ជាប់បាក់ឌុបភ្លាម កូនខ្មែរកាត់បារាំង Esnault Myline ចូលប្រកួត និងឈ្នះមកុដ Miss Teen Cambodia 2026 ភ្លែត

Esnault Myline/អេសណុល មីលីន ជាក្មេងស្រីម្នាក់ដែលមិនធ្លាប់មានបទពិសោធន៍ក្នុងកម្មវិធីប្រកួតប្រជែងសម្រស់សោះ តែគ្រាន់តែដាក់ពាក្យចូលប្រកួត Miss Teen Cambodia 2026 ឆ្នាំដំបូងភ្លាម ក៏ក្លាយជាម្ចាស់មកុដភ្លាមដែរ។

MTC ២១ Esnault Myline មានវ័យ ១៨ ឆ្នាំ នាងជាកូនខ្មែរកាត់បារាំង។ Esnault ចេះខ្មែរយ៉ាងច្បាស់ ដោយសារតែនាងរស់នៅ ធំធាត់នៅទីនេះ ហើយភាសាបរទេសក៏នាងចេះស្ទាត់ជំនាញផងដែរ។ អេសណុល មីលីន ជាសិស្សនៃវិទ្យាល័យព្រះស៊ីសុវត្ថិ ហើយទើបប្រឡងបាក់ឌុបជាប់ថ្មីៗនេះ និងទទួលបាននិទ្ទេស C។

ដោយចិត្តស្រលាញ់ខាងវិស័យ beauty pageant នាងបានពុះពារគ្រប់ឧបសគ្គ និងបានមកប្រកួតតែម្នាក់ឯង។ ការបង្ហាញខ្លួនដំបូងក្នុងវិស័យបវរកញ្ញា នាងមានភាពខ្វះខាតខ្លះៗ តែដោយចិត្តស្រលាញ់ក្មេងស្រីរូបនេះបានតស៊ូ ខិតខំ ប្រឹងប្រែង កែប្រែចំណុចខ្វះខាត រហូតក្លាយជាម្ចាស់មកុដ។

អេសណុល ទាំងស្អាត ពូកែ ឆ្លាត ហើយចេះអភិវឌ្ឍន៍ខ្លួនបានយ៉ាងឆាប់រហ័ស ស័ក្ដិសមនឹងទទួលបានភាពជោគជ័យក្នុងតំណែងម្ចាស់មកុដ Miss Teen Cambodia 2026។ មុនឈានចូលវិស័យបវរកញ្ញានាង ក៏ជាតារាសម្ដែង និងជា Influencer ប្រម៉ូតផលិតផល។

ក្នុងវគ្គសំណួរចម្លើយ តួស្រីក្នុងរឿង “បាត់ខ្លួន ៥ នាក់” កាន់តែទទួលបានការគាំទ្រ ដែលសមបំផុតក្លាយជាអ្នកឈ្នះ ព្រោះនាងបង្ហាញវត្តមានលើការប្រកួត នាងមិនមែនមានតែសម្រស់ទេ តែចំណេះដឹង ប្រាជ្ញា ភាពក្លាហានទាំងអំបាលម៉ាន គឺបង្ហាញឲ្យគេឯងឃើញទាំងអស់តែម្ដង។

ក្រៅពីជាម្ចាស់មកុដហើយ អេសណុល ទទួលបានពានរង្វាន់ជាច្រើនទៀតផងដែរ។ គួរបញ្ជាក់ថា ក្រោយ អេសណុល ក្លាយទៅជាម្ចាស់មកុដ Miss Teen Cambodia 2026 អាចហើយនឹងឱកាសតំណាងកម្ពុជា ក្នុងកម្មវិធី Miss Teen Icon International ដូច ជូរី ល្អហួស នាឆ្នាំណាមួយទៅចុះ។

ក្មេងស្រីដែលជាកូនកាត់ខ្មែរបារាំងរូបនេះ ក៏សកម្មក្នុងការថតប្រេម៉ូតតំបន់ទេសចរណ៍ និងចូលរួមថែរក្សាការពារសប្បត្តិ វប្បធម៌ខ្មែរ ដោយ គ្រងឈុតស្បៃខ្មែរជារឿយៗ ដើម្បីឲ្យជាតិសាសន៍ដទៃ កាន់តែស្គាល់ច្បាស់របស់ពិត៕