ព្រះនាង ជេនណា បានជួបជុំសែរាជវង្ស នាឱកាសគម្រប់ខួប ១៤ឆ្នាំ នៃការយាងសោយទិវង្គតរបស់ «ព្រះបរមរតនកោដ្ឋ»

ទិដ្ឋភាពដែលសាច់សាលោហិតនៃព្រះញាតិវង្សខ្មែរជាច្រើនអង្គ បានជួបជុំគ្នាក្នុងឱកាសគម្រប់ខួប ១៤ ឆ្នាំ នៃការយាងសោយទិវង្គតរបស់ព្រះករុណា ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ កាលពីពេលថ្មីៗ នៅព្រះបរមរាជវាំង។

មិនខុសពីរាល់ឆ្នាំ ព្រះនាង បានរៀបចំខ្លួនយ៉ាងប្រពៃ អាវប៉ាក់ស និងសំពត់បត់ពណ៌ស្វាយយ៉ាងថ្លៃថ្នូរ។ សម្រាប់ញាតិវង្សានុវង្សខ្មែរ ដែលបានចូលរួម សុទ្ធតែគ្រងឈុតពណ៌ដូចគ្នា ក្នុងនោះមានដូចជា ព្រះនាង នរោត្តម អម្រិតា, នរោត្តម អេមម៉ា, អ្នកម្នាង សិទ្ធី នីកា ភរិយាព្រះអង្គម្ចាស់ នរោត្តម ចារូច័ក្រ ព្រមទាំងព្រះនាង ព្រះអង្គម្ចាស់ដទៃទៀត។

ពិធីបែបប្រពៃណីជាច្រើន រួមមានរាប់បាត្រ ក៏ព្រះនាង និងព្រះអង្គម្ចាស់ដទៃទៀត ចូលរួមផងដែរ។ ឥរិយាបថទន់ភ្លន់នៃសែរាជវង្សទាំងអស់ ឆ្លុះបញ្ចាំងពីភាពថ្លៃថ្នូរ ដែលជាកេរដំណែលពីដូនតាបន្សល់ទុក។

តាមរយៈរូបភាពដែលព្រះអង្គម្ចាស់ក្សត្រី នរោត្តម ជេនណា បានបង្ហោះលើបណ្ដាញសង្គម ឃើញថា សាច់សាលោហិតនៃព្រះញាតិវង្សខ្មែរសឹងគ្រប់គ្នា និងគ្រប់ឋានៈ បានចូលក្រាបបង្គំថ្វាយមហាព្រះរាជកុសល ព្រះវិញ្ញាណក្ខន្ធ ព្រះករុណា ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» អតីតព្រះមហាក្សត្រខ្មែររួមគ្នា។

នាឱកាសនោះសែរាជវង្សខ្មែរ ព្រះនាង ជេនណា បានក្រាបបង្គំគាល់ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល៕