ងៃនេះ។

គួរបញ្ជាក់ថា ម៉េង ប៊ុនឡូ ធ្លាប់បានសម្ដែងនៅក្នុងខ្សែភាពយន្ដខ្មែរល្បីៗកាលពីជាង ១០ ឆ្នាំមុនដូចជារឿង «ចៅពស់កេងកង» ,«មន្តមាយា», «ផ្ការាំទឹករាំ» និងមានរឿងភាគជាច្រើនទៀត៕

រូបភាព៖ សាវិន ហ្វីលីព

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត