ក្រសួង​វប្បធម៌ និង​វិចិត្រ​សិល្បៈ​បាន​បង្ហាញ​សកម្មភាព​ស្រាវ​ជ្រាវ​រក​ទី​តាំង​របស់​មនុស្ស​ដែល​រស់​នៅ​សម័យ​បុរាណ​វិទ្យា​នៅ​រមណីយដ្ឋាន​ប្រាសាទ​កោះ​កេរ ដោយបាន​ចាប់​ផ្ដើម​ក្នុង​រយៈពេល​ជាង ១០ ថ្ងៃ​មក​នេះ។

តាម​រយៈ​ការ​បង្ហោះ​លើ​ផេក​ផ្លូវ​ការ​របស់​ក្រសួង​វប្បធម៌​បាន​ឱ្យ​ដឹង​ថា នាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ និងនាយកដ្ឋានអភិរក្ស និងបុរាណវិទ្យា នៃអាជ្ញាធរជាតិព្រះវិហារ បានសហការជាមួយវិទ្យាស្ថាន Max Planck Institute for Geo-anthropology (MPI) មកពីប្រទេសអាល្លឺម៉ង់ ចុះសិក្សាស្រាវជ្រាវទីតាំងមនុស្សរស់នៅក្នុងរមណីយដ្ឋានប្រាសាទកោះកេរ ដោយចាប់ផ្ដើម​ពី​ថ្ងៃ​ទី ១៤ ដល់​ថ្ងៃ​ទី ២៤ ខែ មីនា ឆ្នាំ ២០២៦។ តាមរយៈការសិក្សាបុរាណវិទ្យា និងខួងយកសំណាកដីដើម្បីវិភាគអំពី អាយុកាលនៃកុលាលភាជន៍ ធ្បូង លម្អងផ្កា និងដី។

ការវិភាគនេះអាចស្វែងយល់បានអំពីជីវិតរស់នៅសម័យបុរាណ ការវិវត្តរាជធានីកោះកេរ អាយុកាលនៃការតាំងទីលំនៅ ការប្រែប្រួលអាកាសធាតុ ប្រភេទរុក្ខជាតិ និងសត្វក្នុងសម័យអតីតកាល៕

រូបភាព ៖ ក្រសួង​វប្បធម៌ និង​វិចិត្រ​សិល្បៈ​